Salamo

135 ALELU Ia. E akapaapaa i te ingoa o Iehova; e te au tavini o Iehova, e akapaapaa. 2 Kotou, ko tei tu mai ki roto i te are o Iehova; ki roto i te au paepae no te are o to tatou Atua. 3 E akapaapaa ia Iehova, e meitaki oki to Iehova; e imene i tona ra ingoa, e mea mataora oki. 4 Kua iki oki a Iehova ia Iakoba nona uaorai, ia Iseraela ei apinga akaperepere nana. 5 Kua kite oki au e e maatā Iehova, e kua maata to tatou Atu i te au atua ravarai. 6 Te rave nei a Iehova i tana katoa i anoano ra, ki runga i te au rangi, e te enua nei, i te tai, e te au ngai oonu katoa ra. 7 Nana i akapeke i te kou ki runga mei te openga mai o te enua ra; kua tuku mai aia i te uira ma te ua; kua apai mai aia i te matangi no roto i tona ra au uipa anga. 8 Nana i ta i te au tama mua i Aiphiti; ta te tangata e ta te au puaka katoa: 9 Kua tuku mai aia i te mea umere e te akairo i rotopu ia koe, e Aiphiti, ki runga ia Pharao e tona au tavini katoa. 10 Ko tei ta i te au etene e manganui, e kua ta i te au ariki mana ra; 11 Ia Sihona, ariki no te Amori ra, e ia Oga, ariki no Basana; e to te au basileia katoa i Kanaana ra; 12 E kua oronga maira i to ratou enua ei tuanga; ei tuanga na tona ra au tangata na Iseraela. 13 Toou ra ingoa, e Iehova, ka tu ïa e rimua; te manakoanga ia koe, e Iehova, i tera uki i tera uki. 14 E akatikā Iehova i tona ra tangata; e tataraara aia i tona ra au tavini. 15 Te au idolo no te etene, e ario ïa e te auro, e angaanga na te rima tangata. 16 E vaa to ratou, kare ra e tuatua; e mata to ratou, kare ra e akara; 17 E taringa to ratou, kare ra e akarongo; kare oki e aʼo o roto i to ratou vaa. 18 Ko te aronga i anga ia ratou, okotai o ratou tu ma ratou; e te aronga katoa i irinaki ia ratou ra. 19 E akameitaki ia Iehova, e te ngutuare o Iseraela; e akameitaki ia Iehova, e te ngutuare o Aarona; 20 E akameitaki ia Iehova, e te ngutuare o Levi; e akameitaki ia Iehova, kotou, ko tei mataku ia Iehova ra. 21 Kia akameitakiiā Iehova na Ziona atu nei, ko tei noo i Ierusalema. Alelu Ia.