Amosa

7 KUA na ko te Atu ra ko Iehova i te akakite anga mai kiaku, e i na, kua anga aia i te au tāpaki i te muatangana o te tupu anga o te ngangaere openga; e i na, ko te ngangaere openga ïa i muri mai i ta te ariki ra kokoti anga.

2 E ope takiri akera te ngangaere o te enua i te keingaia e ratou, kua karanga atura au: E te Atu ra e Iehova, e akakore mai i te ara, te pati atu nei au ia koe: koai oki a Iakoba ka mou ei aia? kua iti oki aia.

3 Kua tataraara iorā Iehova i taua mea ra: Kare ïa e tupu, te tuatua mairā Iehova.

4 Kua na ko maira te Atu ra ko Iehova i te akakite anga mai kiaku nei, e i na, kua kapiki te Atu ra ko Iehova e taumāro ki te ai: e pou iora te moana maata, e kua pou iora tetai motia.

5 Kua karanga atura au, Kua oti ana, e te Atu ra e Iehova, te pati atu nei au ia koe: koai oki a Iakoba ka mou ei aia? kua iti oki aia.

6 Kua tataraara iorā Iehova i taua mea ra, Kare katoa te reira e tupu, te tuatua maira te Atu ra ko Iehova.

7 Kua na ko aia i te akakite anga mai kiaku, e i na, te tu ua maira te Atu ki runga i tetai patu tu tikai; ma te aite akatautau i tona rima.

8 Kua tuatua mairā Iehova kiaku, E Amosa, eaa taau e akara na? Kua karanga atura au, E aite akatautau. Kua tuatua maira te Atu, I na, e tuku au i tetai aite akatautau ki rotopu i toku ra iti tangata ia Iseraela; kare au e aere tapaepae akaou na vao ia ratou.

9 E tanea oki te au ngai teitei i o Isaaka, e te au ngai-tapu o Iseraela, ka pou ïa: e tu oki au e rave i te ngutuare o Ieroboama ki te koke.

10 Ei reirā Amazia, te taunga i Betela, i tono ei i te karere ki te ariki o Iseraela kia Ieroboama na ko atura, Kua kotikoti kupengā Amosa nei ia koe, i rotopu i te ngutuare o Iseraela nei; kare i tika i te enua nei kia akakoromaki i tana katoa ra au tuatua.

11 Te na ko maira oki a Amosa: Ka mate a Ieroboama ki te koke; e e arataki tuikaaia Iseraela mei roto atu i tona uaorai enua.

12 Kua tuatua mairā Amazia kia Amosa: E tera ra Akara e, ka aere, ka rere ke atu koe ki te enua ra o Iuda, ka kaikai ei ki reira, e ei reira ka totou ei.

13 Auraka ra koe e totou akaou i Betela nei, no te mea ko te ngai-tapu teia no te ariki, e ko te kainga teia no te au.

14 Kua karanga aturā Amosa i reira, na ko atura kia Amazia, Kare au i te peroveta; kare katoa oki au i te tamaiti a te peroveta; e tiaki puakatoro ra au, e e akaputuputu sukamino oki:

15 Kua rave mairā Iehova iaku, ka aru aere ei au i te anana ra, e kua tuatua mairā Iehova kiaku, Ka aere, ka totou ki toku au tangata kia Iseraela.

16 E teianei, e akarongo mai koe i te tuatua a Iehova: Te tuatua ra koe, Auraka e totou ia Iseraela; e auraka taau tuatua e topa i te ngutuare o Isaaka:

17 E teianei, te na ko mairā Iehova; E riro to vaine ei akaturi i teianei oire, e to au tamaroa ma to au tamaine, e inga ïa i te koke, e kokotiia to enua ki te tataura, e mate oki koe i te enua viivii: e riro oki Iseraela ei tuikaa mei roto atu i tona enua.