2 Samuela

1 E I MURI ake i te matenga o Saula ra, kia oki mairā Davida mei te tainga o te ngati Amaleka ra, e ka rua akera o Davida rā i te noo anga i Zikelaga;

2 E tae akera ki te rā toru, e i na, te aere maira tetai tangata mei te puakapa mai mei ia Saula ra, ma te kakau ngaengae, e ma te one i runga i tona mimiti: e tae rava maira aia kia Davida ra, kua tipapa iora aia ki raro i te one, tupou iora.

3 Kua tuatua mairā Davida kiaia, Mei ea roa mai koe na? Kua karanga atura aia kiaia, I ora mai nei au mei te puakapa o Iseraela mai.

4 Kua tuatua mairā Davida kiaia I peea tikai? E akakite mai koe kiaku, taku ïa tuatua kia koe. Kua karanga atura aia, Kua ope anake te tangata i te ati i taua tamaki anga ra, e manganui oki tei topa e kua mate rava: e kua mate a Saula ma tana tamaiti ra ko Ionatana.

5 Kua tuatua mairā Davida ki taua tangata ou i tuatua mai kiaia ra, Eaa oki koe i kite ei e, kua mate a Saula e tana tamaiti katoa ko Ionatana?

6 Kua karanga atura taua tangata ou i tuatua kiaia ra, Iaku oki i aere ua atu ki runga i taua maunga ra ko Gilaboa, i na, te irinaki ua rā Saula ki runga i tana korare; e i na, te aru rava maira te au kariota e te aronga akaoro oroenua i vaitata iaia.

7 E kia akara mai aia ki muri, kite maira aia iaku, e kua kapiki maira kiaku. Kua karanga atura au, Teia au.

8 Kua tuatua maira aia kiaku, Koai oki koe na? Kua karanga atura au kiaia, E ngati Amaleka au.

9 Kua tuatua maira aia kiaku, Teia taku tuatua kia koe, e tu ua mai koe ki runga iaku nei, e ta mai iaku: kua rokoia io nei au e te mamae, no te mea te vai tikai nei rai toku ora i roto iaku nei.

10 Kua tu ua atura au ki runga iaia, e ta atura iaia, no te mea kua kite au e kore aia e ora tei inga aia ra: e kua rave iora au i te korona i rungao i tona mimiti, e nga tapeka i tona rima, e kua apai mai i te reira i ku nei ki toku pu nei.

11 Kua rave iorā Davida i ona kakau, kua aeae iora: e kua pera katoa te au tangata ravarai iaia ra.

12 Kua tangi iora ratou, e kua aue iora, kua akakore iora i te kai e aiai ua atura, ia Saula, e i tana tamaiti ia Ionatana, e te au tangata no Iehova, e te ngutuare no Iseraela; no te mea kua inga ratou i te koke.

13 Kua tuatua mairā Davida ki taua tangata ou i tuatua mai kiaia ra, Noea koe na? Kua karanga atura aia, E tamaiti au na tetai tangata ke, e ngati Amaleka.

14 Kua tuatua mairā Davida kiaia, Eaa oki koe i kore ei i mataku kia akatika i to rima e ta i ta Iehova tangata i akatainu ra?

15 Kua tuatua mairā Davida ki tetai i taua au tangata ou ra, kua na ko maira, Ka aere i vaitata, ka ta. Kua ta iora aia iaia e mate rava akera.

16 Kua tuatua mairā Davida kiaia, Ei runga ia koe uaorai toou ra toto, na toou uaorai vaa i akaapa ia koe, ko koe i karanga ra e, I ta ana au i ta Iehova tangata i akatainu ra.

17 Kua aue iorā Davida ia Saula, e i tana tamaiti ia Ionatana, i teianei aue anga:

18 (E kua akaue aia kia apiiia atu te peʼe i te ana ki te tamariki a Iuda; i na, kua tataia ki roto i te buka a Iasera:)

19 Te manea o Iseraela i taia ki runga i to au ngai teitei e! aue ïa aronga ririnui i inga e!

20 Auraka e karangaia i Gata; aua e akakite aere i te au arataa i Asekalona, ko te rekareka aea te au tamaine a te Philiseti! ko te akapaapaa aea te au tamaine a te aronga peritome koreia ra!

21 Ko kotou, e te au maunga e Gilaboa e, auraka rava ei au, e te ua, i runga ia kotou, e te au kainga i raukaʼi te au atinga: no te mea kua akaruke kino ravaia te paruru o te aronga ririnui i reira, te paruru o Saula, mei te mea e, kare aia i akatainuia ki te manongi!

22 Mei te toto mai o te aronga i taia ra, mei te tongaua mai o te aronga mana ra, kare te ana a Ionatana i tāpuia, kare oki te koke a Saula i akaoki puapinga kore uaia mai.

23 Ko Saula raua ko Ionatana, kua mataora raua e te taurekareka i to raua ora anga, kare oki i tataka ke i to raua matenga: viviki maata to raua i to te aeto ra; e ririnui maata to raua i to te liona.

24 E te au tamaine a Iseraela, ka aue kotou ia Saula, ko tei akakakau ia kotou ki te kakau muramura, e te au memeitaki, ko tei tuku i te akamanea auro ki runga i to kotou kakau.

25 Aue i te inga o te aronga toa i rotopu i te tamaki anga e! Aue koe, e Ionatana, i taia i runga i toou uaorai au ngai teitei!

26 E tumatetenga toku ia koe, e taku taeake e Ionatana e! e mataora maata toku ia koe: e anoano maata roa toou iaku, e anoano maata ïa i to te vaine!

27 Aue i te inga o te aronga toa e! e te taoonga tamaki i akarukeia ra!