Genese

47 KUA aere mairā Iosepha kua akakite maira kia Pharao, na ko maira, Tera mai toku metua tane, e toku au tuakana, e ta ratou au mamoe, e ta ratou au puakatoro, e te apinga ravarai na ratou, mei te enua mai mei Kanaana; e i na, tei te enua mai nei ratou tei Gosena.

2 E kua arataki aia i e toko rima i taua au tuakana nona ra, e tuku atura ki mua i te aroaro o Pharao.

3 Kua tuatua mairā Pharao ki taua au tuakana nona ra, Eaa ta kotou taoonga? Kua karanga atura ratou kia Pharao, E tikai mamoe anake to au tavini nei, ko matou, e to matou ai metua katoa.

4 E kua karanga rai oki ratou kia Pharao, I aere mai matou e noo i te enua nei; kare roa oki e kai na te au mamoe a toou au tavini nei; e onge maata roa oki tei te enua ra tei Kanaana: e teianei, e akatika mai koe, kia noo to au tavini i te enua akera i Gosena.

5 E kua tuatua akerā Pharao kia Iosepha, na ko akera, Teia mai nei toou metua tane e toou ai tuakana, i aere mai ratou ki ko nei kia koe nei:

6 Terao te enua ko Aiphiti tei mua i to aroaro na; ei te ngai meitaki ra koe akanoo ei i toou metua tane e toou ai tuakana, ei te enua ei Gosena ratou noo ei: e te kite ra koe i te tangata maroiroi i roto ia ratou ra, e akariro i te reira ei tiaki i te au puaka naku nei.

7 Kua arataki aturā Iosepha i tona metua tane ra ia Iakoba ki roto, kua tuku atura ki mua i te aroaro o Pharao. Kua akaora aturā Iakoba ia Pharao.

8 Kua tuatua mairā Pharao kia Iakoba, Kaia akenei oou rā i toou au mataiti i te ao nei?

9 Kua karanga aturā Iakoba kia Pharao, I toku nei au rā i toku au mataiti i te tuitarere ua anga, okotai akenei anere e toru ngauru i te mataiti: e au rā poto oki toku, e te kino i toku nei au mataiti i te ora anga nei, kare i taea to toku ai metua ra au rā i to ratou ra au mataiti i te tuitarere anga ratou i te ao nei.

10 Kua akaorā atura Iakoba ia Pharao, e kua aere maira ki vao mei mua mai i te aroaro o Pharao.

11 Kua akanoo iorā Iosepha i tona metua tane, e tona au tuakana, e oronga atura i te tapere no ratou i taua enua ra i Aiphiti, i te ngai meitaki ra, i te enua ra ko Ramese, i ta Pharao oki i akaue maira.

12 Kua angai aturā Iosepha i tona metua tane e tona ai tuakana, e te ngutuare katoa o tona metua, ki te kai, i tei tau i to ratou au kopu-tangata.

13 E kare rava atura e kai i taua enua katoa ra; kua onge kino roa oki, e tumatetenga maata to taua enua ra to Aiphiti, e to te enua ra to Kanaana i te onge.

14 Uipa marie maira te moni katoa no taua enua ra no Aiphiti, e to te enua ra to Kanaana, kia Iosepha, i te sitona ta ratou i oko maira: e kua apai aturā Iosepha i taua moni ra ki roto i te are o Pharao ra.

15 E kore akera oki te moni i taua enua ra i Aiphiti, e i te enua ra i Kanaana, kua aere maira to Aiphiti katoa kia Iosepha ra, kua tuatua maira, O mai te kai na matou: eaa oki matou kia mate ki mua i to aroaro na? kua kore takiri oki te moni.

16 Kua karanga aturā Iosepha, O mai ta kotou au puaka, e naku e o atu i ta kotou ei oko i ta kotou au puaka, kua pou oki te moni.

17 Kua taki maira ratou i ta ratou au puaka kia Iosepha ra: e kua apai aturā Iosepha ra: e kua apai aturā Iosepha i te kai na ratou ei oko i te au oro-enua, e te au mamoe, e te au puakatoro, e te au asini: ei kai tana e tuku atu na ratou i te reira mataiti, ei oko i ta ratou au puaka ravarai.

18 E ope akera te reira mataiti, e tae akera ki tetai mataiti, kua aere maira ratou kiaia ra, kua tuatua maira, Kare matou e uuna ia koe, e to matou pu e, kua pou te moni; e tena atu na oki te au puaka tei to matou pu; kare takiri e mea toe i teianei, ki mua i te aroaro o taku pu, mari ra ko matou uaorai, e to matou nei enua:

19 Eaa oki matou kia mate ki mua i to aroaro na, ko matou e to matou enua katoa? E oko mai koe ia matou nei e to matou enua ei oko kai, e kia riro atu matou e to matou enua katoa ei tavini no Pharao: o mai ana i te ua, kia ora matou, auraka kia mate; e auraka kia vai tanea ua te enua.

20 Oko na rava akera taua enua katoa ra ko Aiphiti ia Iosepha na Pharao; kua oko maira oki to Aiphiti, ko te tangata ko tona kainga, ko te tangata ko tona kainga, no te mea, kua ririnui taua onge ra ki runga ia ratou: riro takiri atura te enua kia Pharao.

21 Kua apai atura aia i te tangata ravarai ki te au oire, mei tetai matamata o nga kotinga o Aiphiti, e tae ua atu ki tetai matamata o te reira.

22 Mari ra, ko to te aronga taunga au kainga, tei kore i okoia e ia; e tuanga oki ta te aronga taunga ra na Pharao, ko ta ratou ïa kai ko taua tuanga i omaiia mai e Pharao ra; i kare ei ratou i oko i to ratou ra au kainga.

23 Kua karanga aturā Iosepha ki taua au tangata ra, I na, kua okoia kotou e au i teianei rā, e to kotou enua, no Pharao: teia te ua na kotou, ei ruru anga na kotou i taua enua ra.

24 Kia ua ra, e apai ma ï kotou i te rima o te tuanga na Pharao: ko e a tuanga ra, na kotou uaorai ïa, ei ua kia ruru ki runga i te kainga ra, e ei kai oki na kotou, e to kotou au ngutuare, e ei kai na ta kotou au tamariki mea riki.

25 Kua tuatua maira ratou, Naau matou i akaora io nei: kia kite aroaia mai matou e to matou pu, e ei tavini matou no Pharao.

26 Kua akariro atura oki a Iosepha i te reira ei ture, e tae ua mai ki teianei rā, i te enua ra i Aiphiti, e na Pharao te rima o te tuanga; mari ra to te au kainga o te aronga taunga ra, kare ïa te reira i riro kia Pharao ra.

27 Noo mairā Iseraela i te enua ra i Aiphiti, i te motia ra ko Gosena; e ei kainga to ratou i reira, tupu atura oki ratou i te maata anga, e maata rava atura.

28 Okotai ngauru ma itu to Iakoba mataiti i te ora anga i te enua ra i Aiphiti: e to Iakoba au mataiti i te ao nei, okotai ïa anere, e a ngauru, e itu ara.

29 E vaitata akera te au rā e mate ei a Iseraela: kua tiki atura aia i tana tamaiti ra ia Iosepha, karanga atura kiaia, Te kite aroaia maira au e koe i tenana, e tuku mai koe i toou rima ki raro ake i toku uā, e takinga-meitaki mai koe, e ei tuatua-mou taau iaku nei. Teia taku tuatua kia koe, auraka koe e tanu iaku i Aiphiti nei:

30 Kia okotai akerai oku vairanga e toku au metua katoa ra, e e apai ke koe iaku i Aiphiti nei, ka tanu ei iaku i to ratou tanumanga. Kua tuatua maira aia, Naku ïa e rave i taau i tuatua mai na.

31 Kua karanga atura aia, Ka taputou mai ana. Kua taputou akera aia. E kua piko iorā Iseraela ki raro, ki rungao i te pou roi ra.