Zekaria
4 E KUA oki maira taua angela i tuatua mai iaku ra, e kua akaara maira iaku, mei te tangata i akaaraia i tana moe.
2 E kua tuatua maira aia kiaku, Eaa taau e akara na? E kua karanga atura au, I akara na au, e i na, e vairanga lamepa, e auro anake, ma to reira kapu i rungao, e tona oki puke lamepa e itu i rungao, e nga akataʼe anga e itu i aua nga lamepa ra i runga roa iora.
3 E nga olive e rua i te pae iora, okotai i te pae katau i taua kapu ra, e tei te pae kaui tetai.
4 E kua oki au kua tuatua atura ki te angela i tuatua mai iaku ra, na ko atura, Eaa teia, e taku atu?
5 E kua tuatua maira taua angela i tuatua mai iaku ra, na ko maira kiaku, Kare koe i kite i teianei au mea? E kua karanga atura au, Kare, e taku atu.
6 E kua āē maira aia e kua tuatua mai kiaku, na ko maira, Teia te tuatua a Iehova kia Zerubabela, te na ko maira: Kare i te ririnui, kare rai i te mana, na taku Vaerua ra, te tuatua mairā Iehova Sabaota ra.
7 Eaa koe, e tenana maunga maata? Ki mua i te aroaro o Zerubabela e riro ïa koe ei ngai marena ua; e nana e apai mai i te toka tiavā ma te maeva, Ko te aroa, te aroa, tei te reira.
8 Kua tae maira oki te tuatua a Iehova kiaku nei, na ko maira,
9 Ko te rima o Zerubabela tei akamou i te pange o teianei are; e na tona rima rai e akaoti; e kite oki kotou e na Iehova Sabaota i tono iaku kia kotou na.
10 Koai tei akavaavaa i te rā o te au mea rikiriki ra? kua rekareka oki nga mata e itu o Iehova tei oro atu e oki mai e pini ua ake te enua katoa nei, kia kite ratou i te toka aite i te rima o Zerubabela.
11 E kua oki au, kua karanga atura kiaia, Eaa teianei puke olive e rua i te pae katau o te vairanga lamepa, e te pae kaui katoa ra?
12 E kua karanga akaou atura au, na ko atura kiaia, Eaa nga rara e rua o nga olive ra, ko tei riringi mai i te mori auro na roto i nga akataʼeanga auro e rua ra, no roto ia raua uaorai?
13 E kua tuatua maira aia kiaku, na ko maira, Kare koe i kite i teia? Kua karanga atura au, Kare, e taku atu.
14 Kua tuatua maira aia i reira, Ko nga tangata toko rua teia i akatainuia ra, ko tei tu ki mua i te aroaro o te Atua o te ao katoa nei.