Maseli

26 MEI te kiona i te tuatau akaū ra, e mei te ua i te mou ra, koia katoa te ngateitei kare e tau i te neneva ra.

2 Mei te manu e rere aere ua ra, mei te kopekapeka e okioki ua mairai, koia te tao ara kore ra kare e tae ua mai.

3 Ko te pāpāanga, no te oroenua ïa; te tavaa, no te asini ïa; ko te rakau ra, no te tua ïa o te neneva ra.

4 Auraka e akatau katoa atu i taau tuatua ki te neneva ra i tana ra tuatua neneva, ko te riro katoa atu aea koe mei iaia katoa te tu.

5 E akatau katoa atu i taau tuatua ki te neneva ra i taua ra tuatua neneva, ko te riro aea aia ei tangata pakari i tona ra manako anga.

6 Ko tei tono i te neneva ei apai i tana tuatua, e tau ia i tei kotikoti i tana uaorai vaevae, e pekapeka maata tona.

7 Mei te vaevae o te pirikoki e paruparu ra, koia katoa te maseli i te vaa o te neneva ra.

8 Mei te tangata e ri piri i te toka ki roto i te kapu maka ra, koia katoa te tangata e akangateitei atu i te neneva.

9 Mei te rakau taratara i te rima o te konā kava ra, koia katoa te maseli i te vaa o te aronga neneva ra.

10 Na Tei maata, tei anga i te au mea katoa, nana oki i tutaki i te neneva, e nana rai i tutaki i te aronga tareva ke.

11 Mei te puaka-aoa e oki ki tona ra ruaki, koia katoa te neneva e oki rai ki tana tuatua neneva.

12 Te akara ra koe i te tangata i pakari i tona uaorai manako anga? e manakonako anga ake to te neneva i tona.

13 Te na ko maira te tangata akatau, E liona tei te arataa akera; e liona taae tei te ara metua.

14 Mei te pa e takataka ua ki runga i tona ra inere, te pera katoa ra te tangata akatau ki runga i tona ra roi.

15 E tuku te tangata akatau i tona rima ki roto i te kapu, e mea roiroi ra nana kia apai i taua rima ra ki te vaa.

16 E pakari maata to te tangata moe ua ra i tona uaorai manako anga, i nga tangata katoa toko itu tei tika ia ratou te tuatua meitaki ra.

17 Mei tei opu ua i te taringa o te puaka-aoa ra, koia tei tapae ua atu ki ta tetai ke ra karo anga.

18 Mei te tangata neneva ra, peî aere ei te komotu ai, e te kakao e mate ei ra:

19 Koia te tangata i pikikaa i tona ra tangata tupu ka tuatua atu ei e, Kare ainei taku i te takatakata?

20 Kare e vaie ra, e mate ïa ai: e kare oki e taoi tuatua ra, e kore katoa te karo.

21 Mei te vaie ki runga i te ngarau ka ra, e mei te rakau ki runga i te ai; koia katoa te tangata māro ra, kia akatupu i te karo ra.

22 E kai venevene ïa te tuatua a te monomono korero; aere rava atura ki raro roa i te kopu ra.

23 Mei te ota ario i tukuia ki runga i te āriki karakaraea ra, koia te vaa koperepere, e te ngakau kino.

24 Ko tei riri ra, te pikikaa ra ïa tona vaa, e te vaoo ra i te pikikaa ki roto iaia;

25 Kia tuatua meitaki mai i tana tuatua, auraka e akarongo atu; te vai ra oki ki roto i tona ngakau e itu tuatua viivii.

26 Ko tei tapoki i te riri i te pikikaa, e akakite puia tona kino ki mua i te uipa anga katoa.

27 Ko tei ko i te vaarua ra, koia uaorai te ka topa ki roto: e oki mai oki te toka ki runga i te tangata i akataka ra.

28 E makitakita te arero pikikaa ki te aronga i takinga-kinoia e ia ra, e ko te mate te tupu i te vaa koperepere ua ra.