Ieremia

5 KA ORO ana kotou na roto i te au arataa o Ierusalema nei, ka akaraʼi i tenana kia kite, ka kimi oki i tona au ngai atea ra, peneiake ko te kitea ia kotou te tangata e okotai ua ake, tei rave i te tuatua-tau, ko tei kimi i te tuatua-mou; e naku e akakore i tana ara.

2 Tuatua ua rai ratou e, Te ora rā Iehova, e taputou pikikaa rai ta ratou.

3 E Iehova e, kare ainei to mata tei runga i te tuatua-mou? kua pāpā akenei koe ia ratou, kare ra ratou i aue; kua akapou koe ia ratou, kare ra i tika ia ratou kia āriki mai i te ako: kua akamāro keta ua ratou i to ratou mata e ngari ake te mato; kare i tika ia ratou i te oki mai.

4 I karanga akera au e, Koia tika rai, e aronga ao ratou; e kua nenevaia; i kore ei i kite i te arataa o Iehova, e te tuatua-tau a to ratou Atua.

5 E aere au ki te au tangata nunui, ka tuatua au kia ratou; kua kite ïa ratou i te arataa o Iehova, te tuatua-tau a to ratou Atua: kua aati ratou ravarai ra i te zugo, kua motu ia ratou te au taura tapeka.

6 E teianei ka mate ratou i te liona no te vaorakau; e pou ratou i te luko aiai; e na tetai nemera e tapapa i to ratou au oire: te tangata katoa e tomo ki vao ra, e aeae uaia ïa: no te mea kua manganui ua atura ta ratou tareva ke anga, e kua akamaataia to ratou kotoe anga ki muri.

7 Eaa e tikaʼi iaku kia akakore i taua ara naau nei? kua akaruke taau au tamariki iaku nei, e kua taputou i te au mea ke kare i te Atua ra: iaku oki i angai ia ratou e ki roa akera, kua akaturi atura ratou i reira, e kononinoni iora ki roto i te au are o te au vaine akaturi ra.

8 Kua aite ratou i te popongi ki i te oroenua toa i angaiia ra: i te kimi anga te tangata katoa i te vaine a tona tangata tupu.

9 Auraka ainei au e tutaki atu i teianei au mea? te tuatua mairā Iehova; e auraka ainei toku vaerua e akaoko atu i te enua mei teia te tu?

10 E kake kotou na runga i tona au koro e akapou; auraka ra e akaope rava; e apai ke atu i tona au rara, no te mea, kare ïa i ta Iehova.

11 E ravenga pikikaa maata oki ta raua katoa kiaku nei, raua ko te ngutuare o Iseraela, e o Iuda katoa; te tuatua mairā Iehova.

12 Kua uuna akenei ratou ia Iehova, i te na ko anga e, Kare ïa aia; kare oki tatou e rokoia e te kino, kare rai oki tatou nei e kite i te koke ma te onge:

13 E riro ra te au peroveta ei matangi ua, e kare e tuatua o roto ia ratou; ka akaperaia oki ratou uaorai.

14 I na ko mai ei te Atua Sabaota ra ko Iehova, No te mea kua pera mai ta kotou tuatua, i na, e akariro au i taku tuatua i roto i toou vaa na ei ai, e teianei au tangata ei vaie, ka pou oki ratou i te reira.

15 I na, te arataki mai nei au i tetai enua mamao ei rave ia kotou, e te ngutuare o Iseraela, te tuatua mairā Iehova; e enua ririnui, e enua taito; e enua kare koe e kite i tona reo, e kare koe e rongo i ta ratou me tuatua mai.

16 Mei te vaarua turuma amama ua ra to ratou pia kakao, e tangata ririnui anake ratou.

17 E pou ia ratou taau mou, e taau manga, te ka kainga tikaia e to au tamaroa e to au tamaine: e pou ia ratou taau au anana mamoe, e taau au anana puakatoro: e pou ia ratou taau au vine, e taau au suke: e pou ia ratou toou oire akaketaketaia ra, taau e irinaki na, i te koke.

18 Kareka i taua au rā ra, te tuatua mairā Iehova, kare au e akaope takiri ia kotou.

19 E riro oki me tuatua mai kotou e, No te aa i pera mai ei to tatou Atua ra ko Iehova ia tatou nei? ei reira koe ka karanga atu ei kia ratou ra, Mei ia kotou i akaruke mai iaku ra, e kua akamori i te au atua ke i to kotou uaorai enua, e pera rai kotou i te tavini anga i te tanga a ke ke i tetai enua kare to kotou uaorai.

20 E akakite kotou i teia i te ngutuare o Iakoba, e tutu aere oki i Iuda ra, i te na ko anga e,

21 E akarongo mai ana kotou i teia, e te iti-tangata neneva e, e te kite kore; e mata to ratou, kare ra e akara: e taringa to ratou, kare ra e akarongo mai:

22 Te tuatua mairā Iehova, Kare ainei kotou e mataku mai iaku nei? kare ainei kotou e ruketekete ki mua i toku aroaro? ko tei akono i te one ei kotinga no te tai, i te akonoanga mutu kore, e kare aia e na runga i te reira: atuatu ua maira te au ngaru, kare rai e rauka; aruru ua maira ratou, kare ra ratou e na rungao i te reira.

23 Kareka teianei au tangata, e ngakau akatitima, e te meameaau to ratou; kua akatitima ratou, e kua aere ke.

24 Kare oki ratou e tuatua ma to ratou ngakau, Tatou ka mataku i to tatou Atua ra ia Iehova i tenana, ko tei oronga mai i te ua no tatou i tona tuatau; ko te ua mua, e te ua openga ra: te au ebedoma akaū i akonoia ra, ko tana ïa i vaoo no tatou.

25 Kua ariu keia ra taua au mea ra e to kotou au kino, e no ta kotou ra au ara i tāpuiaʼi te meitaki ia kotou.

26 Kua kitea atura oki te aronga kikino i rotopu i toku iti-tangata: ko tei moetapapa marie mei tei tuku i te ereere ra; te akamoe ra ratou i te ere, te opu ra ratou i te tangata.

27 Mei te paata i ki i te manu ra, kua ki katoa to ratou au are i te pikikaa: i riro ei ratou ei aronga nunui, e te apinga maata;

28 Kua poria ratou, kua inuinu: koia ïa, (kua topa ke ratou i te au mea kino:) kare ra ratou i akatika i te tuatua, te tuatua a te matiroeroe, e te manuia rai ta ratou; kare ra te tuatua-tika a te aronga apinga kore i akatikaia e ratou.

29 Auraka ainei au e tutaki atu i teianei au mea? te tuatua mairā Iehova; kare ainei toku vaerua e akaoko atu i te enua mei teia te tu?

30 E mea vavaranga e te rikarika tei raveia i te enua nei;

31 Kua totou pikikaa te au peroveta; e i ta ratou e tutaraʼi te kau taunga; e mea inangaro oki na toku iti-tangata kia pera: e akapeea ra kotou kia tae ki te openga ra?