Koheleta

1 TE au tuatua a te Orometua ra, a te tamaiti a Davida, te ariki i Ierusalema ra.

2 Te tuatua nei te Orometua. E puapinga kore maata teia; e mea puapinga kore maata; e mea puapinga kore anake rai.

3 Eaa ta te tangata nei puapinga i rauka i tana katoa ra au angaanga, tana e tauta ua nei i raro ake i teianei rā?

4 Te kore nei tetai uki, e te kitea maira tetai uki: kareka te enua nei, te vai ua nei rai ïa.

5 Te iti nei oki te rā, e te opu nei rai oki te rā ki raro, e te viviki ra ki te ngai i iti mai ei aia ra:

6 Te tere ua ra te matangi na te pae ki apatonga, e mei reira oki kua oki maira ki te pae ki apatokerau, te orooro akapini aere ua nei rai aia, e mei reira oki kua orooro akapini akaou rai taua matangi ra.

7 Te taʼe nei te au kauvai katoa nei ki roto i te tai; kare ra te tai e maringi ke ua atu; te ngai no reira mai te au kauvai ra, te oki akaou nei ratou ki taua ngai rai.

8 Te au mea katoa e pera ta ratou angaanga i te maata; kare rava e tangata e tikaʼi kia tatau ra; kare oki te mata e iraira i te akara anga atu, kare oki te taringa e ki kia akarongo atu.

9 Eaa taua mea i tupu i muatangana ra, mari ra i teia e tupu akaou nei? Eaa taua mea i raveia ra, mari ra ko teia e rave akaouia nei? Kare rava e mea ou i raro ake i te rā nei.

10 Te vai nei ainei te mea e tikaʼi kia karanga e, Ka akara na, e mea ou teia? kua pera rai taua mea nei i muatangana, i te au tuatau taito ra ou tatou nei.

11 Kare nei ra te maaraanga i te au mea taito ra, kare katoa e maaraanga i te au mea e tupu a muri ake, i te aronga e kitea mai a muri atu.

12 Ko au nei, ko te ariki no Iseraela, i Ierusalema, ko te Orometua ïa.

13 E kua tavaitai marie toku ngakau i te kimi, e te makitoro marie ma te pakari oki, i te au mea katoa i raveia i raro ake i teianei rangi: ko taua angaanga kino nei teia i o maiia mai e te Atua i te au tamariki a te tangata nei, kia roiroi ratou i te rave anga.

14 Kua maaraia e au te au angaanga katoa i raveia i raro ake i te rā nei; e i na, e mea puapinga kore anake, e mei te mea e te kai ra i te matangi.

15 Ko tei aupeupe ra, kare ïa e rauka i te akatika: kare oki tei kore ra e tika kia tatau.

16 Kua karangaranga ana au i taku ngakau, e kua na ko iora, I na, kua akamaataia au, e kua topa iaku i te pakari te aronga katoa i na mua iaku i te noo ki Ierusalema; e maata oki te pakari e te kite i rauka i toku ngakau.

17 Kua tavaitai marie oki au i toku ngakau kia kite i te pakari, e kia kite oki i ta te neneva e te auouo: e kite iora oki au i te reira e, te kai ra i te matangi.

18 Te maata ra oki te pakari, te maata katoa ra te manamanata, e ko tei akamaata i tona kite ra, kua akamaata ïa i te aue.