2 Ariki

3 E TAE akera ki te ngauru ma varu o te mataiti o te ariki o Iuda ra o Iehosaphata, i ariki ei a Iehorama te tamaiti a Ahaba ra ki runga ia Iseraela i Samaria; e okotai ngauru ma rua ona mataiti i te ariki anga.

2 Kua rave oki aia i te kino i mua i te aroaro o Iehova; kare ra i aiteite ki tona metua tane e tona metua vaine: kua akaruke oki aia i te tiki ra ia Baala i angaia e tona ra metua tane.

3 Kua piri ra aia ki te au ara a Ieroboama te tamaiti a Nebata, i ara ai Iseraela; kare ïa aia i akaruke i te reira.

4 Kua akau maira te ariki o Moabi ko Mesa, ko tei angai i te puaka i te apinga uipa na te ariki o Iseraela, okotai oki anere i te tausani anga i te punua mamoe, okotai anere oki i te tausani i te mamoe toa, e te uru katoa ra.

5 Kia mate rā Ahaba, kua kai tamaki iora te ariki o Moabi i te ariki o Iseraela.

6 Kua aere iora taua ariki ra ko Iehorama ki vao mai i Samaria i te reira tuatau, e kua akaputuputu iora ia Iseraela katoatoa.

7 Aere akera aia e kua tono i te veka ki te ariki o Iuda kia Iehosaphata, karanga atura, Kua kaitamaki io nei te ariki o Moabi iaku nei; e tae katoa aina koe kia aere taua e tamaki ia Moabi? Kua tuatua maira aia, Ka tae ïa au: kua tau au ia koe, kua tau toku au tangata ki toou ra au tangata, kua tau taku au oroenua ki taua ra au oroenua.

8 Kua karanga atura aia, E naea tatou kia aere? Kua tuatua maira aia, E na te medebara i Edoma ra.

9 Riro atura te ariki o Iseraela, e te ariki o Iuda, e te ariki o Edoma, kua aere takanimo ua ra e po itu; kare oki e vai na te nuku, e na te au puaka e aere katoa ra.

10 Kua tuatua akera te ariki o Iseraela, Aue! kua akaputuputu mai a Iehova i eianei puke ariki toko toru, e tuku atu ia ratou ki roto i te rima o Moabi e!

11 Kua tuatua akerā Iehosaphata, Kare ainei e peroveta na Iehova i ko nei, kia ui tatou i ta Iehova iaia ra? Kua tuatua maira tetai tavini o te ariki o Iseraela, na ko maira, Teia oki a Elisaia te tamaiti a Saphata, ko tei riringi i te vai ki runga i te rima o Elia ra.

12 Kua tuatua mairā Iehosaphata, Tei iaia te tuatua a Iehova. Kua aere iora te ariki o Iseraela, e Iehosaphata, e te ariki o Edoma, ki raro kiaia ra.

13 E kua karanga aturā Elisaia ki te ariki o Iseraela, Eaa taku kia koe? e aere koe ki te au peroveta a to metua tane ra, e te au peroveta a to metua vaine. E kua tuatua maira te ariki o Iseraela kiaia, Eiaa; kua akaputuputu mai a Iehova i eianei puke ariki toko toru nei, e tuku ia ratou ki roto i te rima o Moabi.

14 Kua karanga aturā Elisaia, Te ora rā Iehova Sabaota ra, taku e tu ua ki mua iaia ra, no te mea i akono au i te aroaro o te ariki o Iuda ia Iehosaphata, naringa kare, kare au e akara atu kia koe, kare e akono ua atu ia koe.

15 E tenana, e arataki maira i tetai akatangi kinura. E te akatangi ra taua akatangi kinura ra, tei runga maira te rima o Iehova iaia.

16 Kua tuatua maira aia, te na ko mairā Iehova, E akaruarua aere ana i teianei o.

17 Te na ko mairā oki a Iehova, Kare kotou e kite i te matangi, kare oki kotou e kite i te ua; ka ki ra tera ra o ki te vai, kia inu kotou, e ta kotou au puaka, e te au puakatoro katoa na kotou.

18 E mea māmā oki te reira i mua i te mata o Iehova; ka tuku katoa mai aia i to Moabi ki to kotou rima.

19 Ka ope rava oki te au oire i patuia i te taia e kotou, e te au oire katoa i inangaroia ra, ka ope oki te au rakau memeitaki i te tipuia e kotou, ka ope oki te au ruavai i te popaniia, e te au kainga meitaki ra oki, ka kino ia kotou ki te toka.

20 E ao akera e apaiiaʼi te atinga kai, e i na, te taʼe maira te vai na te ara mei Edoma mai, ki rava akera te enua ki te vai.

21 E kite akera to Moabi katoa e kua tae mai te au ariki e tamaki ia ratou, kua akaputuputu iora ratou, e te aronga katoa e tika kia rakei ki te taoonga tamaki, e tei pakari atu, e kua tu ua iora ratou i te kotinga o to ratou enua.

22 Kua tu akera ratou i te popongi rava, te kakā maira te rā ki runga i taua vai ra, te kite ua ra to Moabi i taua vai ra i tetai pae, kua muramura mei te toto ra:

23 Kua tuatua akera ratou, E toto teia: kua ope te au ariki i te mate, kua ta ratou ia ratou uaorai: e tenana, e Moabi, ei te noni i te apinga.

24 E tae atura ratou ki te puakapa o Iseraela, kua tu maira to Iseraela, kua ta maira i to Moabi, ati atura ratou i mua ia ratou: te ta aere ua ratou i to Moabi e tae ua atura ki to ratou uaorai enua.

25 Ngaangaa atura te au oire ia ratou, e te au kainga memeitaki katoa ra, kua titiri te tangata ravarai i te toka ki rungao, tanao, tanao, e ki atura; e kua akakiia te au ruavai katoa e te au rakau memeitaki, kua pou ïa i te tipuia: te au toka ra o Kiri-areta tei toe; akapiniia akera e te aronga maka e pou iora.

26 Kite akera te ariki o Moabi e tamaki ririnui, kua rave iora aia i te au tangata e koke te taoonga e itu anere, e tipu aere e tae ua atu ki te ariki o Edoma, kare akerai i tika.

27 Kua rave akera aia i te tama mua nana uaorai, ko te tupau tika mai iaia i te au ra, kua apai atura iaia ei atinga karakaratio ki runga i te patu ra. Otooto rava akera te riri ia Iseraela; akaruke maira ratou iaia, oki atura ki to ratou uaorai enua.