1 Samuela

9 TE noo ra tetai tangata ngati Beniamina, ko Kisa te ingoa, e tamaiti na Abiela, te tamaiti na Zerora, te tamaiti na Bekorata, te tamaiti na Aphia, e ngati Beniamina, e tangata apinga maata.

2 E tamaiti tana, ko Saula te ingoa, e tangata tau tikai, e te meitaki: kare e tangata e aite iaia i o te tamariki a Iseraela i te meitaki: ko tona pakuivi e runga akera ko tona ïa ngai i teitei i te au tangata ravarai.

3 Kua ngaro te au asini a te metua o Saula a Kisa. Kua karanga aturā Kisa ki tana tamaiti kia Saula, E tu koe, e aere, e kimi i te au asini, e arataki katoa atu i tetai o te au tavini nei.

4 Aere atura aia na te maunga ra ko Epheraima, e na te tapere ra ko Salisa, kare i kitea atu e raua: mei reira kua aere iora raua na te tapere ra ko Salima, e kare oki i reira: e kua aere aia na te tapere o te ngati Beniamina, e kare i kitea e raua.

5 E tae atura raua ki te tapere ra ko Zuphe, kua karanga aturā Saula ki tona tavini ra i aere katoa raua ra, Aere mai taua e oki; ko te kore aea taku metua i te manako i te asini, e kua eumiumi aia ia taua nei.

6 Kua karanga atura aia kiaia, I na, tei teianei oire tetai tangata no te Atua, e tangata akangateiteiia taua tangata ra; ko tana katoa i tuatua ra e tupu tika rai ïa: e aere taua ki reira; peneiake ko te akakite mai aia i to taua arataa kia aere na reira.

7 Kua karanga aturā Saula ki taua tavini nona ra, Eaa ra ta taua e apai atu na taua tangata ra, me aere taua? e kua pou oki te kai i ta taua puke kete, kare a taua e taoonga-rima kia apai na taua tangata o te Atua ra: eaa ta taua puapinga?

8 Kua tuatua mairai taua tavini ra kia Saula, na ko maira, Teia tetai kuata sekela ario tei iaku nei; ko taku ïa e apai na taua tangata o te Atua ra, kia akakite mai aia kia taua i to taua arataa.

9 I muatangana ra, kia aere to Iseraela e ui i te tuatua ki te Atua ra, e pera ïa te tuatua e Taki aere tatou ki te akara akera: e akara oki to te peroveta nei ingoa i muatangana ra.

10 Kua karanga aturā Saula ki taua tavini nona ra, E tuatua meitaki tena; e aere taua. Aere atura raua ki taua oire i nooia e taua tangata no te Atua ra.

11 Te aere ra raua na runga i te tuaivi ki taua oire ra, kite atura raua i e tokotai puke tamaine te aere ra e uti i te vai, kua karanga atura raua kia ratou, Tei ko nei aina te akara?

12 Kua tuatua maira ratou kia raua, na ko maira, Teia ïa: tei mua atu ïa ia korua: ka aere viviki, i aere mai oki aia ki te oire i teianei rā; no te mea e atinga ta te au tangata i teianei rā ki runga i te ngai teitei ra:

13 Kia tae tikai korua ki roto i te oire ra, kare aia e riro ki runga i te ngai teitei e kaikai ra, e kite atu ei korua iaia; kia tae mai oki aia ka kai ei te aū tangata, no te mea koia tei akameitaki i te Atua i te atinga ra ka kai ei te aronga i tuatuaia ra i muri ake: e tenana ka aere ki runga, akonei korua ka kite atu ei iaia.

14 Aere atura raua ki runga ki roto i taua oire ra; e tae atura raua ki roto i te oire, i na, kua aravei mairā Samuela ia raua i te aere anga ki runga ki taua ngai teitei ra.

15 Kua akakite mai ana rā Iehova ki te taringa o Samuela i te rā i mua ake i taua aerenga mai o Saula ra, na ko maira,

16 Penei apopo ka tono mai ei au i tetai tangata no ko i te tapere o Beniamina ki ko nei kia koe nei, e ka akatainu koe iaia ei tutara ki rungao i toku iti-tangata ia Iseraela, kia ora toku au tangata; e kua tae mai to ratou reo kiaku nei.

17 E kite akerā Samuela ia Saula, kua tuatua mairā Iehova kiaia, I na, te tangata taku i karanga atu kia koe na! Koia tena ko te ka tutara ki rungao i toku iti-tangata.

18 Kua aere aturā Saula i vaitata ia Samuela i te ngutupa oire ra, e kua karanga atura, Teia taku tuatua kia koe, e akakite mai koe kiaku i te are o te tangata akara ra.

19 Kua tuatua mairā Samuela kia Saula, na ko maira, Ko au taua akara ra: ka aere na mua iaku ki runga ki te ngai teitei akera; ka kaikai tatou akonei: e apopo, kia akakiteia atu koe e au te au mea katoa i roto i to ngakau na, ka tuku ïa au ia koe kia aere ana.

20 Kareka te au asini naau i ngaro e po toru akenei, auraka to ngakau e maaraara i te reira; kia kitea oki ratou. E naai oki te au mea katoa i anoanoia e Iseraela nei? Kare ainei naau, e na te ngutuare katoa o to metua ra?

21 Kua karanga aturā Saula, na ko atura, Kare ainei au i te ngati Beniamina, no te kopu oki kopu-tangata, kare ainei i te mea iti rava i te au kopu-tangata ravarai i te kopu o Beniamina ra? eaa oki koe i pera mai ei kiaku nei?

22 Kua rave aturā Samuela ia Saula raua ma tona tavini, e kua arataki atura ia raua ki roto i te pia kaingakai ra, e kua akanoo atura ia raua i te nooanga meitaki i roto i te aronga i tuatuaia, e toru ngauru paa taua aronga ra.

23 Kua karanga aturā Samuela ki te taʼu-kai ra, Ka apai mai ana i te manga kai taku i tuku atu kia koe ra, taku i karanga atu kia koe ra e, E vaoo ke ïa i vaitata ia koe na.

24 Kua rave iora taua taʼu-kai ra i te ūā mua, e to runga katoa ra, e kua tuku iora ki mua ia Saula ra. Kua tuatua mairā Samuela, I na, tei mua i to aroaro tei vaooia naau ra; ka kai, i vaooia oki naau tikai, mei te tuatau i karangaʼi au e, Kua tuatuaia e au te au tangata ra. Kai katoa iorā Saula raua ma Samuela i taua rā ra.

25 E kia eke maira ratou ki raro mei runga mai i taua ngai teitei ra ki roto i te oire, kua karangaranga iorā Samuela raua ko Saula ki rungao i te are.

26 Tu akera ratou ki runga i te akirata; e i te popongi metua, kua kapiki mairā Samuela kia Saula i rungao i te are, tuatua maira, Ka tu, kia tuku atu au ia koe kia aere ana. Kua tu akerā Saula ki runga, e kua aere atura aia e Samuela katoa ki vao.

27 E te aere atura ratou ki te openga mai o te oire ra, kua tuatua mairā Samuela kia Saula, Ka tuatua ana i te tavini na, e aere na mua ia taua, (kua aere ua atura aia na mua,) e tu iti poto uao ana ra koe, kia akakite atu au kia koe i te tuatua a te Atua.