Apokalupo

22 KUA akakite maira aia iaku i tetai vai ora, e vai taʼe oki, mei te io te areare, no roto mai i te terono o te Atua e to te Punua-mamoe ra.

2 E tei rotopu i te arataa i taua oire ra, e tei tetai pae vai e tetai pae, ko te rakau ora te tu anga, okotai ngauru ma rua tu o te ua, okotai marama okotai ua anga, e ope rava ake te au marama katoa ra: e te rau o taua rakau ra, ko te rapakau ïa i to te pa enua.

3 E kare rava oki e taumaa i reira: ei reira ra te terono o te Atua e to te Punua-mamoe; e e akamori tona au tavini iaia.

4 E kite ratou i tona mata; e ei runga tona ingoa i to ratou rae.

5 Kare oki o reira po; kare oki e tau te lamepa i reira, e te mārama rā; no te mea ko te Atu ra, ko te Atua, to ratou mārama: e e au rai to ratou e tuatau ua atu.

6 Kua tuatua maira aia kiaku, E tuatua-mou teianei au tuatua e te pikikaa kore; kua tono mai oki te Atu ra ko te Atua o te au peroveta tapu i tana au angela, e akakite ki tona au tavini i te au mea i vaitata i te tupu.

7 I na, te aere vave atu nei au: e ao to te akono i te au tuatua totou i roto i teianei buka.

8 Ko au oki ko Ioane, ko au tei kite, e tei akarongo, i teianei au tuatua. E kite akera oki e akarongo akera au, kua tipapa iora oki au ki raro ki te pae vaevae o te angela, e akamori iaia, i tei akakite mai kiaku i teianei au tuatua.

9 Kua tuatua maira aia kiaku, Auraka koe e akapera, e taeake tavini oki au noou, e no te au taeake i te au peroveta ra, e no te aronga i akono i te tuatua i roto i teianei buka: ko te Atua te akamori.

10 E kua tuatua maira aia kiaku, Auraka e topiriia te tuatua totou i roto i teianei buka: kua vaitata rava oki te tuatau.

11 Te tangata tuatua-tika kore ra, e vaio atu kia vai tika kore ua na: e te viivii ra, e vaio atu kia vai viivii ua na: e te tangata tuatua-tika ra, e vaio atu kia vai tuatua-tika ua na: e tei tapu ra, e vaio atu kia vai tapu ua na.

12 E i na, te aere vave atu nei au; e tei iaku nei taku tutaki; kia apai atu au na te tangata ravarai i tei tau i tana angaanga.

13 Ko au te Alepha e te Omega, te momua e te akaopenga, ko to mua e ko to muri.

14 E ao to te aronga e akono i tana ra au akauenga, kia tau ia ratou kia kai i to runga i te rakau ora, e kia na te au ngutupa ratou i te tomo ki roto i te oire ra.

15 Kareka to vao ra, e kuri ïa, e te purepure, e te akaturi, e te ta tangata, e te akamori idolo, e te aronga katoa e anoano e kua tuatua i te tuatua pikikaa.

16 Ko au ko Iesu, kua tono au i taku angela e akakite ia kotou i roto i te au ekalesia i teianei au tuatua. Ko au te tumu e te uanga o Davida, e te etu popongi kakā ra.

17 E te tuatua nei te Vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.

18 Te akakite pu nei oki au ki te tangata ravarai i kite i te tuatua totou i roto i teianei buka, Kia topiri mai tetai tangata i tetai tuatua ke ki teianei au tuatua, na te Atua e topiri mai kiaia te au mate i tataia ki roto i teianei buka:

19 E kia kiriti ua tetai tangata i tetai tuatua i te au tuatua totou ki roto i teianei buka, na te Atua e kiriti ke atu i tana tuanga i roto i te buka ora, e i roto i te oire tapu, i tataia ki roto i teianei buka.

20 Te na ko maira tei akakite i teianei au tuatua, Tikai, te aere vave atu nei au. Amene. Koia ïa, ka aere mai, e te Atu, e Iesu e.

21 Ei ia kotou ravarai te aroa ua o to tatou Atu ra o Iesu Mesia. Amene.