Apokalupo

5 E AKARA atura au i tetai buka i roto i te rima katau o tei noo ki rungao i taua terono ra, kua tataia ki roto e ki vao, kua topiriia i nga akairo e itu ra.

2 E kite atura au i tetai angela maroiroi i te kapiki ua anga ma te reo maata e, Koai tei tau kia eeu i teianei buka, e kia vavaʼi i nga akairo?

3 Kare rava e tangata i runga i te rangi, kare katoa o te enua, kare katoa o raro ake i te enua, e tikaʼi kia eeu i taua buka nei, ka akara atu ei ki roto.

4 Aue rava akera au, no te mea kare rava e tangata i kitea e tau ei kia eeu i taua buka ra, e kia akara atu ki roto.

5 Kua tuatua maira tetai o te aronga taito ra iaku, Auraka e aue, i na, tei te Liona o te kopu o Iuda, tei te Tumu o Davida, kua riro iaia te eeu i taua buka ra, e te vavaʼi i nga akairo e itu ra.

6 Akara atura au, e i na, tei rotopu i te mareva i te terono e nga mea ora e a ra, i rotopu i te aronga taito ra, tetai Punua-mamoe i te tu anga mei te mea e kua tamateia na, e itu ona tara e itu oki mata, koia oki nga Vaerua o te Atua toko itu, i tono aereia na te ao katoa nei.

7 Kua aere maira aia e kua rave maira i taua buka ra i roto i te rima katau o tei noo i runga i te terono ra.

8 E kia ravea e ia taua buka ra, kua tipapa iora nga mea ora e a ra, e te aronga taito e rua ngauru ma a ra, ki raro i mua i te Punua-mamoe, e kitara anake ta ratou ravarai, e te kapu auro kua ki i te rakau kakara, koia te pure a te aronga tapu ra.

9 Kua imene iora ratou i te imene ou, i te na ko anga e, E tau koe kia rave i te buka e kia vavaʼi i te au akairo ra: i taia na oki koe, e kua oko koe ia matou ei tangata no te Atua i toou uaorai toto, no roto i te au kopu ravarai, e te au reo katoa, e te au iti-tangata katoa, e te pa enua katoa;

10 E kua akariro koe ia matou ei ui ariki e ei kau taunga na to matou Atua: e e riro ia matou te au i teianei ao.

11 Akara atura au, e akarongo atura i te reo o te au angela e manganui e kako rava ake taua terono ra, e te au mea ora ra, e te aronga taito, e to ratou maata anga kia tatau, kua mano tini i te mano anga, e kua tausani i te tausani anga:

12 I te kapiki ua anga ma te reo maata, E tau te Punua-mamoe taia ra e, ei iaia te mana, e te apinga maata, e te pakari, e te ririnui, e te akangateitei, e te kakā, e te akameitaki.

13 E akarongo atura au i to runga katoa i te rangi ra, e to te enua nei, e to raro i te enua, e to te moana, e to roto ia ratou ravarai, i te na ko anga e, Ko te akameitaki, e te akangateitei, e te kakā, e te mana, ei iaia ïa, ei tei noo ki runga i te terono ra, e ei te Punua-mamoe, e tuatatau ua atu.

14 Kua karanga iora nga mea ora e a ra, Amene. Kua tipapa iora te aronga taito ra ki raro, e kua akamori iaia, ko te tika i te ora anga e tuatau ua atu.