Salamo

67 E AROA mai ia matou, e te Atua e, e akameitaki mai ia matou, e akakakā mai oki i to mata ki runga ia matou. Sela.

2 Kia kitea to aerenga i te enua nei, te ora naau ki te au etene katoa ra.

3 Kia akameitaki te au tangata ia koe, e te Atua e! kia akameitaki te tangata katoatoa ia koe!

4 Kia rekareka te au enua, e kia imene i te rekareka; naau oki e akava i te au tangata ma te tuatua-tika, e te au tangata o te enua nei naau e arataki. Sela.

5 Kia akameitaki te au tangata ia koe, e te Atua e, kia akameitaki te tangata katoatoa ia koe.

6 Ei reira e ua maata mai ei te enua, e na te Atua, na to tatou uaorai Atua, e akameitaki mai ia tatou nei!

7 Ka akameitaki mairai te Atua ia tatou nei, e ka riro te au openga katoa o te enua ra i te mataku iaia.