Angaanga

26 KUA tuatua mairā Ageripa kia Paulo, E tuatua ua mai koe i te tuatua ia koe uaorai. Kua akatika ua aturā Paulo i tona rima, kua na ko atura i te tuatua iaia uaorai:

2 E te ariki, e Ageripa, kua meitaki rava au, ko au e tuatua iaku uaorai i teianei rā ki mua i toou aroaro nei, i te au mea katoa i tapepeia mai ei au e te ngati Iuda nei:

3 No te mea, kua kite koe i te au peu ravarai, e te au tuatua katoa, a te ngati Iuda: e teianei, teia taku tuatua kia koe, ka akarongo marie mai koe kiaku.

4 I te tu ra o toku noo anga i te ao nei, mei toku ou anga mairai, i rotopu i to matou uaorai i Ierusalema ra, kua kite te ngati Iuda katoatoa;

5 Ko tei kite mai iaku mei muatangana mai, (naringa ratou e tuatua,) e i noo Pharisea ua ana au, ko te pupu akono tu ke rava ïa i ta tatou tuatua.

6 E teianei no te tapapa i ta te Atua i tuatua mai i to tatou ui tupuna ra, i tu ei au nei ma te akavaia mai:

7 Ta to matou ïa au kopu tino ngauru ma rua i inangaro kia rauka, i akamori uaʼi i te Atua i te po e te ao: no taua tapapa ra, e te ariki, e Ageripa, i tapepeia mai ei au e te ngati Iuda nei.

8 Eaa! te maara na kotou e, e mea tika kore kia akarongo e, e akatu akaou te Atua i tei mate?

9 E manako tika oki toku i roto iaku uaorai i muatangana e, kia maata toku patoi atu i te ingoa o Iesu no Nazareta e tikaʼi.

10 Kua pera oki au i Ierusalema: e manganui to te aronga tapu i topiriia e au ki roto i te are tapekaanga, rauka iora toku rangi i te kau taunga nunui ra; e kia taia ratou, kua akatika katoa atu oki toku reo i te reira.

11 E manganui toku tainga ia ratou i te au sunago katoa, e naku i akamataku atu kia akakino ratou; e no te maata o toku riri ia ratou, takinga-kino atura au ia ratou e tae ua atura ki te oire ke ra.

12 Ko te tere ïa iaku i aere ki Damaseko ra, ma te tuatua e te rangi o te kau taunga nunui ra,

13 E avatea akera, e taku ariki, kite atura au i te mārama no te rangi mai i te mataara, mea ngiti to te rā kakā i te kakā anga mai, e pini rava akera au e te aronga katoa e aere ra.

14 E inga anake iora matou ravarai ki raro i te one, akarongo atura au i tetai reo i te tuatua anga mai kiaku, i te na ko anga mai, i te tuatua Ebera, E Saula, e Saula, eaa koe i takinga-kino mai ei iaku? e mea ravengata naau kia takatakai i te ko.

15 Kua karanga atura au, E te Atu, koai koe? Kua na ko maira aia, Ko au ko Iesu taau i takinga-kino mai nei;

16 Ka tu ra, ka tu ua mai to vaevae ki runga, i akakite ua atu ei oki au kia koe, e akono ia koe ei taunga e ei kite i te au mea katoa taau i kite akenei, e te au mea taku e akakite atu rai kia koe;

17 I te akaora anga ia koe i te au tangata nei, e i te au etene, taku e tono atu ia koe i teianei,

18 Ei akapuera i to ratou mata, e ei akaariu mai ia ratou ki te mārama mei te poiri mai, e mei te au oki o Satani ki te Atua, kia rauka oki ia ratou te akakore anga ara, e tetai tuanga ki roto i te aronga i akatapuia, i te akarongo anga iaku.

19 Kare ua akera au, e te ariki, e Ageripa, i akarongo ngata i taua orama o te rangi ra:

20 Kua akakite atura ra au i to Damaseko i muatangana, e to Ierusalema, e pini ua ake oki Iudea katoa, e i te etene oki e, e tataraara ratou, e e ariu mai oki ki te Atua, ma te akono i te tuatua e tau ei i te tataraara ra.

21 No taua tuatua ra i opu mai ei te ngati Iuda iaku i roto i te iero, e te rave maira oki e tamate rava iaku.

22 I turuia maira au e te Atua, e tae rava akenei i teianei rā, i te akakite anga atu ki te aronga mamaata e te tangata rikiriki, e te tuatua anga atu i taua au tuatua anake ra i ta te peroveta tini e ta Mose i tuatua maira e, ka tupu;

23 E ka mate rai te Mesia, e koia te ka tu mai ana i te aronga i mate ra, e ka akakite aia ki te tangata, e te au etene, i te mārama.

24 Te pera atura aia i te akatika anga iaia uaorai, kua kapiki ua maira te reo o Fesito, E Paulo, kua auouoia koe; kua nenevaia koe i te kimi maata anga i te tuatua.

25 Kua karanga atura ra aia, Kare ua au i nenevaia, e Fesito teitei; ko te tuatua-mou ra taku e karanga nei e te auouo kore.

26 Kua kite ua oki te ariki i taku i tuatua ua atu nei i mua i tona aroaro i teianei au tuatua: kare rava teianei au tuatua i ngaro iaia, kua kite au; kare ua oki teia te mea i raveia i te ngai poiri.

27 E te ariki, e Ageripa, kua akarongo koe i te au peroveta? Kua akarongo koe, kua kite au.

28 Kua tuatua mairā Ageripa kia Paulo, Kua vaitata au i te riro ei Kerisitiano ia koe.

29 Kua karanga aturā Paulo, Toku ïa anoano i te Atua, auraka ko koe anake ra, ko te aronga ravarai ra e akarongo mai iaku i teianei rā, kia vaitata, e kia aite rava mai kiaku nei, auraka ra teianei tapeka.

30 Tei te pera anga atu aia, kua tu akera te ariki ki runga, e te kavana, e Berenike, e te aronga i noo katoa ratou ra:

31 E kia akaatea atura ratou, kua karangaranga iora ratou uaorai, na ko akera, Kare rava a teianei tangata mea i rave e tau ei iaia te mate, e te tapeka oki.

32 Kua karanga ua aturā Ageripa kia Fesito, E tuku uaia teianei tangata, naringa kare aia i karanga e, Ei ia Kaisara au.