Amosa

3 E AKARONGO mai kotou i teianei tuatua, ta Iehova i tuatua ia kotou, e te au tamariki a Iseraela, i te kopu-tangata katoa taku i arataki mai, mei te enua ra i Aiphiti, na ko maira;

2 Ko kotou anake ra taku i kite i te au kopu-tangata katoa o te ao nei, e akautunga atu ei au ia kotou i ta kotou ra au ara katoa.

3 E aaere ainei e toko rua i te aerenga okotai, kia kore raua e tau?

4 E ngunguru ainei te liona ki roto i te vaorakau, e kare ana e kai? e aue mai ainei te liona ou i roto i tona vaarua, e kare tana i rauka?

5 E topa mai ainei te manu ki to enua ki roto i te ereere nei, e kare ua e maunu i tukuia nona? e maiti ua mai ainei te ereere ki runga, e kare ua e puapinga i rauka?

6 E akatangiia ainei te pu ki roto i te oire, e auraka te tangata e ruketekete? e kino ainei tei te oire, e kare i ta Iehova i akatupu?

7 Kare a te Atu ra a Iehova mea i rave, mari ra kia akakite i tana tuatua ngaro ki tona ra au tavini ki te au peroveta.

8 Kua ngunguru te liona, koai te ka kore e mataku? kua tuatua te Atu ra ko Iehova, koai te ka kore e totou?

9 Ka akakite pu tikai ki roto i te au are ariki i Asedoda, e ki roto i te au are ariki i te enua ra i Aiphiti, e karanga atu: E akaputuputu mai kotou ki runga i te au maunga i Samaria, ka akaraʼi i te oripu maata i roto iaia ra, e te takinga-kino i rotopu iaia ra.

10 Te tuatua mairā Iehova, Kare ratou i kite i te rave i te mea tika, tei akaputuputu i te apinga aō e tei noniia ki roto i to ratou au are ariki.

11 E teianei, te na ko maira te Atu ra ko Iehova: E enemi, e ka akapini aia i te enua nei; e nana e tuku i te ririnui i runga ia koe ra ki raro, e to au are ariki ra, e āruia ïa.

12 Te na ko mairā Iehova: Mei te tiaki mamoe i kiriti mai no roto i te vaa o te liona, i nga vaevae e rua ra, e tetai manga taringa, e akaperaia te au tamariki a Iseraela i te kiriti angaia, ko tei noo i te pae roi i Samaria ra, e ki runga i te roi iti i Damaseko.

13 E akarongo mai kotou, ka akakite pu ua atu ei ki te ngutuare o Iakoba, te tuatua maira te Atu ra, ko te Atua Sabaota ra, ko Iehova;

14 E kia tae ki te rā e tutaki atu ei au i te au ara a Iseraela ki runga iaia ra, e tutaki katoa atu au i te au atarau i Betela; e e tipuia nga tara o taua atarau ra, e ka topa ïa ki raro i te one.

15 E naku e ta i te are paroro, e te are akaū katoa ra, e te au are nio elephana, e pou ïa, e te au are nunui, e kore ïa, te tuatua mairā Iehova.