2 Ariki

14 TEI te rua o te mataiti o Ioasa te tamaiti a Iehoahaza ariki no Iseraela, i riro ei a Amazia te tamaiti a Ioasa ei ariki no Iuda.

2 Kua tae aia ki te mataiti tai takau ma rima i ariki ei aia, okotai takau ma iva ona mataiti i te ariki anga i Ierusalema. Ko Iehoadana te ingoa o tona metua vaine no Ierusalema.

3 Kua rave aia i te mea tika i mua i te aroaro o Iehova, kare ra i aite ki ta tona metua ki ta Davida: kua tau ra tana i rave ki ta tona metua ra ki ta Ioasa i rave ra.

4 Kare ra te au ngai teitei i akarukeia: te apai ua ra te tangata i te atinga, e te tutungi ua ra i te atinga kakara, ki runga i taua au ngai teitei ra.

5 E akatinamouia akera te au i tona rima, kua ta atura aia i nga tavini nona, tei ta i tona metua i te ariki ra.

6 Kare ra aia i ta i te au tamariki a taua au ta tangata ra: i tei tataia oki ki roto i te buka ture a Mose ra, i ta Iehova i akaue maira, i te na ko anga mai e, Auraka te metua kia taia i te ara a te tamariki, auraka te tamariki kia taia i te ara a te metua; ka mate ra te tangata katoa i tana uaorai ara.

7 Kua ta iora aia i to Edoma, okotai ngauru i te tausani i te tangata i te o tai ra, rauka iora iaia Sela i te tamaki anga ra, tapa iora te ingoa ko Iokateela, e tae rava akenei ki teianei rā.

8 Kua tono akerā Amazia i te au karere kia Ioasa, te tamaiti a Iehoahaza, te tamaiti a Iehu ra, ariki no Iseraela ra, karanga atura, E aere mai, taua e akarakara i to taua mata.

9 Kua tono maira te ariki o Iseraela ko Ioasa ki te ariki o Iuda kia Amazia, tuatua maira, Na tetai ngangaere i Lebanona i tono mai i te karere ki tetai arezi i Lebanona, na ko maira, O mai ana i to tamaine ei vaine na taku tamaiti: kua aere ua maira tetai puaka momoavao no Lebanona, takatakaiia iora taua ngangaere ra.

10 Kua eke rai oki Edoma ia koe, e kua parau to ngakau na; ka akatietie koe i te reira, e noo marie ua koe i to ngutuare ra; eaa koe e māro mai ei kia kino, e kia inga atu koe, ko koe e Iuda katoa ra?

11 Kare akerai a Amazia i akarongo. Kua aere iroa te ariki o Iseraela ko Ioasa ki runga; e kua akarakara akera aia raua ko te ariki o Iuda ko Amazia i to raua mata i Bete-semesa, i o Iuda ra.

12 Eke iora Iuda i mua ia Iseraela; e kua oro anake iora ratou, te tangata katoa ki tona uaorai puakapa.

13 Kua rave iora te ariki o Iseraela ko Ioasa i te ariki o Iuda ia Amazia te tamaiti a Ioasa, te tamaiti a Ahazia, i Bete-semesa, e kua aere maira ki Ierusalema, e kua vavaʼi i te patu i Ierusalema, mei te ngutupa i Epheraima e tae ua atura ki te ngutupa i te poo patu ra, e a anere i te kubiti.

14 E kua rave aia i te auro e te ario, e ope rava ake, e te au āriki katoa i kitea i roto i te are o Iehova, e i roto katoa i te au apinga no te are o te ariki ra, e te tangata oki, e kua oki atura ki Samaria.

15 E te toenga o te tuatua ia Ioasa, tana i rave ra, e tona ririnui, e tana tamaki anga ki te ariki o Iuda kia Amazia ra, kare ainei kua tataia ki roto i te buka, te tuatua no te au rā o te au ariki o Iseraela?

16 Moe iorā Ioasa ki o tona ra ai metua, e tanumia atura i Samaria ki o te au ariki o Iseraela ra; tupauia akera aia i te au e tana tamaiti ra e Ieroboama.

17 Te ora ua rā Amazia, te tamaiti a Ioasa, ariki no Iuda, i muri ake i te matenga o Ioasa te tamaiti a Iehoahaza ariki no Iseraela ra, okotai ngauru ma rima i te mataiti.

18 E te toenga o te tuatua ia Amazia ra, kare ainei kua tataia ki roto i te buka, te tuatua no te au rā o te au ariki o Iuda ra?

19 Kua kotokoti kupenga akera ratou iaia i Ierusalema; kua oro iora aia ki Lakisa; kua tono atura ra ratou i te tangata na muri iaia ki Lakisa, ta atura iaia i reira.

20 Kua akauta maira ratou iaia na runga i te au oroenua: tanumia iora aia i Ierusalema, ki o tona ra ai metua i te oire o Davida.

21 Kua rave iora to Iuda katoa ia Azaria, okotai ngauru ma ono ona mataiti, e kua akaariki akera iaia ei tupau i tona metua ia Amazia ra.

22 Kua patu akera aia ia Elata, e kua akaoki maira kia Iuda, ka moe ei te ariki ki o tona ra ai metua.

23 E tae akera ki te okotai ngauru ma rima o to Amazia, te tamaiti a Ioasa, ariki o Iuda, mataiti, i ariki ei a Ieroboama, te tamaiti a Ioasa ariki o Iseraela, i Samaria; e a ngauru ma tai ona mataiti i te ariki anga.

24 Kua rave aia i te kino i mua i te aroaro o Iehova: kare aia i akaruke i te au ara ravarai a Ieroboama te tamaiti a Nebata, i ara ai Iseraela.

25 Rauka akaou maira iaia to Iseraela au tapere, mei te tomoanga ki roto i te oire ra ko Hamata, e tae ua atu ki te roto o te Araba ra, i te tuatua oki a te Atua o Iseraela ra a Iehova, tana i tuatua mai i tona tavini ra ia Iona, te tamaiti a Amitai ra, i te peroveta i Gatahephera ra.

26 Te kite ra oki a Iehova e, e mate maata rava to Iseraela; e kare oki i kitea te tangata i te mopaniia, kare i toe, kare atura o Iseraela e tauturu.

27 Kare oki a Iehova i tuatua mai e, e taparapara takiri aia i te ingoa o Iseraela i raro ake i te rangi nei: kua ora iora ratou iaia i te rima o Ieroboama, te tamaiti a Ioasa ra.

28 E te toenga o te tuatua ia Ieroboama, e tana katoa i rave ra, e tona maroiroi, e tana tamaki, e te rauka anga iaia Damaseko, e Hamata, no Iseraela, no Iuda oki i muatangana akera, kare ainei kua tataia ki roto i te buka, te tuatua no te au rā o te au ariki o Iseraela?

29 Moe iorā Ieroboama ki o tona ra ai metua, i te au ariki o Iseraela; tupauia akera aia i te au e tana tamaiti ra e Zekaria.