1 Ariki

14 I TE reira tuatau, rokoia iora te tamaiti a Ieroboama ko Abiia e te maki.

2 Kua tuatua mairā Ieroboama ki tana vaine, Ka tu, taku ïa tuatua kia koe, ka akatu ke ia koe uaorai, kia kore koe e kitea e, ko te vaine a Ieroboama; e aere koe ki Silo: i na, tei reirā Ahia peroveta ra, ko tei tuatua mai kiaku ra e, ka riro au ei ariki i runga i teianei au tangata.

3 E taoi katoa atu i nga areto okotai ngauru i to rima, e te areto rikiriki, e tetai āriki meli, ka aere atu ei kiaia ra: ka akakite mai aia kia koe i te ka tupu i te tamaiti nei.

4 Kua pera oki taua vaine a Ieroboama ra, kua tu akera oki aia ki runga, aere atura ki Silo, e tae atura ki te ngutuare o Ahia. Kare akerai a Ahia e kite mai kia akara: kua mou oki tona mata i te ruaine anga.

5 Kua tuatua mairā Iehova kia Ahia, I na, te aere maira te vaine a Ieroboama e ui kia koe i tetai mea i tana tamaiti; kua maki oki aia: e akono meitaki ra i taau tuatua anga atu kiaia; ka riro oki aia kia tae mai i te akatutu vaine ke ra.

6 Rongo akerā Ahia i te pakuku o tona vaevae, i te tomo anga mai i te ngutupa, kua karanga atura aia, Ka tomo mai koe, e te vaine a Ieroboama; eaa oki koe e pikikaa mai ei i vaine ke? i tonokia mai oki au kia koe ma te tuatua tumatetenga.

7 E aere, e karanga atu kia Ieroboama, Te na ko maira te Atua o Iseraela ko Iehova, No te mea kua akateitei au ia koe i rotopu i te au tangata nei, e kua akariro au ia koe ei ariki ki rungo i toku au tangata nei ia Iseraela;

8 E kua aaeia mai e au te basileia i te ngutuare o Davida, e kua oronga atu kia koe: kare akenei ra koe i aite ki toku tavini ra kia Davida, ko tei akono i taku au akauenga, e tei aru mai iaku ma tona ngakau katoa ra, i te akono anake anga i tei tau ki toku mata nei;

9 Kua maata ra te kino taau i rave i te aronga ravarai i na mua ia koe ra: kua aere oki koe e kua anga i te au atua ke noou ra, e te tiki i akatoia ra, ei akakoko mai iaku kia riri, e kua akaruke koe iaku ki muri i to tua:

10 I na, i teianei, ka apai mai au i te kino ki runga i te ngutuare o Ieroboama, e ka tipu keia e au te au tane ki o Ieroboama, mopani uaiaʼi e ngaro ua atu aia i roto ia Iseraela nei: ka vaere uaia e au te toenga o te ngutuare o Ieroboama, mei te tangata e vaere i te teita ra, e kare akera.

11 To Ieroboama kia mate ua i roto i te oire ra, na te puaka-aoa e kai; e tei mate ua i roto i te kainga ra, na te manu o te reva e kai: na Iehova oki i karanga.

12 E tenana, ka tu koe ki runga, e aere ki toou uaorai ngutuare: e kia tae to vaevae ki roto i te oire ra, ka mate te tamaiti.

13 E na to Iseraela katoatoa e aue iaia, e tanu oki iaia; koia anake ra oki to Ieroboama e raukaʼi te vaarua, no te mea, te vai ra tetai mea meitaki i roto iaia i te Atua o Iseraela ia Iehova, i te ngutuare o Ieroboama.

14 Ka riro oki a Iehova i te akatupu i tetai ariki no Iseraela, motu ke iora te ngutuare o Ieroboama iaia i taua rā ra: eaa ra oki, kua vave ua mai!

15 Ka ta oki a Iehova ia Iseraela mei te kakao e ruruia ki raro i te vai ra, ka kiriti tumu oki aia ia Iseraela i teianei enua meitaki, i orongaia mai e ia ki to ratou ra ai metua, ka pueurikiriki ke oki ratou iaia e kia topa mai te vai nei, no te mea kua akatu ratou i te au Asetoreta, i te akakoko anga atu ia Iehova kia riri.

16 E ka akaruke aia ia Iseraela no te ara a Ieroboama, kua ara oki aia, e kua ara oki Iseraela iaia.

17 Kua tu akera te vaine a Ieroboama ra, riro atura, e tae atura ki Tireza: e tei te tae anga atu ki te tomoanga ki roto i te ngutupa ra, mate iora taua tamaiti ra;

18 Kua tanu iora ratou iaia; e kua aue oki Iseraela katoatoa iaia, i ta Iehova oki i tuatua maira, i tuatuaia mai e ia i tona tavini ia Ahia peroveta ra.

19 E te toenga o te tuatua ia Ieroboama, tana tamaki anga, e te tu o tona au, i na, kua tataia ki roto i te buka, te tuatua no te au rā o te ui ariki o Iseraela ra.

20 E to Ieroboama au rā i te mou anga i tona au, okotai takau ma rua i te mataiti: kua moe iora aia ki o tona katoa ra ai metua, tupauia akera aia i te au e tana tamaiti ra e Nadaba.

21 Tei ia Rehoboama te tamaiti a Solomona te au i Iuda. Tei te a ngauru ma tai o te mataiti i riro ei te au ia Rehoboama, okotai ngauru ma itu ona mataiti i te ariki anga i Ierusalema, i te oire i ikiia e Iehova no roto i te au kopu katoa o Iseraela, ei vairanga no tona ra ingoa. E te ingoa o tona metua vaine, ko Naama ïa, e ngati Amona.

22 E rave kino ta Iuda i mua i te aroaro o Iehova, e kua akakoko ratou iaia kia vareae i te au ara i raveia e ratou ra, e kua maata rava ta ratou i rave i ta to ratou ai metua katoa.

23 Kua akatu katoa oki ratou i te au ngai teitei, e te tiki, e te Asetoreta, ki runga i te au ngai teitei katoa, e ki raro ake i te au rakau marumaru katoa ra.

24 E sodoma oki te vai ra i taua enua ra: e te rave anake ra ratou i te au peu viivii a to te pa enua, i tuaruia e Iehova ki mua i te aroaro o te tamariki a Iseraela.

25 E tae akera ki te rima o te mataiti i taua ariki ra ko Rehoboama, kua aere maira te ariki o Aiphiti ra ko Sisaka ki Ierusalema e tamaki:

26 E kua apai ke atura i te au apinga no te are o Iehova, e te au apinga o te are o te ariki ra; kua akaope rava atura aia; e kua apai aia i te au paruru auro katoa i angaia e Solomona ra.

27 Kua anga iora te ariki ko Rehoboama i te au paruru veo ei tupau, e kua tuku atura ki te rima o te rangatira o te vaeau, ko tei tiaki i te tomoanga o te are o te ariki ra.

28 E kua aere te ariki ki roto i te are o Iehova, na te aronga vaeau i apai, e kua akaoki mai ki roto i te pia vaeau.

29 E te toenga o te tuatua ia Rehoboama, e tana katoa i rave, kare ainei kua tataia ki roto i te buka, te tuatua no te au rā o te ui ariki i Iuda ra?

30 E tamaki rai ta Rehoboama raua ko Ieroboama, kare i akapaki.

31 Kua moe iorā Rehoboama ki o tona ra ai metua, e tanu katoaia ki o tona ra ai metua i te oire o Davida, e te ingoa o tona metua vaine, ko Naama ïa, e ngati Amona. Tupauia iora aia i te au e tana ra tamaiti e Abiama.