Isaia

18 E KOE, e te enua tamaru peau e! ki tera atu pae i te au vai i Kusa ra e:

2 Ko tei akaunga i te au karere na te moana ra, na runga i te vaka raupo na runga i te kiriavai ra e, i te na ko anga e, Ka aere, e tera ra au karere viviki e, ki te enua ririnui e te toa, i te au tangata taae mei taito maira e teia noaʼi; ki te enua mana maata, e tei takatakai ki raro, i tei kotia tona enua i te vai ra.

3 Ko kotou katoa, ko tei noo i te ao nei, e tei noo ki te enua nei, kia akatuia te reva ki runga i te maunga, ka akara kotou! e kia akatangiia te pu ra, ka akarongo kotou!

4 Kua na ko mai oki a Iehova kiaku, E noo uaorai au, e e akono marie, i toku nooanga tikai; e riro au mei te mārama kakā me iti te rā, mei te tumurangi kou i te veravera akaū ra.

5 Kare e tae ki te mou, kua kore te pua tiare anga ra, e kua riro te pua ei vine para aere ra, ei reira aia e kokoti ei i te au mangamanga ki te matipi, e e tipu aia i te au atava ka apai ke atu.

6 E akaruke katoaia ratou na te au manu taae o te maunga ra, e na te au puaka taae o te enua ra; e kai oki te au manu taae i te reira e ope ua atu te mou ra, e kai oki te au puaka taae o te enua i te reira e ope ua atu te onge.

7 E i te reira tuatau e apaiiaʼi te atinga kia Iehova Sabaota ra, na te enua ririnui e te toa, na te enua taae mei taito mai e teia noaʼi; i te enua mana maata, e te takatakai ki raro, ko tei kotia oki tona enua i te vai ra; ki te ngai o te ingoa o Iehova Sabaota ra, ki te maunga ra ko Ziona.