Ieremia

16 E KUA tae maira oki te tuatua na Iehova kiaku nei, na ko maira,

2 Auraka koe e akaipoipo i te vaine, e auraka taau ei tamariki tamaroa e te tamaine i teianei ngai.

3 Te na ko maira oki a Iehova, i te au tamariki tamaroa e te au tamaine, tei anau i teianei ngai; e to ratou au metua vaine i anau mai ei ratou ra, e to ratou au metua tane i anau ei ratou ra i teianei enua;

4 I te au mate mamae e mate ei ratou; kare ratou e aueia; kare oki e tanumia; e riro ra ratou ei teita ki runga i te enua nei: e pou oki ratou i te koke, e te onge; e e riro to ratou au kopapa ei kai na te au manu o te reva, e na te au puaka o te enua.

5 Te na ko maira oki a Iehova, Auraka koe e tomo i te are aue ra, auraka rai koe e aere e tangi, e e aue ia ratou, no te mea kua rave keia e au taku au i teianei iti-tangata, te tuatua mairā Iehova, te takinga-meitaki, e te aroa.

6 E mate te aronga nunui e te aronga rikiriki i teianei enua: kare ratou e tanumia, e kare e aueia atu kare tetai e tapatapai iaia uaorai, e kare oki e mangoreia te upoko no ratou:

7 E kare oki ratou e vavaʼi i te faraoa no te akaevaeva, ei akarekareka iaia i tei mate ra; e kare oki ratou e akainu atu ia ratoa ki te kapu o te rekareka no tona metua tane, e no tona metua vaine.

8 Auraka koe e tomo i te are kaingakai, ka noo katoaʼi ma ratou katoa, i te kaikai anga, e te inu anga.

9 Te na ko maira oki a Iehova Sabaota, te Atua o Iseraela; I na, teia au ka akakore i teianei ngai, ki mua i to kotou nei mata, e i to kotou nei au rā, te reo rekareka, e te reo maevakata, te reo no te tane akaipoipo ou, e te reo no te vaine akaipoipo ou.

10 E oti akera teianei au tuatua i te akakiteia atu e koe ki teia iti-tangata nei, e kia tuatua mai ratou kia koe e, No te aā Iehova i akakite mai ei i taua kino maata katoa nei no matou? eaa oki to matou kino? e eaa ta matou ara i raveia e matou i to matou Atua ia Iehova?

11 Ei reira koe ka karanga atu ei kia ratou, No te mea kua akaruke mai to kotou ai metua iaku, te tuatua mairā Iehova, e kua aru aere i te au atua ke, e kua tavini atu ia ratou, e kua akamori atura ia ratou, e kua akaruke akenei iaku, e kare i akono i taku ture:

12 E kino maata ta kotou i rave i ta to kotou ai metua ra; i na oki, kotou ravarai i te aru aere anga i te ketaketa o tona uaorai ngakau kino, ko au nei ra, kare ïa kotou i akarongo mai.

13 E teianei, e tuaru atu au ia kotou i teianei enua, ki te enua kitea koreia e kotou, ko kotou, e to kotou ai metua katoa ra; e ei reira kotou ka tavini atu ei ki te au atua ke i te po e te ao; kare au e akaperepere atu ia kotou i reira.

14 E tenana, i na, e tae mai te au rā, te tuatua mairā Iehova, kare e tuatua akaouia, Te ora rā Iehova, ko tei arataki mai i te tamariki a Iseraela mei te enua maira mei Aiphiti;

15 Kareka ra, Te ora rā Iehova, ko tei arataki mai i te tamariki a Iseraela mei te enua i apatokerau mai, e mei te au enua katoa tana i tuaru ia ratou: e akaoki mairai oki au ia ratou ki to ratou enua, taku i oronga atu no to ratou ai metua ra.

16 I na, e unga atu au i te au ravakai e manganui, te tuatua mairā Iehova, e ka tautai ratou ia ratou; e i muri ake, e unga atu au i te aronga arumaki e manganui, e ka arumaki ratou ia ratou, na runga i te au maunga ravarai, e na runga i te au tuaivi katoa, e na roto i te au vaarua mato ra.

17 Tei runga oki oku mata i to ratou au aerenga katoa: kare ratou i ngaro ki mua i toku aroaro nei; kare oki to ratou kino i ngaro i oku nei mata.

18 E na mua au i te tataki rua i te tutaki i to ratou au kino, e ta ratou au ara: no te mea kua viivii toku enua ia ratou, e kua akaki ratou i taku tuanga i te au kopapa o ta ratou au mea viivii, e te rikarika.

19 E Iehova e, taku ririnui, e toku akapuanga, e toku punanga i te rā tumatetenga; e tae roa mai te pa enua kia koe mei te au openga mai o te enua, ka na ko mai ei e, E pikikaa tikai ta to matou ai metua ra tuanga, e tarevakaua, e te puapinga kore.

20 Ei tangata ainei te anga i te atua, e kare i te atua ratou uaorai?

21 E teianei, i na, i toku apii anga atu ia ratou i teianei, e akakite atu au ia ratou i toku rima e toku mana: e e kite ratou e, ko Iehova toku nei ingoa.