Nehemia

5 E AUE maata to te au tangata, e ta ratou au vaine, i to ratou ai taeake i te ngati Iuda.

2 Kua tuatua maira oki tetai pae, E manganui matou, e ta matou tamariki tamaroa ma te tamaine: e kua rave iora matou i te sitona kia kai matou e kia ora.

3 Kua tuatua maira oki tetai pae, Kua riro to matou nei au kainga tei te ou, te au kainga vine, e te au are, kia oko matou i te sitona, no te onge nei.

4 E kua tuatua maira oki tetai pae, Kua pati matou i te moni i to matou au kainga e te au kainga vine, ei taūnga na te ariki.

5 E i na, okotai oki o matou arite e to matou au taeake, ta matou au tamariki ma ta ratou katoa ra au tamariki: e i na, teia matou ka akariro i ta matou au tamaroa e te au tamaine ei aronga ao, e kua riro tikai oki ta matou au tamaine ei aronga ao i teianei rai: kare oki e tika ia matou kia oko akaou; kua riro oki to matou au kainga e te au kainga vine, tei ia etai ke.

6 Kite akera au i to ratou aue, e taua au tuatua ra, riri rava akera au.

7 Kua akaeatu iora toku ngakau i te ravenga, e kua akamura atura au i te aronga mamaata, e te au tutara, e kua karanga atura au kia ratou, Te umuumu na kotou i te oko, kotou katoa i to kotou ai taeake. Kua akono iora au i tetai uipa anga maata ia ratou.

8 Kua karanga atura au kia ratou. Kua oko akaouia e matou, i tei tau katoa ia matou, to tatou au taeake ngati Iuda, tei okoia atu ki te au etene; e ka oko ainei oki kotou i to kotou ai taeake? e ei roto ia tatou uaorai nei ainei ratou oko ei? Kua muteki ua iora ratou, kare i ki mai.

9 Kua karanga atura oki au, Kare i te mea meitaki ta kotou e rave na: kare ainei e tika ia kotou kia aere ma te mataku i to tatou Atua, no te akakino anga o te au etene, to tatou au enemi?

10 Ko au katoa oki, e toku ra au taeake, e toku au tavini, e tika katoa ïa kia umuumu atu i te moni, e te sitona, ia ratou: e akaruke tatou i taua peu oko ra, taku ïa tuatua kia kotou.

11 E akaoki ana kia ratou, i teianei rai rā, i to ratou au kainga, to ratou au kainga vine, to ratou au kainga olive, e to ratou au are, e okotai anere o te tuanga o te moni, e te sitona, e te wina, e te inu, ta kotou i umuumu ia ratou ra, ko taku ïa tuatua kia kotou.

12 Kua tuatua maira ratou, E akaoki matou, kare atu matou e umuumu i ta ratou; ka pera matou i taau i tuatua mai na. Kua karanga atura au ki te kau taunga, e kua tuku atu au i te taputou kia ratou e, e akono ratou i taua tuatua ra.

13 Kua ruru au i taku pareu, e kua karanga atura au, Kia pera mai te Atua i te ruru i te tangata ravarai i tona ngutuare, e tana angaanga, tei kore i akono i taua tuatua nei, kia akaperaia aia i te ruru, e kia riringiia ki vao. Kua tuatua maira taua uipa anga katoa, Amene; e kua akameitaki ia Iehova. E kua akono atura te tangata i taua tuatua ra.

14 E mei te tuatau mairai i akonoiaʼi au nei ei tutara no ratou i te enua ra i Iuda, mei te mataiti tai takau maira, e tae ua akera ki te mataiti tai takau e okotai ngauru ma rua i te au i te ariki ra ia Aretekasaseta, okotai ngauru ma rua i te mataiti, kare au e taku au taeake katoa i kai i te kai a te tutara.

15 Kareka te au tutara i muatangana ra, kua teiaaia ïa te tangata ia ratou, e kua rave ïa i ta ratou, i te areto, e te wina, e rua takau sekela ario i te rā okotai; e kua akaapoapo katoa te au tavini no ratou ki runga i te au tangata: kare ra au i akapera, no te mea te mataku ra au i te Atua.

16 E kua rave tamou oki au i teianei patu, kare oki matou i oko i te kainga: i putuputu mai oki toku ra au tavini katoa ki te ngai angaanga.

17 Okotai oki anere e rima ngauru ngati Iuda e te aronga tutara i taku ra kaingakai, te taka atura tei aere mai kia matou no te au etene i vaitata maira.

18 Okotai oki puakatoro, e te mamoe meitaki e ono, i akonoia naku no te rā okotai; e te moa katoa oki i te rave katoa anga naku, e kua po ngauru katoa ra, e wina ïa e manganui te tu: e kare au i umuumu atu i ta te tutara ra kai, no te mea e teiaa maata tei runga i taua au tangata nei.

19 E akamaara mai iaku, e taku Atua e, kia meitaki au, mei taku oki i rave i teianei au tangata.