Ezekiela

48 TEIA te au ingoa o te au kopu ra. Mei te openga i te pae ki apatokerau e tae ua atu ki uta kia na Hetelona, aere atu ei ki Hamata, Hazara-enana, te kotinga i Damaseko i te pae ki apotokerau ra, ki te enua ra i Hamata, ko nga kotinga oki teia nona mei te pae ki te itinga, e tae rava atu ki te opunga o te rā ra; ko Dana ïa tuanga.

2 E na te kotinga o Dana, mei te pae ki te itinga e tae rava atu ki te pae ki te opunga o te rā ra, ko Asera ïa tuanga.

3 E na te kotinga o Asera, mei te pae ki te itinga e tae rava atu ki te pae ki te opunga o te rā ra, ko Naphatali ïa tuanga.

4 E na te kotinga o Naphatali, mei te pae ki te itinga e tae rava atu ki te pae ki te opunga o te rā ra, ko Manase ïa tuanga.

5 E na te kotinga o Manase, mei te pae ki te itinga e tae rava atu ki te pae ki te opunga o te rā ra, ko Epheraima ïa tuanga.

6 E na te kotinga o Epheraima, mei te pae ki te itinga e tae rava atu ki te pae ki te opunga o te rā ra, ko Reubena ïa tuanga.

7 E na te kotinga o Reubena, mei te pae ki te itinga e tae rava atu ki te pae ki te opunga o te rā ra, ko Iuda ïa tuanga.

8 E na te kotinga o Iuda, mei te pae ki te itinga e tae rava atu, ki te pae ki te opunga o te rā ra, ei reira te atinga ta kotou e apai okotai takau ma rima tausani kubiti i te pararauare, e te roa oki mei tetai o te au tuanga ïa, mei te pae ki te itinga e tae rava atu ki te pae ki te opunga o te rā ra: e te are tapu ra, ei rotopu ïa i te reira.

9 Te atinga ta kotou e apai ia Iehova ra, okotai takau ma rima ïa tausani i te roa, okotai oki ngauru tausani i te pararauare.

10 No ratou oki taua atinga tapu nei, no te kau taunga, i te pae ki apatokerau ra, okotai takau ma rima tausani i te roa, e te pae ki te opunga o te rā ra, okotau ngauru tausani i te pararauare, e te pae ki te itinga o te rā ra, okotai ngauru tausani i te pararauare, e te pae ki apatonga ra, okotai takau ma rima tausani i te roa: e te are tapu o Iehova, ei rotopu ïa i te reira.

11 No te kau taunga akatapuia ra te reira i te au tamariki a Zadoka; ko tei akono i te ikuiku naku ra, tei kore i tatipake ka tatipake ei te au tamariki a Iseraela ra, mei te au ngati Levi i tatipake ra.

12 E taua atinga o te enua i apaiia nei, e riro ïa ei mea tapu rava no ratou, na te kotinga o te ngati Levi ra.

13 E ki mua mai i te kotinga o te kau taunga ra, ko to te ngati Levi ïa, okotai takau ma rima tausani i te roa, okotai oki ngauru tausani i te pararauare i te roa katoa ra, okotai takau ma rima ïa tausani, e te pararauare, okotai ïa ngauru tausani.

14 Auraka oki ratou e oko i te reira, auraka e okooko, auraka oki e taka ke te popo o taua enua ra: e mea tapu oki na Iehova.

15 E nga tausani e rima i toe i te pararauare ra, ki mua mai i nga tausani okotai takau ma rima ra, ei ngai noa ïa no te oire, ei nooanga, e ei ngai atea: e te oire ra, ei rotopu ïa i te reira.

16 Teia oki te au aite o te reira; i te pae ki apatokerau, e a ïa tausani e rima anere, e te pae ki apatonga ra, e a ïa tausani e rima anere, e te pae ki te itinga o te rā ra, e a ïa tausani e rima anere, e te pae ki te opunga o te rā ra, e a ïa tausani e rima anere.

17 E te ngai atea o taua oire ra, e rua anere e rima ngauru ki te pae ki apatokerau, e rua oki anere e rima ngauru ki te pae ki apatonga ra, e rua oki anere e rima ngauru ki te pae ki te itinga o te rā ra, e rua oki anere e rima ngauru ki te pae ki te opunga o te rā ra.

18 E te toenga o te roa ki mua mai i te atinga tapu ra, okotai ngauru tausani ki te pae ki te itinga o te rā ra, okotai oki ngauru tausani ki te pae ki te opunga o te rā ra: e ei mua mai ïa te reira i te atinga tapu ra, e tei tupu i reira ra, e riro ia ei kai na te aronga e raverave i te oire ra.

19 E te aronga e raverave i te oire ra, e raverave ïa no roto i te au kopu katoa o Iseraela.

20 Taua atinga katoa ra, okotai takau ma rima ïa i te tausani, okotai takau oki ma rima i te tausani ki tetai pae: e a aro to taua atinga tapu ra kia apai kotou, ma te tuanga katoa ra no te oire.

21 E te toenga ra, no te ariki ïa, i teia e i tera pae i te atinga tapu ra, e te tuanga ra no te oire, ki mua mai i te okotai takau ma rima tausani no te atinga, ki te kotinga ki te pae ki te itinga o te rā ra, e te pae ki te opunga o te rā ra, ki mua mai i te okotai takau ma rima tausani ki te kotinga ki te pae ki te opunga o te rā ra, ki mua mai i te au tuanga o te ariki ra: e riro oki te reira ei atinga tapu: e te ngai-tapu no taua are ra, ei rotopu ïa.

22 Mei te tuanga mai o te ngati Levi ra, e mei te tuanga mai o te oire tei rotopu i tei te ariki ra; i rotopu i te kotinga o Iuda, e te kotinga o Beniamina, ko to te ariki ïa.

23 Kareka te toenga o taua au kopu ra, mei te pae ki te itinga e tae rava atu ki te opunga o te rā ra, ko Beniamina ïa tuanga.

24 E na te kotinga o Beniamina, mei te pae ki te itinga e tae rava atu ki te opunga o te rā ra, ko Simeona ïa tuanga.

25 E na te kotinga o Simeona, mei te pae ki te itinga e tae rava atu ki te pae ki te opunga o te rā ra, ko Isakara ïa tuanga.

26 E na te kotinga o Isakara, mei te pae ki te itinga e tae rava atu ki te pae ki te opunga o te rā ra, ko Zebuluna ïa tuanga.

27 E na te kotinga o Zebuluna, mei te pae ki te itinga e tae rava atu ki te pae ki te opunga o te rā ra, ko Gada ïa tuanga.

28 E na te kotinga o Gada, ki te pae ki apatonga ra, mei Tamara mai taua kotinga ra e tae rava atu ki te vai taumāro anga ki Kadesa, e tae rava atu ki te kauvai ki te tai maata ra.

29 Ko ta kotou teianei enua e tua kelero ki te au kopu o Iseraela ei nooanga, e teia oki ta ratou au tuanga, te tuatua maira te Atu ra ko Iehova.

30 E teia te roa o taua oire ra, tei te pae ki apatokerau ra, e a ïa tausani e rima ïa anere aite.

31 E tapaia oki te au ngutupa o te oire i te au ingoa o te au kopu o Iseraela: e toru ngutupa i te pae ki apatokerau ra; okotai ngutupa no Beniamina, okotai ngutupa no Iuda, okotai ngutupa no Levi.

32 E ei te pae ki te itinga o te rā ra, e a ïa tausani e rima anere: e nga ngutupa e toru ra, okotai ngutupa no Iosepha, okotai ngutupa no Beniamina, okotai ngutupa no Dana:

33 E ei te pae ki apatonga ra, e a ïa tausani e rima anere aite: e nga ngutupa e toru ra, okotai ngutupa no Simeona, okotai ngutupa no Izakara, okotai ngutupa no Zebuluna.

34 E ei te pae ki te opunga o te rā ra, e a ïa tausani e rima anere, e nga ngutupa e toru ra, okotai ngutupa no Gada, okotai ngutupa no Asera, okotai ngutupa no Naphatali.

35 Okotai ngauru ma varu i te tausani i te aite kia akapini ra: e te ingoa o taua oire ra mei taua rā maira, TEI REIRĀ IEHOVA.