Iobu

11 KUA karanga aturā Zophara i Naama, na ko atura,

2 Kare ainei te tuatua maata e e karangaia atu? e akatikaia ainei te tangata vaavaa nunui?

3 E muteki ua ainei te tangata i taau tuatua-tika kore? e kia taitoito ua mai koe, kare ainei e tangata ei taakama atu?

4 I tuatua ana oki koe e, Kua tika taku nei tuatua, e kare oku e viivii i toou na mata.

5 Angairi ra te Atua e tuatua ua mai, e kia amama ua mai tona vaa ia koe;

6 E kia akakite mai aia kia koe i te tuatua ngaro poti o te pakari ra, tei papa rua ra ïa i te au mea kitea katoa ra! e kite kore i reira e, kua akangaropoina te Atua i tetai pae o taau ara.

7 E kitea ainei te Atua ia koe kia kimi? e kitea puia ainei te Mana katoatoa ia koe?

8 Mei te au rangi i te teitei; e naea taau e rave? E oonu maata i to ade; eaa taau ngai e kite?

9 E roa rava to te reira aite i to te enua, e pararauare maata to te reira i to te moana.

10 Naringa aia e opu ra, e kua tapeka, e kua uipa ki te akavaanga, koai tei tika kia patoi atu iaia?

11 Kua kite aia i te au tangata pikikaa: e te akara katoa maira aia i te ara; e ana e kare aia e akono mai.

12 Te inangaro ra te tangata neneva kia manakoia e e pakari tona, tau uaorai te tangata nei, i tona anau anga, mei te punua asini momoavao.

13 Kia akateateamamao koe i to ngakau, e kia akatika atu koe i oou rima kiaia;

14 E te vai ra te ara i to rima na, e akaruke takiri rava atu ïa, e auraka e vaoo ua te kino kia vai i toou au puakapa.

15 E nānā koe i to mata ki runga ma te kotuutuu kore i reira; koia ïa, e maroiroi koe, e kare e mataku:

16 Ka akangaropoina oki koe i toou mate, e kia akamaara ra, e riro ïa mei te vai puke i mate vave ra:

17 E riro oki taua tuatau ra i te mārama e iti to te avatea; tei roto koe i te poiri i tenana, e arite ra koe ki te popongi i reira.

18 Kare koe e ngaueue, no te mea te vai ra te irinakianga; te akama ra koe i tenana, ka noo marie ra koe i reira ma te mataku kore.

19 Ka akāvai oki koe ki raro, e kare oki tetai e akamatakutaku mai; e manganui rai te ka tatomo ki mua i to aroaro.

20 E avarevare te mata o te aronga kino, e kore roa to ratou akapuanga, e riro to ratou irinakianga mei te unui anga vaerua ra.