Iobu
5 KA kapiki na i tenana, peneiake ko te āē mai tetai ia koe: e ko teiea taau ka ariu atu i te aronga tapu ra?
2 E mate rai te tangata neneva i te riri, e te auouo e mate ïa i te vareae.
3 Kua kite au i te neneva i te toro anga i te aka: kare e roaia ra e, kua akakino atura au i tona nooanga.
4 Tei te atea ke rai te ora i tana ra au tamariki, e kua aatiia ratou i te ngutupa, e kare ua e akaora.
5 Te pou ra ta ratou mou i te aronga pongi, e tae rava atu ki tei roto i te rakau taratara i te āru angaia, e te apuku uaia nei ra ta ratou apinga e te kaki vai.
6 Kare oki te maki i to raro i te one-pueu i te tae anga mai, e kare oki te tumatetenga i to roto i te enua i te tupu anga mai;
7 I anau mairai te tangata no te tumatetenga, mei te purapura ai e peke ki runga.
8 Ka kimi tika au ki te Atua, e ki te Atua au e tuku atu ei i taku tuatua:
9 Ko tei rave i te au mea mamaata, e te kitea koreia kia kimi, i te au mea umereia tei kore e pou kia tatau:
10 Ko tei oronga mai i te ua ki runga i te enua nei, e kua tuku maira i te vai ki runga i te au kainga:
11 Ei akateitei i te aronga akaaka ki runga; e ei akangateitei i te aronga aue i te ora:
12 Ko tei taruri ke i te kimianga a te aronga pakari, kare atura to ratou rima e tika i te rave i ta ratou i akakoro ra.
13 Te taii nei aia i te aronga pakari i to ratou uaorai pakari: e te akapuapinga kore nei aia i te akakoroanga a te aronga pikikaa.
14 Ko te poiri ta ratou e aravei i te ao, e te aa aere ua ra ratou i te avatea mei tei te po ra.
15 Te akaora nei ra aia i te aronga ao i te koke, i to ratou vaa, e i te rima o te aronga ririnui.
16 No reira i raukaʼi to te ao ra manakonako anga, e te kino ra te topiriia nei ïa te vaa.
17 I na, e ao to te tangata tei akoia mai e te Atua: e tenana, auraka koe e akavaavaa i te ako a te Mana katoatoa:
18 Nana oki i akamamae, e nana oki i vaî: nana oki i akaparuparu, e na tona rima i akaora.
19 Kia taki ono ua atu toou tumatetenga anga, nana koe e akaora: e tae ua atu ki te itu ra, kare rai te kino e akatukia mai ia koe.
20 I te onge ra, nana koe e akaora i te mate: e i te tamaki ra, i te mana koke ra.
21 E uunaia koe i te mate ra i te arero: e kare oki koe e mataku i te pou kia tae mai.
22 E katangia e koe te pou e te onge: kare oki koe e mataku i te au taae o te enua nei.
23 E tau noou te au toka o te kainga nei: e e au oki toou i te au taae o te enua nei.
24 E kite oki koe e e au tei toou puakapa; e atoro oki koe i toou ngutuare, e kare rai e tatipake.
25 E kite oki koe e ka maata toou uanga, e taau anau mei te ngangaere o te enua nei.
26 Kia pakari tikai ka tae ei koe ki te vaarua, mei te ruru sitona i akaputuia i tona tuatau.
27 I na! ko ta matou ïa i kimi io nei, koia tikai teia; ko taau ïa e akarongo mai, e kia kite oki koe ei meitaki noou uaorai.