Isaia

13 TE TUATUA ia Babulonia, ta Isaia te tamaiti a Amoza i kite.

2 Ei runga i te maunga rakau kore ka akatu ei i te reva, ka akateitei ei i te reo kia ratou, ka kamo atu ei i te rima: kia tomo ratou ki te au ngutupa o te ui ariki.

3 I akaue ana au i te kau toa noku i akatakaia ra, e kua karanga au ki toku aronga maroiroi no toku riri, i te aronga nengonengo akatietie noku ra.

4 Te mutamutaanga o te aronga ki runga i te maunga, mei te mea e papaki maata ra! e maoroanga no te au basileia oripu ua ra, no te au etene i akaputuputu ki te ngai okotai! na Iehova Sabaota ra e akaputuputu i te nuku katoa ra kia tamaki.

5 Mei te enua mamao mai ratou, mei te piritanga rangi mai, ko Iehova e te au taoonga tamaki no tona ra riri, ei rave i te enua katoa nei kia pou.

6 Ka aue ana kotou; kua vaitata oki te rā o Iehova; ei mate no ko mai i te Mana katoatoa me tae mai.

7 No reira e parukauaʼi te au rima katoa, e tu a vai oki te ngakau o te tangata katoa;

8 E rokoia mai ratou e te mataku; e opukia mai ratou e te mamae e te aue; mei to te vaine anau ra to ratou mamae; e va ua ratou ia ratou uaorai; e aite oki to ratou mata mei te mura ai ra.

9 I na, te vaitata mai te rā o Iehova! e rā tangi kore e te riri otooto, e te riri anga kore; kia tanea takiri te enua ra; e te au tangata ara i roto iaia ra, ka akapou ravaia ïa e ia.

10 Te au etu oki no te rangi ra, e to reira au pupu, kare ïa e mārama mai; ka akapoiriia te rā i tona aere mai anga, kare oki te marama e pa mai i tona mārama.

11 E tutaki atu au i teianei ao i tona kino, e te aronga kino i ta ratou ara; e akakore au i te nengonengo o te aronga parau, e e taakaaka au i te akateitei o te aronga akamataku ra.

12 E akariro au i te tangata nei ei mea apinga maata i te auro ra; i te tangata okotai nei rai i te toka auro no Ophira ra.

13 E akangaueue oki au i te au rangi ra, e ka ruketekete te enua kia taka ke i tona vairanga, i te riri o Iehova Sabaota ra, e i te rā e muraʼi tona riri.

14 E riro oki ratou mei te zabi arumakiia ra, mei te anana e kare e tangata i te akaputuputu mai: e anga anake ratou ki to ratou uaorai; e ati anake ratou, te tangata katoa ra, ki tona uaorai enua.

15 Te au tangata katoa kia rokoia atu, e ko mama ravaia ïa; e tei pipini ra, e inga anake ïa i te koke.

16 E tuparuia ta ratou au tamariki kai u ki mua i to ratou mata; e āruia to ratou au kainga, e kukumiia oki ta ratou au vaine.

17 I na, te akatu nei au i to Madai ei rave ia ratou, ko te ka kore e akono i te ario; e kare oki ratou e rekareka i te auro.

18 E taia te au tangata mapu i te ana e ungaunga atu; e to roto i te kopu ra kare ratou e aroa; kare oki to ratou mata e tangi ua atu ki to tamariki.

19 E ko Babulonia, te manea o te au basileia ra, te meitaki o te parau o te Kaledea ra, ka arite ïa ia Sodoma e Gomora ra, tei tutuamuia e te Atua.

20 Kare e tangata akaouia, kare oki e nooia i tera uki i tera uki: kare oki te Arabia e patia i tona puakapa i reira; kare oki te au tiaki e anga i te koro anana i reira.

21 Ei reira ra te au puaka no te ngangaere e moe ei; e ki oki to ratou au are i te au taae; ei reira oki te punua ione e noo ei; e e rererere oki te au puaka-nio momoavao ki reira.

22 E aoa ua te au puakaaoa momoavao ki roto i te au kainga ariki ra, e te au taae i to ratou au are manea ra. Kua vaitata oki tona tuatau, e kare tona au rā e akamamaoia.