Ieremia
24 KUA akakite mairā Iehova iaku, e i na, e puke āriki suke e rua, kua tukuia mai i mua mai i te nao o Iehova ra, i muri ake i to te ariki no Babulonia to Nebukanesa apai tuikaa anga ia Iekonia, te tamaiti a Iehoiakima, ariki no Iuda ra, e te ui ariki katoa no Iuda, e te aronga tarai rakau, e te aronga tupaki auri, mei Ierusalema atu, e kua aratakiia atura ratou ki Babulonia.
2 Tetai āriki suke ra, e mea meitaki roa ïa, mei te suke para vave ra: e tetai āriki suke, e mea kino roa ïa, kare e tika kia kai i te kino ra.
3 Kua tuatua mairā Iehova iaku, Eaa taau e akara na, e Ieremia? kua karanga atura au, E suke; te suke meitaki roa ïa; a te mea kino ra, e mea kino roa ïa, kare e tika kia kai i te kino.
4 I reira te tae anga mai i te tuatua a Iehova kiaku nei, na ko maira,
5 Te na ko maira te Atua o Iseraela ra ko Iehova; Mei teianei au suke meitaki nei, ka pera toku kite anga i te au tuikaa no Iuda, i ungaia e au mei ko nei atu i te enua o te Kaledea, kia meitaki ratou.
6 E akatano au i oku mata ki runga ia ratou kia meitaki, e akaoki mai au ia ratou ki teianei enua; e patu au ia ratou ki runga, e kare e tuku ki raro; e tanu au ia ratou, e kare e kiriti.
7 E oronga au ia ratou i te ngakau e kite mai ei iaku ra e, ko au ko Iehova: e riro oki ratou ei iti-tangata noku, e riro oki au ei Atua no ratou; ka ariu mai oki ratou iaku ma te ngakau katoa ra.
8 Kareka ra te au suke kikino ra, e kore e tika kia kai i te kino, te na ko mairā Iehova, Mei te reira taku akariro anga i te ariki no Iuda ra ia Zedekia, e te ui ariki ki ona ra, e te toenga o Ierusalema, tei akatoeia ki runga i te enua nei, e tei noo katoa i te enua i Aiphiti:
9 E tuku atu au ia ratou no te manamanata, e te kino, i te au basileia katoa o te ao nei, kia riro ei akakino anga, e ei amuamu anga, ei tuatua anga, e ei tao anga, i te au ngai katoa taku e tuaru atu ia ratou ra.
10 E akaunga atu oki au i te koke i roto ia ratou, e te onge, e te makimate; e pou rava atu ratou i runga i te enua nei, tei orongaia e au no ratou, e no to ratou ra au metua.