Ieremia

46 TE TUATUA a Iehova i tae mai ki te peroveta ra kia Ieremia, no te pa enua ra;

2 No Aiphiti ra no te nuku a te ariki o Aiphiti ra ko Pharao-neko, i te pae vai ra i Eupharati i Karekemisa ra, tei taia e te ariki o Babulonia e Nebukanesa, i te mataiti a o Iehoiakima, te tamaiti a Iosia, ariki no Iuda ra.

3 Ka akonokono ana i te tapoki e te paruru, ka akavaitata ki te tamaki.

4 Ka ri ana i te au oroenua; e kake kotou, e te aronga akaoro oroenua ra, ka tu ua atu ei ma to kotou au pare; ka akainuinu ei i te au korare, ka kakau na i te kakau tamaki.

5 Eaa te mea i te akara anga atu au kua mataku ratou? Kua oki ki muri, e te aronga ririnui, kua taia ïa ki raro, kua ati viviki ra, kare i akara ki muri: kua akapiniia e te mataku, te tuatua mairā Iehova.

6 Auraka tei viviki ra e oro ke, auraka tei ririnui e ora; tei te pae i apatokerau ra; i te nia o te vai ra ko Eupharati, kua turori ratou, e kua inga.

7 Koai teia e akateitei mai ki runga mei te vai puke, tei oro viviki ua mai tona vai, mei te au kauvai ra?

8 Ko Aiphiti tei akateitei ki runga mei te vai puke, e tei oro viviki ua mai tona vai, mei te au kauvai ra; kua na ko aia, E kake atu au, kia ninaia te enua iaku, e akapou au i te oire, e tei noo katoa i reira.

9 Ka kake ana i te au oroenua; kia akatae te au kariota; kia aere atu ta aronga ririnui, ko Kusa, e ko Phuta, i tei rave i te paruru ra; e te ngati Luda, ko tei karape i te akainana ana ra.

10 Ko te rā ra teia no te Atu no Iehova Sabaota, e rā akaoko anga ra, kia akaoko atu aia i tona ra au enemi: ka kai oki te koke, ka iu, e ka kona i to ratou toto: e atinga oki ta te Atu ra, ta Iehova Sabaota ra, i te enua i te pae i apatokerau, i te pae vai i Eupharati ra.

11 Ka aere ki runga ki Gileada, ka rave ei i te vairakau, e te tamaine paretenia o Aiphiti ra; e mea puapinga kore taau rave anga i te vairakau e manganui; kare oou e ora.

12 Kua kite te pa enua i toou reo aue: kua turori oki te toa i te toa, ku inga kapipiti raua.

13 Te tuatua ta Iehova i tuatua mai ki te peroveta ra kia Ieremia, no te aerenga mai o te ariki o Babulonia ra ko Nebukanesa, e ta i te enua ra i Aiphiti.

14 E akakite kotou i Aiphiti, e akakite pu i Migadola, e akakite pu i Nopha, e Tahapene, e karanga atu kotou, Takai ketaketa na, ka akateateamamao ia koe uaorai; kua akapou oki te koke e pini ua ake koe nei.

15 Eaa te mea e turakiiaʼi to au tangata ririnui ra? kare akera ratou i mou, no te mea na Iehova ratou i opara ki raro.

16 E manganui tana i akaturori, e kua inga rai tetai ki runga i tetai: i tuatuaʼi ratou e, Ka tu, aere mai ka aere ki to tatou ra au tangata, e ki to tatou enua i anau ei ra, i te koke akapou nei.

17 Kua kapiki atura ratou i reira, Ko te ariki o Aiphiti ra ko Pharao, kua pou; kua topa tona tuatau i akonoia ra.

18 Te ora nei au, te tuatua maira te Ariki, no na te ingoa ko Iehova Sabaota ra, Koia ïa, mei ia Tabora i rotopu i te au maunga ra, e mei ia Karamela i taatai, e aere mai aia.

19 Ka akateateamamao ana i taau au apinga no te tuikaanga, e te tamaine i noo i Aiphiti ra: e riro oki Nopha i te tanea, e pou, e kare rava e nooia.

20 Kua tu a puakatoro ua ou manea ua atu Aiphiti, te aere maira ra te mate, mei te pae i apatokerau mai, i te aere anga mai.

21 E tau tona ra au tangata ouia i roto iaia ra i te puakatoro akamatuia ra; kua ariu ke ra oki te reira katoa ra, kua ati katoatoa ra, kare rava i mou mai; no te mea kua tae ki to ratou rā e mate ei ra; te tuatau e tutakiiaʼi ratou ra.

22 E riro te tangi o tona reo mei to te ovi; ka aere oki ratou ma te nuku tamaki, e ma te au tapae ka aere atu ei ratou iaia, mei te aronga pari rakau ra.

23 Ka tipu ratou i te vaorakau nana, te tuatua maira Iehova, kore ua ra e ope kia kimi; e maata oki ratou i to te tāpaki, te kore e ope kia tatau ra.

24 Kua taakamaia te tamaine o Aiphiti; kua orongaia atu ki te rima o te tangata i te pae ia apatokerau ra.

25 Kua tuatua mairā Iehova Sabaota ra, te Atua o Iseraela; I na, e tutaki au ia Amona i No ra, e ia Pharao, e ia Aiphiti, e tona katoa ra au atua, e to ratou au ariki; koia oki a Pharao, e te aronga katoa e irinaki iaia:

26 E tuku atu au ia ratou ki te rima o te aronga i kimi mai ia ratou kia mate; ki te rima o te ariki o Babulonia o Nebukanesa, e te rima o tona au tavini; e tangataia ra te reira a muri ake, mei tei te au rā taito ra, te tuatua mairā Iehova.

27 Auraka ra koe e mataku, e taku tavini e Iakoba e, auraka katoa koe e taitaia, e Iseraela e: i na, e akaora au ia koe mei te ngai mamao mai, e toou ra uanga mei te enua mai i tuikaaʼi ratou; e oki mai oki Iakoba, ka akaea marie ei, e e noo mataku kore ua, kare oki tetai e akamataku mai.

28 Auraka koe e mataku, e taku tavini e Iakoba, te tuatua mairā Iehova: ei vaitata katoa au ia koe; rave akaope au i te pa enua katoa i taku i tuaru atu ia koe ra, kare ra au e rave akaope ia koe, e ako ra au ia koe ma te tuatua-tau, kare ra e tuku uaia koe ma te ako kore.