Ezekiela

28 KUA tae maira oki te tuatua a Iehova kiaku nei, na ko maira,

2 E te tamaiti a te tangata na, e karanga atu koe ki te ariki o Turia ra, Te na ko maira te Atu ra ko Iehova; No te mea, kua akateiteiia toou ra ngakau, e kua tuatua koe e, E Atua au, te noo nei au i te noo anga o te Atua, i rotopu i te moana ra; e tangata ra koe, e kare i te Atua, akamou uaʼi koe i to ngakau mei te ngakau o te Atua ra.

3 I na, e pakari maata toou i to Daniela; kare rava e tuatua muna e tika ia ratou kia uuna ia koe:

4 No toou ra pakari e toou ra kite i raukaʼi taau ra apinga nui, i raukaʼi te auro e te ario i roto i taau ra uipa anga apinga:

5 No te maata o toou pakari, e taau oko anga, i maataʼi taau apinga, e no to apinga nui i teitei ei toou ngakau:

6 E teianei, te na ko maira te Atu ra ko Iehova; No te mea, kua akamou koe i toou ngakau mei te ngakau o te Atua ra;

7 E teianei, i na, e arataki mai au i te tangata ke ke, tei rikarikaia e te pa enua, ki runga ia koe: e na ratou e unui i ta ratou au koke ki te manea o taua pakari noou ra, e na ratou e akaviivii i toou kakā.

8 E arataki mai ratou ia koe ki raro i te vaarua ra, e mate oki koe i te mate o te aronga i taia i rotopu i te moana.

9 E tuatua mairai ainei koe, E Atua au, ki mua i te aroaro o tei ta mai ia koe ra? e tangata oki koe, e kare i te Atua, i te rima o tei ta mai ia koe ra.

10 Ka mate koe i te matenga o te aronga peritome koreia i te rima tangata ke ke ra: ko au oki tei karanga, te tuatua maira te Atu ra ko Iehova.

11 Kua tae mairai oki te tuatua a Iehova kiaku nei, na ko maira,

12 E te tamaiti a te tangata na, ka atu ana koe i tetai peʼe tangi i te ariki o Turia ra, e karanga atu kiaia, Te na ko maira te Atu ra ko Iehova; E sigilo meitaki roa ïa koe, kua ki koe i te pakari, e kua manea rava i te purotu.

13 I Edene koe i te kainga o te Atua ra; te au toka memeitaki ravarai ra tei runga ake ia koe, te saradio, te topazi, e te ieloma, te berulo, te sema, e te iasepe, te saphiro, te emeradino, e te bereketa, ma te auro: te angaanga anga o to au pau e to au koe tei akonoia i roto ia koe i te rā i angaiaʼi koe na.

14 Ko koe te kerubi tamaru akamainuia ra: e naku koe i akanoo: no runga koe i te maunga tapu o te Atua ra, e kua aaere ua koe na roto i te au toka ai ra.

15 I tika tikai koe i toou na au aerenga mei te rā mairai i angaiaʼi koe ra, e kia kitea uaia atu te kino i roto ia koe ra.

16 No te maata o taau au apinga oko i akakiiaʼi koe e ratou i rotopu ki te takinga-kino, e kua ara koe na: ka titiri atu ei au ia koe mei runga i te maunga o te Atua mei te apinga viivii: ka akapou atu oki au ia koe, e te kerubi tamaru ra, mei rotopu mai i te au toka ai ra.

17 Ko toou purotu te mea i parau ei toou ngakau ra, ko toou kakā te mea i viivii ei toou ra pakari: ka titiri atu au ia koe ki raro i te one, ka tuku au ia koe ki mua i te aroaro o te ui ariki, kia akara mai ratou ia koe.

18 No te maata o toou ra au kino, e no te tika koe o taau ra oko anga, i viivii ei toou ra ngai-tapu: ka apai mai ei au i te ai no roto ia koe ra, e ka pou koe i te reira, e ka akariro au ia koe ei reu ki runga i te enua nei, ki mua i te aroaro o te aronga ravarai e akara mai ia koe ra.

19 To roto i te au tangata katoa nei i kite ia koe ra, ka va ua ratou ia koe: ka riro oki koe ei rikarika anga, e kore atura koe e tuatau ua atu.

20 Kua tae mairai oki te tuatua a Iehova kiaku nei, na ko maira,

21 E te tamaiti a te tangata na, ka anga atu koe i to mata kia Sidona, e ka totou atu koe i te reira,

22 E ka karanga atu, Te na ko maira te Atu ra ko Iehova; I na, kare au e tau ia koe, e Sidona; e ka akakakāia au i rotopu ia koe ra: e kite oki ratou e ko Iehova au, kia tuku au i te utunga i roto iaia, e kia akatapuia au i roto iaia ra.

23 E akaunga atu oki au i te maki-mate ki roto iaia, e te toto ki roto i tona ra au arataa; e inga oki te aronga puta i roto iaia ki te koke, kia tae mai ki runga iaia e pini ua ake; ka kite oki ratou e ko Iehova au.

24 E kare atura o te ngutuare o Iseraela e rakau putaputa, e te mea taratara e mamae ei ra e pini ua ake ratou ra, i tei akavaavaa mai ia ratou; ka kite oki ratou e ko te Atu ra au ko Iehova.

25 Te na ko maira te Atu ra ko Iehova; Kia akaputuputu mai au i te ngutuare o Iseraela mei roto mai i te au tangata i pueurikiriki ke ei ratou ra, ei reira au e akatapuiaʼi e ratou ki mua i te aroaro o te au etene, e noo oki ratou ki to ratou uaorai enua, taku i oronga no toku tavini no Iakoba.

26 E noo ponuiaau ua ra oki ratou i reira, e patu oki ratou i te are, e tanu oki i te kainga vine; koia ïa, ka noo ratou ma te mataku kore, kia oti iaku i te akautunga atu ia ratou katoatoa i akavaavaa mai ia ratou e pini ua ake; e kite oki ratou e ko au to ratou Atua ko Iehova.