1 Ariki

5 KUA tono maira te ariki o Turia ra ko Hirama i tona au tavini kia Solomona ra; kite akera aia i te rongo e kua akatainuia aia ei ariki ei tupau i tona metua: i anoano ua ana oki a Hirama ia Davida.

2 Kua tono akerā Solomona i te karere kia Hirama, karanga atura,

3 Kua kite oki koe e, kare akera i tika i toku metua ia Davida kia akatu aia i tetai are no te ingoa o tona ra Atua no Iehova, no te mea kua pini takakaiia aia e te tamaki, e kua tukuia akenei e Iehova tona au enemi i raro ake i tona tapuae.

4 I teianei ra, kua oronga taku Atua ra ko Iehova i te au noku e pini ua ake, kare oki e enemi, kare oki e kino.

5 E i na, te akakoro nei au i tetai are e akatu no te ingoa o taku Atua no Iehova, ta Iehova oki i tuatua mai ki toku metua ra kia Davida, ka tuatua mai ei ra e, Na to tamaiti, taku e akanoo ki runga i to terono ei tupau ia koe ra, nana e akatu i te are no toku nei ingoa.

6 E tenana, e akaue koe i te tangata e tipu i te arezi naku i Lebanona; ka kapiti katoa atu te au tavini noku ki toou ra au tavini: e taau apinga e akakite maira, ko taku ïa e apai atu ki te au tavini noou ra: kua kite oki koe kare e tangata i o matou nei e aite ki to Sidona i te kite i te tipu rakau ra.

7 E kite akerā Hirama i te tuatua a Solomona, mareka rava akera aia, kua tuatua akera, Kia akameitakiiā Iehova i teianei rā, ko tei oronga mai i te tetai tamaiti pakari na Davida ei ariki i rungao i teianei aronga maata.

8 Kua tono akerā Hirama i te karere kia Solomona, tuatua maira, I manako ua ana au i taau i tono mai i te karere kiaku nei: kua tika iaku taau i tuatua maira, naku e rave, i te arezi, e te berusi.

9 Na toku ra au tavini e kika mai mei Lebanona mai e taatai; e naku e akapaata na tai e tae ua atu ki te ngai taau e akakite mai kiaku, ka vaoo atu ei i reira, ka rave mai ei koe ra: ka akatika maira koe i toku anoano, naau e akaangai mai i toku ra au tangata ki te kai.

10 Kua oronga mairā Hirama i te arezi e te berusi na Solomona, e maa akera tona anoano.

11 Kua apai aturā Solomona, okotai takau tausani kora sitona na Hirama ei kai na tona ra ngutuare, okotai takau oki kora inu reruia: ko tei apiia ïa e Solomona kia Hirama, i tera mataiti i tera mataiti.

12 Kua oronga maira oki a Iehova i te pakari no Solomona, tana oki i tuatua maira: au iora ta Solomona raua ko Hirama; e kua papau iora raua i ta raua koreromotu.

13 Kua akataka iorā Solomona i te urupu tangata no roto ia Iseraela katoa; e taua urupu tangata ra, e toru ïa ngauru i te tausani.

14 Kua tono atura aia ia ratou ki Lebanona, okotai ngauru i te tausani i te marama okotai, e ope rava ake ratou ra; okotai o ratou marama i Lebanona, e rua marama i te ngutuare: e ko Adonirama to rungao i taua urupu ra.

15 E itu oki ngauru i te tausani to Solomona tangata e apai i te apinga; e varu ngauru i te tausani anga i te aronga tarai toka i runga i te maunga;

16 Taka atura to Solomona au tangata akamaroiroi i rungao i taua angaanga ra, e toru ïa tausani e toru anere, ko te akakite ïa i te au tangata i rave i taua angaanga ra.

17 Kua akaue akera te ariki, e kua rave maira ratou i te toka mamaata, te toka oko maata, e te toka taraiia, ei akamou i te papa o taua are ra.

18 Kua tarai iora te au rave angaanga a Solomona, e te au rave angaanga a Hirama, e te au Gebala, e kua akonokono i te rakau e te toka ei akatu i taua are ra.