Ezekiela

30 KUA tae mairai oki te tuatua a Iehova kiaku nei, na ko maira,

2 E te tamaiti a te tangata na, ka totou, ka karanga atu ei, Te na ko maira te Atu ra ko Iehova; Ka aue kotou, E ae oki to taua rā ra!

3 No te mea kua vaitata taua rā nei, kua vaitata oki te rā o Iehova ra, e rā tapokipoki ïa; e riro ïa ei tuatau no te au etene.

4 E tae mai oki te koke ki runga ia Aiphiti, e mamae maata tei Kusa, kia inga tei taia i Aiphiti, e ka rave keia e ratou tona tini, e kiriti tumuia aia.

5 Ko Kusa, e ko Phuta, e ko Luda, e te au tangata irokia ravarai, e ko Kuba, e te au tangata no te enua i koreromotuia maira, ka inga ïa ma ratou katoa ki te koke.

6 Te na ko mairā Iehova, Te aronga e tauturu ia Aiphiti ra, e inga ïa; e te nengonengo o te ririnui nona ra, e tukuia ïa ki raro: mei te punanga i Siene ratou i te inga anga i te koke i roto iaia ra, te tuatua maira te Atua ra ko Iehova.

7 E tanea oki ratou i rotopu i te au enua i tanea ra, e tona au oire ei rotopu katoa i te au oire i tamoana uaia ra.

8 Ka kite oki ratou e ko Iehova au, kia tuku au i te ai ki roto ia Aiphiti, e kia ope tona au tauturu i te aatiia.

9 I taua rā ra e riro atu ei iaku nei te au karere na runga i te pai, ei akamataku i to Kusa vareaau ua ra, e rokoia mai ratou e te mamae maata, mei to te rā o Aiphiti ra; i na oki, te vaitata maira.

10 Te na ko maira te Atu ra ko Iehova: E akakore au i te tini o Aiphiti, i te rima o te ariki o Babulonia o Nebukanesa.

11 Koia e tona katoa ra au tangata , ko tei matakuia e te pa enua ra, te ka aratakiia mai ïa ei akapou i taua enua ra: e unui ratou i ta ratou koke ia Aiphiti, e akaki oki i te enua ki tei taia.

12 E tamarō oki au i te au kauvai, ka oko atu ei i te enua ki roto i te rima o te aronga kino ra: ka akatanea oki au i taua enua ra, e to roto katoa i te reira ra, i te rima o te tangata ke ke: naku, na Iehova i tuatua ra.

13 Te na ko maira te Atu ra ko Iehova; E akapou au i te au idolo, e e akakore au i te au tiki, i Nopha ra; e kare atura e ariki uenuaia i te enua ra i Aiphiti: e naku e akatupu i te mataku i te enua ra i Aiphiti.

14 E akatanea oki au ia Patarosa, e e tuku au i te ai i Zoana, e e akautunga atu au ia No.

15 E riringi atu oki au i toku riri otooto ki runga ia Sini, te ririnui o Aiphiti ra; e e tipu ke atu au i te tini o No.

16 E e tuku au i te ai ki roto ia Aiphiti: e mamae maata to Sini, e ngaangaa oki No, e tumatetenga Nopha i te au rā katoa.

17 Te au tangata ou i Avena e i Pibeseta, te ka inga ïa i te koke: e aua nga oire ra te ka riro ïa ei tuikaa.

18 E akapoiriia oki te ao i Tahapene, kia aati au i te au zugo o Aiphiti i reira: e te nengonengo o te ririnui nona ra, e akakoreia ïa i roto iaia ra: kareka aia ra, ka tapokiia aia e te tumurangi, e ka riro tana au tamaine ei tuikaa.

19 E e tuku ïa au i te utunga ki runga ia Aiphiti: e kite oki ratou e ko Iehova au.

20 E tae akera ki te mataiti okotai ngauru ma tai ra, i te marama mua ra, e te rā itu i taua marama ra, i tae mai ei te tuatua a Iehova kiaku nei, na ko maira,

21 E te tamaiti a te tangata na; kua aati au i te rima o te ariki o Aiphiti ra o Pharao; e i na, kare ïa e vaîia ei akaora, e i tākaiia e tetai tākai ra, ei akaketaketa e mou ei te koke ra.

22 E teianei, te na ko maira te Atu ra ko Iehova; I na, kare au e tau i te ariki o Aiphiti ra ia Pharao, e aati au i ona puke rima, i tei ketaketa e tei paruparu katoaia ra; e topa oki iaku te koke i tona rima.

23 E akangaoro aere atu au i to Aiphiti ki roto i te au enua ra, e akapueurikiriki ke au ia ratou na roto i te pa enua ra.

24 E akamaroiroi au i nga rima o te ariki o Babulonia, e e tuku au i taku koke ki roto i tona rima: aati ra au i nga rima o Pharao, e e ngunguru ua aia ki mua iaia i te ngunguru o te tangata puta mate ra.

25 E akamaroiroi oki au i nga rima o te ariki o Babulonia, e topa ra nga rima o Pharao ki raro; e kite oki ratou e ko Iehova au, kia tuku au i taku koke ki roto i te rima o te ariki o Babulonia, e ka akatika aia i te reira ki runga i te enua ra ia Aiphiti.

26 E e akangaoro aere atu au i to Aiphiti ki roto i te au enua ra, e e akapueurikiriki ke au ia ratou na roto i te pa enua ra; e kite oki ratou e ko Iehova au.