Genese

38 TEI taua tuatau ra, to Iuda vaoo anga i tona ai taeake, e aere atura e tapae iora ki o tetai tangata Adulama, ko Hira tona ingoa.

2 E kite aturā Iuda i tetai tamaine i reira, na tetai ngati Kanaana ra, ko Sua tona ingoa; e kua akaipoipo iora aia iaia, e moe atura iaia.

3 Kua to iora oki aia, e anau maira, e tamaiti; tapa iora aia i tona ingoa ko Era.

4 Kua to akaou iora oki aia, e anau maira, e tamaiti; tapa iora i tona ingoa ko Onana.

5 Kua anau akaou mairai oki aia i tetai tamaiti; tapa iora i tona ingoa ko Sela: tei Keziba oki aia, ka anau ei aia iaia.

6 Kua rave iorā Iuda i tetai vaine na tana tama mua ra na Era, ko Tamara tona ingoa.

7 E e tangata tuatua kino taua tama mua a Iuda ra, ko Era, i mua i te aroaro o Iehova; e mate iora aia ia Iehova.

8 Kua karanga aturā Iuda kia Onana, Ka tiki e akaipoipo i te vaine a toou tuakana, ka akaanau tama ei tamariki na toou tuakana.

9 No te mea ra kua kite a Onana e, kare ïa tamariki e tuatuaia e nana uaorai; kua akakore aia i te tamariki, kare i akaanau ei tamariki na tona tuakana, moe uaʼi aia i taua vaine a te tuakana ra.

10 E mea kino roa ra tana i rave ki mua i te aroaro o Iehova ra; i tamate katoa atu ei aia iaia.

11 Kua karanga aturā Iuda ki tana unonga kia Tamara, E noo takaua i te are o toou metua nei, e kia pakari taku tamaiti nei ko Sela: karanga oki aia e, Ko te mate katoa aea aia, mei ona nga tuakana i mate ra. Aere aturā Tamara, noo atura i te are o tona metua ra.

12 E manganui akera te rā, mate iora taua tamaine a Sua ra, te vaine a Iuda; e mao akera to Iuda aue, e aere atura aia ki te au tangata pakoti mamoe nona ra ki Timenata, koia, e tona oa ra ko Hira i Adulama.

13 Kua akakiteia mairā Tamara, na ko maira, I na, te aere ra to metua ongoai ki Timenata e pakoti i tana au mamoe ra.

14 Kua kopae atura aia i tona kakau takaua ra, e kua kakau iora ki te kakau tapoki vaî iora iaia uaorai, noo iora i te ngutupa i Enaima, i te arataa ki Timenata ra: kua kite oki aia e, kua pakari a Sela, kare ra aia i o atuia ei vaine nana.

15 E kite aturā Iuda iaia, kua manako aia e, e vaine akaturi; kua tapoki oki aia i tona mata.

16 Kua tapae atura aia kiaia ra, kua karanga atura, Teia taku tuatua kia koe, o atu au ki ko na kia koe na; kare oki aia i kite e, ko te unonga ïa nana. Kua tuatua maira aia, Eaa taau e o mai naku, kia tukuia mai koe ki ko nei kiaku nei?

17 Kua karanga atura aia, E akau atu au kia koe i tetai punua puaka-nio no roto i te anana akera. Kua tuatua maira aia, E oronga mai ainei koe i tetai apinga ei akairo naku e kia akau mai koe i taua puaka ra?

18 Kua karanga atura aia, Eaa taku apinga e apai atu ei akairo naau? Kua tuatua maira aia, Toou sigilo, e to tatua na, e to rakau i to rima na. Kua apai atura aia i taua au apinga ra kiaia, e kua aere atura ki roto iaia ra, e kua to iora aia iaia ra.

19 Kua tu akera aia ki runga, aere ke atura, e kopae atura i tona kakau tapoki ra, e kua kakau iora ki te kakau vaine takaua nona ra.

20 Kua akau aturā Iuda i taua punua puaka-nio ra, i te rima o te oa ko te tangata Adulama ra, kia rave mai aia i te apinga i mouria e taua vaine ra; kare ra aia i kitea e ia.

21 Kua ui atura aia ki te au tangata no tona ngai ra, na ko atura, Teiea te vaine akaturi i Enaima i te pae arataa ra? Kua tuatua maira ratou, Kare o ko nei vaine akaturi.

22 Kua oki maira aia kia Iuda ra, e tuatua maira, Kare aia i kitea e au; e kua tuatua maira oki te au tangata no taua ngai ra, Kare roa e vaine akaturi i tae mai i ko nei.

23 Kua karanga aturā Iuda, E vaoo ua atu kia mou ua na aia i tana, ko te akama aea taua: i na, kua akau oki au i teianei punua puaka-nio, e kare aia i kitea e koe.

24 E ope akera nga marama e toru, kua akakiteia mairā Iuda, na ko maira, Kua akaturi to unonga ra, ko Tamara; e i na oki, kua nui aia i te akaturi. Kua karanga aturā Iuda, Ka arataki mai iaia ki vao nei, kia taʼuia ki te ai.

25 E kia aratakiia mai aia ki vao, kua tono atura aia i te karere ki te metua ongoai nona ra, na ko atura, Ko te tangata nana teianei au apinga, i nui ei au nei: e kua karanga atura oki aia, Ka akara na, ko taku ïa tuatua kia koe, e naai taua au mea nei, te sigilo, e te tatua, e te rakau nei.

26 Kua aaki mairā Iuda i taua au apinga ra, e kua tuatua maira, E tuatua-tika tana i taku; ko au kare i oronga atu iaia ki taku tamaiti nei kia Sela. Kare roa aia i kite akaou atu iaia.

27 E tae akera ki te tuatau e anau ei aia ra, e i na, e maanga tei roto i tona kopu.

28 E tei taua mamae anau anga nona ra, kua tuku maira tetai i tona rima ki vao, kua opu iora te akaanau, e kua takai i te ao muramura ki runga i taua rima nona ra, na ko akera, Ka riro teianei i te tama mua.

29 Kia akaoki ra aia i tona rima, i na, kua anau maira tetai; kua tuatua akera aia, Eaa koe i vaʼi ua mai ei? ei runga ia koe teianei vaʼinga: i tapaiaʼi tona tona ingoa ia Phareza.

30 E muri akera kua anau maira tona taeake, tei iaia te ao muramura i te rima ra; e i tapaia tona ingoa ia Zara.