Numero

30 KUA karanga aturā Mose ki te aronga mamaata i te au kopu i te tamariki a Iseraela, na ko atura, Teia te tuatua ta Iehova i akaue mai.

2 Kia tia te tangata i te tia ia Iehova ra, e kia taputou oki i te taputou akamou iaia uaorai: auraka rava aia e akaatikau i tana tuatua, e rave aia i te au mea katoa ta tona vaa i tuatua ra.

3 E kia tia oki te vaine i te tia ia Iehova ra, e kia tuatua aia e tamou iaia uaorai e rave ra, e tei roto rai aia i te ngutuare o tona metua tane, e e vaine ou; 4 E kia akarongo tona metua tane i taua tia nana ra, e tana tuatua akamou iaia uaorai ra, e kua akatika muteki ua tona metua tane: ka mou taua au tia katoa nana ra, e te au tuatua katoa tana i akamou iaia uaorai ra, ka mou ïa.

5 Kia kore ra tona metua tane i akatika mai iaia i te rā i kite ei aia ra; kare rava tetai o tana au tia, e tana tuatua i tana i tamou iaia uaorai ra, e mou: e na Iehova e akakore mai i tana ara, no te mea kare tona metua tane i akatika mai.

6 E tia ta te vaine noo tane ra, e i tuatua tona vaa, e kua mou aia i tana uaorai tuatua;

7 E kite akera tana tane, kua akatika muteki ua aia i te rā i akarongo ei aia ra; ka mou rava tana tia i reira, e te au tuatua tana i akamou iaia uaorai ra, ka mou ïa:

8 Kia kore ra tana tane i akatika mai iaia i te rā i kite ei aia ra, e akakore aia i taua tia nana tana i tia ra, e ta tona vaa i tuatua ra, i tana i tamou iaia uaorai ra; e na Iehova e akakore i tana ara.

9 Kareka te tia a te vaine takaua i mate te tane ra, e ta tei akatakaia ra, i ta ratou i tamou ia ratou uaorai ra, ka mou ïa ta ratou.

10 E kia tia te vaine i te noo anga i te ngutuare o te tane ra, e kia tamou iaia uaorai i te tuatua taputou ra; 11 E kite akera tana tane, kua akatika muteki ua aia, kare i akakore i tana tuatua; e mou tana au tia katoa i reira, e te au tuatua ravarai tana i tamou iaia uaorai ra, ka mou katoa ïa. 12 Kua akakore ra tana tane i tana tuatua i te rā i kite ei aia ra; kare rava te au tuatua katoa no roto i tona vaa, i tana i tia ra, e tana i tamou iaia uaorai, e mou i reira: kua akakoreia e tana tane; e na Iehova e akakore i tana ara. 13 Te au tia katoa, e te au taputou tamou taakaaka iaia uaorai ra, e tika i tana tane kia akamou, e tika oki i tana tane kia akakore.

14 Kia muteki ua ra tana tane i tera rā i tera rā; kua akamou aia i te au tia katoa nana i reira, e tana au tuatua tamou katoa, e vai ki runga iaia ra; kua akamou oki aia, no te mea kua muteki ua aia i te rā i kite ei aia ra.

15 Kua kite takere ana ra aia i tana au tia e na muri ake aia i te akakore, ei runga iaia tana ara vai ei. 16 Ko nga akonoanga eia ta Iehova i akaue mai kia Mose ra, no te tane e tana vaine, no te metua tane e tana tamaine ou, i te are o tona metua ra.