Ezekiela

43 KUA arataki atura aia iaku ki te ngutupa, te ngutupa e akara tika ki te itinga o te rā ra:

2 E i na, te aere maira te kakā o te Atua o Iseraela, mei te pae i te itinga o te rā mai; e tona reo, kua aite ïa ki te aruru vai e manganui ra: e kua mārama te enua i te kakā nona ra.

3 E te tu o te orama taku i kite ra, mei te tu o te orama i kitea e au, iaku i aere mai e akapou i te oire nei: e te orama ra, ko te tu ïa o te orama taku i kite ki te pae vai ra ko Kebara; e kua tipapa iora au ki raro i taku mata.

4 E kua tae maira te kakā o Iehova ki roto i te are, na te ngutupa e akara tika atu ki te pae ki te itinga o te rā ra.

5 E kua rave maira te Vaerua iaku, e kua apai maira iaku ki roto i te paepae ki roto ra; e i na, kua ki akera te are i te kakā o Iehova.

6 Akarongo atura au i tetai i roto i te are i te tuatua anga mai kiaku; e e tangata te tu ua maira ki toku pae:

7 E kua tuatua maira aia kiaku, E te tamaiti a te tangata na, ko te vairanga teia o toku nei terono, e te takainga teia o toku nei tapuae, , ei ko nei au e noo ei ki rotopu i te tamariki a Iseraela e tuatau ua atu, kare oki te ngutuare o Iseraela e akaviivii akaou i toku ingoa tapu, ko ratou, e to ratou au ariki, i ta ratou akaturi anga, e i te au turuma o to ratou au ariki ki runga i to ratou au ngai teitei.

8 Ko ratou i akapiri i to ratou turuki ki te pae i toku turuki, e to ratou kopa ki te pae i toku kopa, e e patu anake tei rotopu iaku e ratou, viivii atura toku ingoa tapu ia ratou i ta ratou au mea viivii i raveia e ratou: i akapou ei au ia ratou i toku riri.

9 Teianei ra, kia tuku ke atu ratou i ta ratou au akaturi anga, e te au turuma o to ratou au ariki, kia atea ke atu iaku nei, e ko au te ka noo ki rotopu ia ratou i reira e tuatau ua atu.

10 Ko koe, e te tamaiti a te tangata na, ka akakite i teianei are ki te ngutuare o Iseraela, kia akama ratou i ta ratou au ara, e na ratou e aite i te tu o taua are ra.

11 E kia akama ratou i te au mea katoa i raveia e ratou ra, ka akakite atu ei kia ratou i te tu o te are, e tona aite, e tona au tomoanga ki vao, e tona au tomoanga ki roto, e tona au tu ravarai, e to reira au akonoanga katoa, e to reira au peu katoa, e to reira au ture katoa: ka tata oki koe ki mua i to ratou mata, kia akono ratou i tona au peu katoatoa, e tona au akonoanga ravarai, e kia rave oki i te reira.

12 Ko te ture teia o te are; Ki runga i te take o te maunga i tona kotinga e pini ua ake, e mea tapu rava ïa. I na, ko te ture ïa o taua are nei.

13 Teia oki te aite i te atarau i te kubiti ra: Te kubiti ra, okotai ïa kubiti e te rima okotai; tei raro pae ra, okotai ïa kubiti, okotai oki kubiti i te pararauare, e tona urupae i te tapa o te reira e pini ua ake, okotai ïa angaonu: ko te ngai a rungao teia o te atarau.

14 E mei raro i te one ra e tae akera ki te nuka ki raro ra, e rua ïa kubiti, okotai oki kubiti i te pararauare; e mei te nuka iti e tae akera ki te nuka maata ra, e a ïa kubiti, okotai oki kubiti i te pararauare.

15 E te atarau ra, e a ïa kubiti; e mei te atarau ra e i runga ra, kia a ïa tara.

16 E taua atarau ra, okotai ngauru ma rua ïa kubiti i te roa, okotai ngauru ma rua i te pararauare, okotai rai aite i te reira i nga aro katoa e a ra.

17 E te nuka ra, okotai ngauru ma a ïa kubiti i te roa, okotai ngaruru ma a oki i te pararauare, i nga aro katoa e a o te reira ra; e te ei i rungao i te reira ra, ei afa kubiti ïa: e te pae ki raro i te reira ra, okotai ïa kubiti e pini ua ake; e tona ara nukanuka ra, e akara tika ïa ki te itinga o te rā ra.

18 E kua tuatua maira aia kiaku, E te tamaiti a te tangata na, te na ko maira te Atu ra ko Iehova; Teia te au akonoanga no te atarau ra, i te rā e angaiaʼi ra te reira e ratou ra, ei apai anga atinga karakaratio ki rungao ra, e ei pîpî anga toto ki rungao ra.

19 Ei reira koe ka o atu ei ki te kau taunga ra ki te ngati Levi ra, no te uanga o Zadoka, ko tei akavaitata mai iaku ra ei raverave iaku ra, te tuatua maira te Atu ra ko Iehova, i tetai puakatoro ou ei tarangaara.

20 E rave oki koe i te toto no te reira, ka tuku atu ei ki runga i nga tara e a ra, e ki runga i nga poo e a o te nuka ra, e ki runga i te ei ra e pini ua ake: e e akapera koe i te tamā anga atu i te reira, e e apai atu i te tapokiangaara no te reira.

21 E naau rai e rave i te puakatoro tarangaara, e nana te reira e tau ki te ai ki te ngai o te are i akonoia ra, ki vao mai i te ngai-tapu ra.

22 E i te po rua ra, ka apai ei koe i tetai punua puaka-nio ma te kino kore ei tarangaara; e tamā oki ratou i te atarau mei ta ratou i tamā ki te puakatoro ra.

23 Kia oti i te tamāia e koe, ka apai koe i tetai puakatoro ou kino kore, e tetai mamoe toa kino kore no roto i te anana ra.

24 E naau e apai i te reira ki mua i te aroaro o Iehova, e na te kau taunga e titiri i te tai ki rungao i te reira, e na ratou e apai i te reira ei atinga karakaratio na Iehova.

25 Kia po itu koe i te akapena anga i te puaka-nio ei tarangaara, taki tai i te au rā katoa ra: e akapena katoa ratou i tetai puakatoro ou, e tetai mamoe toa no roto i te anana, auraka ei kino.

26 Kia po itu ratou i te apai anga atu i te tapokiangaara no te atarau, ei tamā anga i te reira; e akatapu oki ratou ia ratou uaorai.

27 E ope akera taua au rā ra, kia tae ki te rā varu, e ko mua atu, na te kau taunga e apai i ta kotou au atinga karakaratio ki runga i te atarau, ma ta kotou au atinga au katoa ra; e naku kotou e kite atu, te tuatua maira te Atu ra ko Iehova.