Exodo

26 E ANGA katoa koe i tetai puakapa kia okotai ngauru kakau tapoki, ei orongā i taviriia ra, ma te kerekere, e te purapura, e te muramura; ma te au kerubi, ei angaanga na te taunga karape, me rave koe.

2 Kia rua ngauru e varu ara te kubiti i te roa o taua au tapoki katoa ra, e kia a oki kubiti i taua tapoki katoa ra i te pararauare: kia okotai rai tu aite o taua au tapoki ravarai ra.

3 Ko e rima tapoki ra ka tupaupauia ïa, tetai e tetai; e ko e rima oki tapoki e tupaupau katoaia ïa, tetai e tetai.

4 E anga oki koe i te tātai kerekere i te tapa o te tapoki, i te tapa i vao i te topiri anga ra; e akapera katoa i te anga i te tapa o te tapoki i vao ra, ei topiri anga atu i tetai.

5 E rima ngauru aau tātai e anga i te tapa o tetai tapoki, e ka anga katoa oki koe i e rima ngauru tātai i te tapa o tetai tapoki, ko te topiriia ki tetai ra; kia piri nga tapoki ra i taua au tātai ra.

6 E anga oki koe i e rima ngauru tapeka auro ra, ka topiri ei i te au tapoki ra ki tetai ki tetai, ki taua au tapeka ra; kia riro ei puakapa okotai.

7 E anga katoa koe i te kakau tapoki uru puakanio ra, ei are i rungao i te puakapa ra; kia okotai ngauru ma tai kakau tapoki taau e anga.

8 E toru ngauru kubiti i te roa o taua au kakau tapoki katoa ra, e a oki kubiti o taua au kakau tapoki katoa ra i te pararauare: kia okotai rai tu aite taua au kakau tapoki katoa, okotai ngauru ma tai ra.

9 E tupaupau oki koe i nga kakau tapoki e rima ra e taka atura ïa, e nga kakau tapoki e ono ra oki e taka atura te reira, e ka atuatu koe i te ono o te kakau i te tuapoto atu o te Are ra.

10 E anga oki koe i te tātai e rima ngauru, ei te tapa o tetai kakau tapoki ei te tapa i vao ei topiri anga; e e rima ngauru oki tātai ei te tapa i vao i tetai kakau tapoki, kia topiriia nga kakau tapoki ra.

11 E anga oki koe i e rima ngauru tapeka veo, ka tuku ei i te au tapeka ki roto i te au tātai, ei topiri anga i taua tapoki ra, kia okotai rai.

12 E te manga paru i toe i taua au kakau tapoki Are ra, te afa o tetai kakau tapoki i toe ra, e vaoo ua atu kia tautau ua ana i te tua roa i te puakapa ra.

13 E te kubiti okotai i tetai pae, e te kubiti okotai oki i tetai pae, tei toe i te roa i te au kakau tapoki Are ra, e vaoo ua atu kia tautau ua ana i nga pae puakapa ra, i tetai pae, e i tetai pae, ei paruru.

14 E anga oki koe i tetai tapoki kiri mamoe rapakau muramuraia ra no te Are, e tetai tapoki kiri tutu ki rungao ra.

15 E tarai oki koe i te tapaanga rakau puakapa i te rakau ra e sitima, e akatu ua ki runga.

16 Kia okotai ngauru kubiti te roa o te tapaanga rakau okotai ra, okotai oki kubiti e afa kubiti te pararauare o te tapaanga rakau okotai.

17 Kia rua oki auri to te tapaanga rakau okotai, kia aite tikai te tu tetai e tetai: e akapera koe i te anga i te au tapaanga rakau ravarai no taua puakapa ra.

18 E te au tapaanga rakau no te puakapa taau e tarai, e rua ngauru tapaanga rakau i to te pae i apatonga ra.

19 E anga katoa koe i te turanga ario no raro ake i taua au tapaanga rakau e rua ngauru ra, kia a ngauru; e rua turanga to te tapaanga okotai, no nga auri e rua ra, e e rua turanga to tetai tapaanga, no nga auri e rua ra.

20 E e rua ngauru tapaanga rakau no tetai pae puakapa ra, no te pae i apatokerau ra:

21 E to te reira oki au turanga ario e a ngauru ra; e rua turanga to te tapaanga rakau okotai, e rua oki turanga to tetai tapaanga rakau.

22 E e ono oki aau tapaanga rakau e tarai no tetai pae puakapa i te pae i te opunga o te rā ra.

23 E tarai oki koe i e rua tapaanga rakau no nga poo o te puakapa, i tetai pae e tetai pae.

24 E tamouia oki aua nga tapa, anga ra ki raro, e tamou katoaia oki ki runga ki tetai mouranga ra; mei te reira katoa tetai e tetai; no nga poo ïa aua nga tapaanga rakau ra.

25 E varu ake aua nga tapaanga rakau ra, e to ratou turanga ario ra, okotai ïa ngauru ma ono turanga; e rua turanga i raro ake i te tapaanga rakau okotai, e rua oki turanga i raro ake i tetai tapaanga rakau.

26 E tarai oki koe i te tea i te rakau ra e sitima, ko e rima ra, no te au tapaanga rakau i tetai pae puakapa;

27 E rima oki tea no te au tapaanga rakau i tetai pae puakapa, e e rima oki tea no te au tapaanga rakau i te papani mai o te puakapa, i te pae i te opunga o te rā ra.

28 E te tea i rotopu ra, ko te na rotopu ïa i taua au tapaanga rakau ra, kia tae roa ïa ki tetai openga e tetai openga ei tamou anga.

29 E vaî oki koe i te au tapaanga rakau ki te auro, e te au tātai ra ei auro ïa kia anga, ei momono anga i te au tea ra; e ka vaî katoa koe i te au tea ki te auro.

30 E akapera koe i te akatu i taua puakapa nei, kia aite ki te tu i akakiteia atu kia koe ki runga i te maunga ra.

31 E ka anga oki koe i tetai paruru kerekere, e te purapura, e te muramura, e te orongā i taviriia ra, te angaanga na te taunga karape ki rungao ra; te au kerubi kia anga aia ra.

32 E ka akauta koe i te reira ki rungao i nga pou sitima e a, i vaîia ki te auro ra; e ei auro oki te au tapeka i runga i nga turanga ario e a ra.

33 Ka akauta koe i te paruru ki raro ake i te au tapeka kakau tapoki ra, ka apai ei koe i te aruna kite ra i reira i roto mai i te paruru ra; e taua paruru ra ta kotou kotinga i te ngai-tapu, e te ngai-tapu roa atu.

34 E tuku oki koe i te tapoki ki rungao i te aruna kite, i roto i te ngai-tapu roa atu.

35 E tuku oki koe i te kaingakai ra ki vao atu nei i taua paruru ra, e te vairanga lamepa i tetai pae kia aite ki te kaingakai ra, i tetai pae i apatonga i te puakapa ra; ka tuku koe i te kaingakai i te pae i apatokerau ra.

36 Ka anga katoa oki koe i te paruru no te tomoanga i te Are ra, ei kerekere, e te purapura, e te muramura, e te orongā taviriia ra, ma te angaanga akamanea ïa na te tui.

37 E tarai oki koe i e rima puke pou sitima no taua paruru ra, e vaî oki i te reira ki te auro i vao ra, e ei auro oki te au tapeka ra; e ka akato oki koe i e rima turanga veo no aua nga pou ra.