Iosua

22 KUA tiki aturā Iosua i te ngati Reubena, e te ngati Gada, e te kopu veenga o Manase ra i reira;

2 E kua karanga atura kia ratou, Kua akono kotou i te au mea ravarai ta te tavini o Iehova ra ta Mose i akaue mai ia kotou: e kua akamako mai oki kotou i toku reo i te au mea ravarai taku i akaue atu kia kotou na.

3 Kare rai kotou i akaruke i to kotou ai taeake i te au rā e manganui akenei e tae rava mai nei ki teianei rā, kua akono ra kotou i te ikuikuanga i akaueia mai e to kotou Atua e Iehova.

4 E teianei kua oronga mai to kotou Atua ra ko Iehova i te akaangaroi ki to kotou ai taeake, tana oki i tuatua mai kia ratou ra: ka oki kotou i tenana, e aere ki to kotou au puakapa, e to kotou tuanga enua, ta te tavini o Iehova ra ta Mose i oronga mai no kotou i tetai pae Ioridana ra.

5 Kia matakite ra, e akono tikai i te akauenga e te ture, ta te tavini o Iehova ta Mose i ikuiku mai ia kotou ra; kia inangaro rai kotou i to kotou Atua ra Ia Iehova, e kia aere rai na tona katoa au arataa, e kia akono i tana au akauenga, e kia piri atu kiaia, e kia araara atu iaia ma to kotou ngakau katoa, e ma to kotou vaerua katoa.

6 Kua akaora aturā Iosua ia ratou, e kua tuku atura ia ratou; aere atura ratou ki to ratou au puakapa.

7 Kua oronga anā Mose i te tuanga na tetai pae i te kopu o manase i Basana; kareka ta tetai pae, kua orongā Iosua i ta ratou i roto i to ratou au puakapa, ka akaoraʼi aia ia ratou ra:

8 Kua karanga atura aia kia ratou, na ko atura, Ka oki ana ki to kotou au puakapa ma te apinga maata katoa ra, ma te puaka e manganui, e te ario, e te auro, e te veo, e te auri, e te kakau maata na; ka tuaʼi na to kotou ai taeake i te apinga aō na to kotou au enemi.

9 Oki atura te tamariki a Reubena, e te tamariki a Gada, e te kopu veenga o Manase ra, aere atura mei Silo atu i te enua ra i Kanaana, vaoo iora i te tamariki a Iseraela, aere atura ki te enua ra ki Gileada, ko te enua tuanga no ratou ra, i tei tukuia mai no ratou i te tuatua a Iehova ia Mose.

10 E tae atura ratou ki te pae Ioridana, i tei tiraa tiki mai ki te enua nei ki Kanaana, kua patu iora te tamariki a Reubena, e te tamariki a Gada, e te kopu veenga o Manase ra, i tetai atarau i reira, i te pae Ioridana; e atarau maata e vaoo ua mai kia akara ra.

11 Kite akera te tamariki a Iseraela i te rongo e, i na! te tamariki a Reubena, e te tamariki a Gada, e te kopu veenga o Manase ra, kua patu i te atarau i te pae Ioridana ra, i te pae e tiraa tika mai ki te enua nei ki Kanaana, i te ngai i aereia e te tamariki a Iseraela nei;

12 E kite akera te tamariki a Iseraela i te reira, kua uruoa iora te uipaanga katoa a te tamariki a Iseraela i Silo, e aere e tamaki atu ia ratou.

13 Kua tono atura te tamariki a Iseraela ia Phinehaza te tamaiti a Eleazara taunga ra, ki te tamariki a Reubena, e te tamariki a Gada, e te kopu veenga o Manase ra, ki te enua ra ki Gileada;

14 E te au mataiapo tutara tino ngauru katoa ra, okotai ngutuare maata okotai mataiapo e pini rava ake nga kopu o Iseraela ra; e mataiapo tutara anake i te ngutuare o to ratou ai metua, i roto i to Iseraela katoa ïa au tausani anga.

15 E tae atura ratou ki te au tamariki a Reubena, e te tamariki a Gada, e te kopu veenga o Manase ra, ko te enua ra ki Gileada, e kua karanga atura kia ratou, na ko atura,

16 Te na ko maira te uipaanga katoa o Iehova ra, Eaa tenana ara i raveia e kotou i te Atua o Iseraela nei, i anga ke ei kotou i teianei rā kare akera i aru ia Iehova; kotou i patu i te atarau na kotou, e kua meameaau kotou ia Iehova i teianei rā?

17 E iti rai aina ta tatou ara i Peora, tei kore roa i mā i roto ia tatou nei, mate uaʼi te uipaanga a Iehova i te maki-mate e tae ua akenei ki teianei ra,

18 I anga ke ei kotou i te aru anga ia Iehova i teianei rā? Ka riro oki aia i te riri mai i te uipaanga katoa o te tamariki a Iseraela apopo, kotou i meameaau mai ia Iehova i teianei rā.

19 E teianei, te viivii na to kotou enua i rauka, e aere kotou ki tetai pae i te enua i nooia e Iehova, i te vairanga i te puakapa o Iehova; ka rave i tetai tuanga i rotopu ia matou nei; auraka ra e meameaau ia Iehova, auraka oki e meameaau ia matou, i te patu anga i te atarau ke na kotou uoarai, auraka te atarau a to tatou Atua ra a Iehova anake ra.

20 Kare ainei a Akana te tamaiti a Zera i rave i te ara i te mea i taumaaia ra, e kare ainei i rokoia katoaia te uipaanga a Iseraela katoa e te riri? Kare oki taua tangata ra i mate ua koia anake ra i tana ara.

21 Kua tuatua maira te tamariki a Reubena, e te tamariki a Gada, e te kopu veenga o Manase, i reira ra, na ko maira ki taua aronga mamaata i runga i te au tausani o Iseraela ra,

22 Ko te Atua no te au atua katoa ra ko Iehova: ko te Atua no te au atua katoa ra ko Iehova: koia uaorai te kite i to matou anoano; ka kite katoa oki Iseraela. E meameaau teianei, e e akarongo kore ia Iehova, auraka e akaora ia matou i teianei rā.

23 I patu matou i te atarau na matou uaorai ei anga ke i te aru anga ia Iehova, e ei apai anga i te atinga karakaratio, e te atinga kai, ki rungao, e ei apai anga i te atinga au ki rungao, na Iehova uaorai e umuumu mai;

24 Kare aina no te mataku i peraʼi matou, no te mea i tuatua matou e, Ka riro ta kotou au tamariki i te tuatua mai ki ta matou au tamariki a muri atu e, Eaā Iehova no kotou, te Atua no Iseraela nei?

25 Kua akariro oki a Iehova ia Ioridana nei ei kotinga i rotopu ia tatou, e tenana au tamariki a Reubena, e te tamariki na Gada; kare a kotou tuanga ia Iehova ra: kore akera ta matou au tamariki e mataku ia Iehova i taua au tamariki na kotou na.

26 No reira matou i karangaʼi e, E aere tatou e patu i tetai atarau na tatou; auraka ra no te atinga karakaratio, e no te au atinga katoa ra;

27 Kia riro ra ei kite no matou e no kotou, e no to matou au uki a muri atu, kia akamori rai matou ia Iehova, ki mua i tona aroaro, ma te atinga karakaratio, e te au atinga, e te atinga au na matou ra; kia kore ta kotou au tamariki e tuatua mai ki ta matou au tamariki a muri atu e, Kare a kotou tuanga ia Iehova ra.

28 I tuatua oki matou e, Kia pera mai ratou i te tuatua kia matou, e to matou au uki a muri atu, ei reira e tikaʼi ia matou kia karanga atu e, I na, te tu o te atarau a Iehova i ta to matou ai metua i patu, kare ra no te atinga karakaratio, e no te au atinga katoa ra, ei kite ra no matou e no kotou.

29 Auraka rava ia tuatua kia meameaau matou ia Iehova, e kia anga ke i te aru anga ia Iehova i teianei rā, i te patu anga i te atarau atinga karakaratio, e te atinga kai, e no te au atinga, auraka te atarau a to tatou Atua anake ra a Iehova ki mua i te puakapa nona ra.

30 E kite akerā Phinehaza taunga, e te aronga mataiapo tutara o te uipaanga, e te aronga mataiapo i runga i te au tausani o Iseraela i kapiti katoaia kiaia ra, i te tuatua ta te tamariki a Reubena, e te tamariki a Gada, e te tamariki a Manase i tuatua maira, mareka akera ratou.

31 Kua karanga aturā Phinehaza te tamaiti a Eleazara taunga ra, ki te tamariki a Reubena, e te tamariki a Gada, e te tamariki a Manase ra, Kua kite atura matou, tei rotopu a Iehova ia tatou i teianei rā, i te mea kare kotou i ara ia Iehova i taua ara nei; kua ora te tamariki a Iseraela ia kotou i te rima o Iehova.

32 Kua oki mairā Phinehaza te tamaiti a Eleazara taunga, e te ui mataiapo tutara, mei ko mai i te tamariki a Reubena ra, e te tamariki a Gada, mei te enua maira mei Gileada, ki te enua nei ki Kanaana, ki te tamariki a Iseraela, apai maira i taua tuatua ra ki ratou.

33 Mareka rava akera oki te tamariki a Iseraela i taua tuatua ra; e kua akameitaki iora te tamariki a Iseraela i te Atua, kare akerai i tuatua akaou e e aere e tamaki ia ratou, kia pou te enua i nooia e te tamariki a Reubena, e te tamariki a Gada ra.

34 Tapa iora te tamariki a Reubena e te tamariki a Gada i te ingoa o taua atarau ra, ko Edi; Ei kite oki teia no tatou e, ko Iehova te Atua.