Deuteronomi

27 KUA akaue aturā Mose e te aronga pakari o Iseraela ra ki te tangata, na ko atura, E akono kotou i te au akauenga katoa taku e akaue atu kia kotou i teianei rā.

2 Kia tae ki te rā e aere ei kotou ki tetai pae Ioridana, ki runga i te enua ta to Atua ta Iehova e oronga mai noou ra, e akatu koe i te toka mamaata, ka amo ei ki te ngaika:

3 E tata oki koe i te au tuatua katoa i roto i teianei ture ki rungao; kia tae koe ki tetai pae ra, kia aere ki runga i te enua ta to Atua ta Iehova e oronga mai kia koe ra; e enua taʼe a vai ua te u e te meli; ta te Atua o to ai metua ta Iehova i tuatua mai kia koe ra.

4 E kia tae kotou ki tetai pae Ioridana ra, ei reira kotou e akatu ei i taua au toka ra taku e akaue atu kia kotou i teianei rā, i te maunga ra ko Ebala, e naau e amo i taua au toka ra ki te ngaika.

5 Ei reira koe ka patu ei i tetai atarau na to Atua ra na Iehova, ei atarau toka: auraka rava koe e tarai i taua toka ra ki te auri.

6 Ka patu koe i te atarau a to Atua ra a Iehova i te toka vai katoa tikai ra, ka apai ei koe i te atinga karakaratio a to Atua ra a Iehova ki rungao ra:

7 E apai katoa oki koe i te atinga au ra, e ei reira koe e kai ei, ka rekarekaʼi ki mua i te aroaro o to Atua ra ko Iehova.

8 E naau e kokoti meitaki i te au tuatua katoa i teianei ture ki rungao i taua au toka ra.

9 Kua karanga aturā Mose, e te kau taunga ngati Levi ra, kia Iseraela ravarai ra, na ko atura, Kia matakite, e akarongo mai, e Iseraela e; kua riro koe ei iti-tangata no to Atua ra no Iehova i teianei rā.

10 E tenana, e akarongo koe i te reo o to Atua ra o Iehova, e akono oki i tana au akauenga, e tana au akonoanga, taku e akaue atu ia koe i teianei rā.

11 E kua ikuiku aturā Mose i te au tangata i taua rā ra, na ko atura,

12 Teia te ka tu ki runga i te maunga ra ko Gerizima, ei akameitaki i te tangata, kia tae kotou ki tetai pae Ioridana ra; ko Simeona ïa, e ko Levi, e ko Iuda, e ko Isakara, e ko Iosepha, e ko Beniamina:

13 E teia te ka tu ki runga i te maunga ra ko Ebala ei taumaa; ko Reubena ïa, ko Gada, e ko Asera, e ko Zebuluna, ko Dana, e ko Naphatali.

14 E na te ngati Levi e karanga atu, e na ko atu, ki te tangata ravarai o Iseraela, ma te reo teitei ra e,

15 Kia taumaaia te tangata e anga i te idolo akatikitikiia, e tei akatoia ra, i te mea viivii na Iehova ra, e angaanga na te rima o te au taunga ra, e kua akatu akera ki runga i te ngai ngaro ra. E na te tangata ravarai e tuatua mai, e na ko mai e, E tika ïa.

16 Kia taumaaia te akavaavaa i tona metua tane, e tona metua vaine. E na te tangata ravarai e tuatua mai e, E tika ïa.

17 Kia taumaaia te apai ke i te kena kainga o tona taeake. E na te tangata ravarai e tuatua mai e, E tika ïa.

18 Kia taumaaia te akaanga ke i te matapo i te arataa ra. E na te tangata ravarai e tuatua mai e, E tika ïa.

19 Kia taumaaia te ūē ke i te tuatuatau i te tangata ke, te matiroeroe, e te vaine takaua ra. E na te tangata ravarai e tuatua mai e, E tika ïa.

20 Kia taumaaia te moe ki te vaine a tona metua tane ra; no te mea kua eeu aia i te kakau o tona metua tane. E na te tangata ravarai e tuatua mai e, E tika ïa.

21 Kia taumaaia te moe i te puaka ra. E na te tangata ravarai e tuatua mai e, E tika ïa.

22 Kia taumaaia te moe ki tona uaorai tuaine, i te tamaine a tona metua tane, e te tamaine a tona metua vaine. E na te tangata ravarai e tuatua mai e, E tika ïa.

23 Kia taumaaia te moe ki tona metua ongoai vaine. E na te tangata ravarai e tuatua mai e, E tika ïa.

24 Kia taumaaia te ta poiri ua i tona taeake. E na te tangata ravarai e tuatua mai e, E tika ïa.

25 Kia taumaaia te rave i te tutaki e ta i te tangata ara kore ra. E na te tangata ravarai e tuatua mai e, E tika ïa.

26 Kia taumaaia te kore e akono tamou i te au tuatua i roto i teianei ture. E na te tangata ravarai e tuatua mai e, E tika ïa.