Te Au Akava

20 AERE akera te tamariki a Iseraela, e putuputu maira te uipaanga tangata, mei te tangata okotai, mei Dana e tae ua atura ki Bere-seba, e te enua katoa ra ko Gileada, ki mua i te aroaro o Iehova i Mizepa.

2 Kua aere katoa maira te aronga mataiapo tutara no roto i te tangata ravarai no te au kopu katoa o Iseraela, ki teianei uruoaanga no te au tangata no te Atua ra, e a oki anere anga o te tausani tangata aere ua tei unui i te koke. 3 E kite akera te tamariki a Beniamina e, kua aere te tamariki a Iseraela ki Mizepa. Kua tuatua maira te tamariki a Iseraela, Ka akakite mai ana, i akapeeaia teianei kino i te rave anga ra?

4 Kua karanga atura taua ngati Levi ra, te tane a te vaine i taia ra, na ko atura, I tapae au i Gibea i o Beniamina, maua ko taku vaine, e moe:

5 Kua tu maira to Gibea e rave mai iaku, e kua akapini maira i taua are i nooia e au ra i te po: i umuumu maira ratou iaku e ta, e kua rave kino iora ratou i taku vaine, e mate rava akera aia. 6 Kua rave iora au i taua vaine naku ra, kua kotikoti iora, e kua akau atura e pini ua ake te enua i nooia e Iseraela nei: e ravenga viivii maata akama oki ta ratou i rave io nei i roto ia Iseraela nei.

7 E i na, e tamariki anake kotou na Iseraela; ei ko nei kotou ka akakite ei i to kotou manako, e ta kotou tuatua.

8 Kua tu katoatoa akera te tangata okotai rai tu anga, e kua tuatua akera, Kare rava tetai o tatou nei e tae vave ki tona puakapa, kare rava tetai e oki vave ki tona ngutuare. 9 Teia ra ta tatou e rave ia Gibea, e tuku i te kelero ka aere ei tatou ka rave ei i te reira. 10 Ka rave oki tatou i te tangata taki tai ngauru to te anere okotai, e pini ua ake te au kopu ravarai o Iseraela nei, e taki tai anere to te tausani okotai, taki tai oki tausani to roto i te au tausani okotai ngauru ra, ei tiki kai na te au tangata nei, kia rave ratou, kia tae ratou ki Gibea i o Beniamina ra, i tei tau ki tera ra ravenga akama i raveia e to taua oire ra i roto ia Iseraela nei. 11 Putuputu akera to Iseraela katoa, kapiti akera mei te tangata okotai e rave i taua oire ra.

12 Te tono ua ra te au kopu o Iseraela i te tangata ki taua kopu o Beniamina ra e pini ua ake ratou ra, i te ui anga atu e, Eaa teianei mea kino i raveia i roto ia kotou nei?

13 E teianei, e tuku mai kotou i taua au tangata ra, i taua aronga tangata kanga i Gibea nei, kia ta matou ia ratou kia mate, kia kore atu te kino i Iseraela nei. Kare ake rai te tamariki a Beniamina i akarongo i te reo o to ratou au taeake, a te tamariki a Iseraela ra;

14 Kua akaputuputu iora te tamariki a Beniamina ki Gibea, mei roto mai i te au oire ra, e aere e tamaki i te tamariki a Iseraela ra.

15 Tatauia iora oki te tamariki a Beniamina no roto i te au oire ra i reira, e rua akera ngauru e ono ara i te tausani i te tangata tei unui i te koke, toe iora to Gibea uaorai; tatauia iora te reira, e itu ïa anere i te tangata ikiia.

16 E itu anere i te tangata iki i roto i taua aronga katoa ra, e kaui te rima: e tika ia ratou ravarai kia maka i te toka ki te rauru okotai, e pa iora, kare rava e aere ke.

17 Tatauia iora oki te au tangata Iseraela, auraka Beniamina, e a ïa anere anga o te tausani tei unui i te koke; e tangata tamaki anake ïa.

18 Kua tu akera te tamariki a Iseraela, aere atura ki runga ki Betela, e kua ui atura ki te Atua, kua karanga atura, Koai te ka aere ana e tamaki i ta matou tamaki i te tamariki a Beniamina? Kua tuatua mairā Iehova, Ko Iuda te na mua.

19 Kua tu akera te tamariki a Iseraela i te popongi, e kua patia iora i te puakapa i vaitata i Gibea.

20 Aere atura to Iseraela e tamaki ia Beniamina, kua akamou iora to Iseraela i te tamaki ia ratou i Gibea.

21 Kua aere maira te tamariki a Beniamina mei roto mai i Gibea, e pou iora to Iseraela ia ratou, e inga iora ki raro i te one, e rua ngauru ma rua i te tausani, i te reira rā. 22 Kua akamaroiroi iora taua au tangata ra, to Iseraela ra, e kua akamou akaou iora i te tamaki i te ngai ta ratou i akamou i tei muatangana rā.

23 Kua aere iora te tamariki a Iseraela ki runga, kua aue iora ki mua i te aroaro o Iehova e aiai ua atura, e kua ui atura kia Iehova, kua karanga atura, Ka aere ainei au e tamaki i te au tamariki a toku taeake, a Beniamina? Kua tuatua mairā Iehova, Ka aere e tamaki iaia.

24 Kua akavaitata atura te tamariki a Iseraela ki te tamariki a Beniamina e tamaki, ko te rua ïa o te rā. 25 Kua aere mairā Beniamina mei roto mai i Gibea i taua rā rua ra e aravei ia ratou, pou akaou iora te tamariki a Iseraela ia ratou, inga iora ki raro i te one, okotai ngauru e varu ara i te tausani i te tangata, tei unui anake i te koke.

26 Kua aere anake iora te tamariki a Iseraela e te tangata ravarai ki runga, e kua tae ki Betela, aue iora, noo ua iora i reira ki mua i te aroaro o Iehova, e kua akakore iora i te kai i te reira rā e aiai ua atura, e kua apai i te atinga karakaratio, e te atinga au, ki mua i te aroaro o Iehova.

27 E kua ui atura te tamariki a Iseraela kia Iehova, (tei reira oki te aruna koreromotu a te Atua i te reira au rā,

28 E ko Phinehaza, te tamaiti a Eleazara, te tamaiti a Aarona, tei tu ki mua i te aruna i te reira au rā,) karanga atura, E aere akaou ainei au e tamaki i te tamariki a toku taeake a Beniamina, e ka akapaki ainei au? Kua tuatua mairā Iehova, Ka aere ki runga; apopo oki au ka tuku mai ei iaia ki to rima. 29 Kua akamoe iora Iseraela i te kotipu e pini ua akera Gibea.

30 Aere atura te tamariki a Iseraela ki runga e tamaki i te tamariki a Beniamina, ko te toru ïa o te rā, kua akamou iora i te tamaki mei tei muatangana ra e tamaki ia Gibea. 31 Kua aere maira te tamariki a Beniamina ki vao e tamaki i taua au tangata ra, e arataki keia iora ratou e taka ke maira te oire; kua timata oki ratou i te pāpā i te tangata, e kua ta, mei tei muatangana ra, e toru paa ngauru to Iseraela i mate ki runga i te au arataa ra, te ara e aere tika atu ei ki Betela tetai, e te ara e aere tika atu ei ki Gibea i te ngai atea ra tetai. 32 Kua tuatua akera oki te tamariki a Beniamina, Kua pou rai ratou ia tatou mei tei muatanganara. Kua tuatua akera te tamariki a Iseraela, E oro tatou, kia taka ke mai ratou ki runga i te arataa ra, kia topa ke atu te oire.

33 Kua tu anake akera to Iseraela i to ratou au nooanga, kua akamou iora i te tamaki i Baala-tamara; e kua aere anake maira to Iseraela e kotipu ra, mei roto i to ratou au ngai ra, i te au kainga i Gibea ra.

34 E mei mua mai i Gibea ra kua aere mai te au tangata iki okotai ngauru i te tausani no roto ia Iseraela ravarai, rikarika rava atura taua tamaki ra; kare ra te tamariki a Beniamina i kite i taua kino i vaitata ia ratou ra. 35 Kua ta iorā Iehova ia Beniamina ki mua i te aroaro o Iseraela: e mate iora to Beniamina e rua ngauru ma rima i te tausani okotai anere ara, i te tamariki a Iseraela, i te reira rā: e aronga tamaki anake oki tei unui i te koke. 36 E kite akera te tamariki a Beniamina e kua taia ratou; kua tuku ua mai oki to Iseraela i te ngati Beniamina, kia arumaki ua mai ana, no te mea te irinaki ra ratou i te kotipu i tukuia e ratou i vaitata i Gibea ra. 37 Kua rapurapu ua maira taua aronga kotipu ra, e oro viviki ua maira ki runga ia Gibea; kua akaki ua iora ratou, e kua ta i taua oire katoa ra ki te mata koke.

38 Kua oti te akairo i te akaaiteia e to Iseraela e taua aronga kotipu ra e, e taʼu ratou i te ai kia maata te auai i te kou anga ki runga i roto i taua oire ra. 39 E kia oro to Iseraela i taua tamaki anga ra, kua ta ua maira Beniamina i to Iseraela e toru paa ngauru o te tangata i mate rava; kua tuatua akera oki ratou, Kua taia uaia nei rai ratou e tatou ki raro mei tei te tamaki anga muatangana ra.

40 Kia kou ra taua auai ra ki runga no roto i taua oire ra mei te pou ra te tu, kua akara akera to Beniamina ki muri ia ratou, e i na, te peke takiri ra te ai o taua oire ra ki runga i te rangi. 41 E kia ariu atu to Iseraela ra, itirere rava akera to Beniamina, kua kite akera oki e kua rokoia ratou e te kino ra.

42 Iki ua iora ratou i te tua i mua i te aroaro o to Iseraela, i na te arataa e tae atu ei ki te medebara ra; rokoia uaia iora oki ratou e te tamaki: e pou iora oki ratou i rotopu i to roto mai i te au oire.

43 Kua takako iora ratou i to Beniamina e pini ua ake, e kua arumaki atura ia ratou, e kua takatakai marie ua atura ia ratou, i te pae i aite ki Gibea, i te pae i te atingi o te rā ra. 44 E inga iora to Beniamina okotai ngauru e varu ara i te tausani, e aronga toa anake ïa.

45 Kua anga akera tetai pae e oro tika atura ki te medebara ra, ki te mato ra ko Rimona: e kua koi iora i te reira i te arataa e rima akera tausani i te tangata; e kua aru viviki atura ia ratou e Gidoma roa, e kua ta atura i to ratou e rua ïa tausani.

46 E rua ngauru ma rima atura i te tausani i te tangata to Beniamina i mate i te reira rā, tei unui anake i te koke, e aronga toa anake ïa.

47 Te au tangata ra e ono anere, anga atura, oro atura ïa ki te medebara i taua mato ra ko Rimona; e noo iora ki runga i taua mato ra ko Rimona e a akera marama.

48 Kua oki akaou atura te tamariki a Iseraela ki te tamariki a Beniamini, e kua ta atura ia ratou ki te mata koke, te au tangata no te au oire, e te au puaka katoa, e tei rauka katoa i to ratou; e kua tutungi atura i te au oire katoa ta ratou i aere ra ki te ai.