2 Samuela
9 E KUA karanga aturā Davida, Te noo nei ainei tetai no te ngutuare o Saula, e tikaʼi iaku kia takinga-meitaki ua atu iaia ia Ionatana nei?
2 Te noo ra oki tetai tavini no taua ngutuare o Saula ra, ko Ziba te ingoa. E kia tikiia atu aia e aere mai kia Davida, kua karanga atura te ariki kiaia, Ko Ziba ainei koe? Kua tuatua maira aia, Ko to tavini nei ïa.
3 Kua karanga atura te ariki, Te toe nei aina tetai no te ngutuare o Saula, e tikaʼi iaku kia akakite atu i te takinga-meitaki o te Atua kiaia? Kua tuatua mairā Ziba ki te ariki, Te noo akera tetai tamaiti a Ionatana, kua pirikoki ra nga vaevae.
4 Kua karanga atura te ariki kiaia, Teiea aia? Kua tuatua mairā Ziba ki te ariki, I na, tei te are aia no Makira, te tamaiti a Amiela, i Lo-debara.
5 Kua tono akera te ariki ra ko Davida i te karere, kua arataki maira iaia mei roto mai i te are o Makira te tamaiti a Amiela, mei Lo-debara mai.
6 E tae mairā Mephiboseta te tamaiti a Ionatana, te tamaiti a Saula, kia Davida ra, kua tipapa iora aia i raro tona mata, tupou iora. Kua karanga aturā Davida, E Mephiboseta. Kua tuatua maira aia, I na to tavini!
7 Kua karanga aturā Davida kiaia, Auraka e mataku: e takinga-meitaki ua atu rai au ia koe, no to metua na no Ionatana; e akaoki oki au i te kainga katoa no to tupuna na no Saula: ka kaikai oki koe i taku nei kaingakai kare e tivata.
8 Kua tupou iora aia ki raro, kua tuatua akera, Eaa ra to tavini nei, i akono mai ei koe i teianei puaka-aoa mate?
9 Kua kapiki atura te ariki ia Ziba, i te tavini o Saula, e kua karanga atura kiaia, Kua orongaia e au to Saula, e to tona katoa ra ngutuare, tei te tamaiti ïa a to pu.
10 E i tenana, naau, e na to au tamariki, e na to au tavini e tanu i te kainga nona, ka apai mai ei i tei ua ra, ei kai na te tamaiti a to pu ra; kareka ko Mephiboseta te tamaiti a to pu ra, ka kai tamou ïa aia i te kai i taku ra kaingakai. Okotai ngauru ma rima i ta Ziba tamariki, e rua ngauru oki i te tavini.
11 Kua tuatua mairā Ziba ki te ariki, Ko ta taku pu ta te ariki ra i akaue mai i tona tavini nei, ko ta to tavini ïa e rave. Kua na ko atura te ariki, Ka kaikai uaorai a Mephiboseta i taku kaingakai, mei te mea e tamaiti na te ariki ra.
12 E tamaiti ou ta Mephiboseta ko Mika te ingoa. E te aronga katoa i noo i roto i te are o Ziba, e tavini anake ïa no Mephiboseta.
13 Kareka ko Mephiboseta, noo atura aia i Ierusalema: kaikai tamou uaorai aia i te kaingakai a te ariki. Kua pirikoki oki ona puke vaevae.