2 Korinetia

8 E TEIANEI, e aku au taeake, e akakite atu matou ia kotou i te aroa ua o te Atua i orongaia mai i te au ekalesia i Makedonia nei:

2 E kua maringi ua to ratou rekareka, maata ua rai to ratou putaua, e te mate maata, i te maata o to ratou oronga.

3 Ko au oki te kite e, ko ratou uaorai tei inangaro i te oronga i tei tika ia ratou ra, e e maata atu rai:

4 E te tuatua raurau anga mai ia matou e rave i taua apinga ra, e ei ia matou katoa te tuku atu i taua apinga ra i te aronga tapu ra.

5 Kare ra mei ta matou i manako ra, kua na mua ra ratou i te oronga ia ratou uaorai i te Atu ra, e ia matou katou oki ei akono i te inangaro o te Atua ra.

6 I ako atu ei oki matou ia Tito e, mei tana i timata i muatangana, kia rave akaoti ua aia i taua mea aroa nei i roto ia kotou na.

7 E teianei, te vai maata ra te au mea katoa nei ia kotou na, i te akarongo ra, i te tuatua ra, i te kite ra, e te maroiroi katoa, e to kotou aroa ia matou nei, kia maata katoa teianei mea aroa i roto ia kotou.

8 Kare ra taku te tuatua akaue, no te maroiroi ra o tetai pae, e ei timata anga atu i te pikikaa kore o to kotou inangaro.

9 Kua kite oki kotou i te aroa ua o to tatou Atu ra o Iesu Mesia, e e apinga maata tona, no kotou ra, riro mai nei aia ei apinga kore, kia maata to kotou apinga i taua apinga kore nona ra.

10 Teia oki toku manako i taua mea nei: teia te mea tika ia kotou, i te aronga i akamata i muatangana i te rave, kare oki te reira anake ra, kua rapurapu ua ra kotou mei tetai mataiti mairai.

11 E teianei e akaope ua i te rave i taua mea ra; mei te akakoroanga i tika ra, kia tupu katoa te rave tikai, no roto i ta kotou apinga i rauka na.

12 Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.

13 Eiaa oki kia māmā tetai papaki, e kia teimaa kotou:

14 Kia aiteite ra, kia riro ta kotou apinga maata ei tauturu atu i to ratou ngere i teianei, e kia tauturu mai ratou i to kotou ngere i ta ratou apinga maata i tona atu rā, kia aiteite:

15 Mei tei tataia ra e, “Kia kore e akamaataia ta tei koi i te mea maata, e kia kore oki e akaitiia ta tei koi i te mea iti ra.”

16 E teianei kia akameitakiia te Atua, ko tei tuku katoa i taua maroiroi nei i roto i te ngakau o Tito ia kotou na.

17 Kua āriki rai oki aia i taku nei ako; no te maata ra o tona uaorai maroiroi, riro ua atu na ia kotou na.

18 E kua unga katoa atu matou i taua taeake, i paapaaia i te evangelia nei, e kako rava ake te au ekalesia katoa ra;

19 Kare oki ko te reira anake ra, ko tei akono katoaia ra e te au ekalesia, kia aere aia e ko matou katoa ma taua mea aroa ra i tukuia e matou nei, kia akakakāia te Atu ra, e ei akakite i te tika o to kotou ngakau.

20 Te matakite nei oki matou i teia, kia kore rava tetai e akakino mai ia matou i taua apinga maata i tukuia atu e matou nei:

21 I te akono atea marie anga i te mea tika, eiaa i mua i te aroaro o te Atu anake ra, i mua katoa ra i te aroaro o te tangata.

22 E kua tono katoa atu matou i to matou taeake ma ratou, e manganui to matou kite anga i tona maroiroi i te au mea e manganui, e maata atura te maroiroi i teianei, i tona manako meitaki maata ia kotou.

23 Ia Tito ra, ko toku ïa oa e te tauturu iaku ia kotou na: ko to matou au taeake ra, e karere ïa na te au ekalesia, e te kakā o te Mesia ra.

24 E teianei e akakite mai i to kotou aroa, e te tika anga o ta matou akapaatu anga ia kotou, i mua i to ratou aroaro, e i mua i te aroaro o te au ekalesia ra.