Maseli

24 AURAKA koe e vareae i te tangata kino, auraka koe e inangaro i te kapiti kai ratou.

2 Te kimi ra oki to ratou ngakau i te mate, e te tuatua nei to ratou vaa i te takinga-kino.

3 E patuia te are i te pakari; e e akatinamouia i te kite:

4 E ki oki te au pia ra i te kite ki te au apinga memeitaki katoa i inangaroia ra.

5 E ririnui to te tangata pakari, e te tangata kite, e aere ïa tona maroiroi i te maata.

6 E tenana, kia rai te kimi anga i te tuatua pakari, ka rave ei koe i te tamaki: tei te maata i te kimi i te tuatua ra te ora.

7 E teitei to te tuatua pakari, kare e taea e te neneva ra: kare aia e tika kia tuatua i te ngutupa ra.

8 Ko tei akatupu i te ravenga kino ra, e karangaia aia i te tumu no te kimi i te kino ra.

9 Te manako neneva ra, e ara ïa; e mea viivii ra na te tangata nei te akavaavaa.

10 Kia potopoto to aʼo i te rā i eke ei ra, kua iti roa toou maroiroi.

11 E akaora i te aronga i aratakiia e ta; te aronga i vaitata i te mate ra: kia kore ra koe e rave,

12 Kia karanga koe e, I na, kare matou i kite iaia; kare ainei tei kimi matatio i te ngakau nei e akamanako? kare ainei tei tiaki mai i to vaerua ra e kite? kare ainei aia e akautunga mai i te tangata nei i tana ra angaanga?

13 E kai i te meli, e taku tamaiti, no te mea e manga meitaki; e te melikerio, no te mea te vene ra ïa i to kaki:

14 Koia katoa te kite i te tuatua pakari ki toou ra vaerua, kia rauka ia koe ra; te vai ra oki te openga, kare oki taau e irinaki ra e akakoreia.

15 Auraka koe e moetapapa, e tera ra tangata kino, i te ngutuare o te tuatua-tika ra; auraka koe e tamoana i tona akaangaroianga:

16 Kia taki itu ua atu te inga anga o te tangata tuatua-tika, e tu akaou mai aia; e nina roaia ra te aronga kino e te kino.

17 Auraka koe e rekareka kia inga to enemi ra, e kia turori ua aia, auraka to ngakau kia rekareka:

18 Ko te akara mai aeā Iehova, ko te kinokino aea aia, e kua ruri ke akera tona riri i runga iaia ra ki runga ia koe.

19 Auraka koe e ongoongo i te aronga kino, auraka oki koe e vareae i te aronga tuatua kino ra:

20 Kare oki o te tangata kino ra tutaki meitaki; e te lamepa o te aronga kino ra, ka tamateia ïa.

21 E taku tamaiti, ko Iehova taau e mataku, e te ariki: auraka e kapiti ki te aronga e akatupu i te peu ke ke ra;

22 E rokoia uaia mai to ratou mate, kare e roaia; koai oki te kite i to ratou mate no ko mai ia raua ra?

23 Teia katoa te au mea a te aronga pakari: Kare te mea meitaki kia akono i te tu o te tangata i te akava anga.

24 Ko tei karanga ki te tangata kino ra, E tangata tuatua-tika koe; e taumaaia aia e te tangata, to te pa enua te ka akaviivii iaia:

25 Ko te aronga ra i akamura iaia, e taurekarekaia atu ïa, e ka tae mai te meitaki maata ki runga ia ratou.

26 E ongiia te ngutu, ko tei tuatua mai i te tuatua tika tikai ra.

27 E akateateamamao i taau ra angaanga ki vao, ka akatau marie ei kia tau taau ki te kainga; ka akatu ei i toou are i muri ake.

28 Auraka koe kia riro ei kite taeke ua i to tangata tupu ra; auraka to vaa kia pikikaa i tetai ke.

29 Auraka e karanga e, Mei tana i rave mai kiaku nei, e pera katoa au kiaia; e tuataki atu au i taua tangata nei i tana ra angaanga.

30 Iaku i aere ake na roto i te kainga o te tangata akatau ra, e na roto i te kainga vine o te tangata kite kore:

31 I na, kua ngaromia rava i te ngangaere, e kua kapi i te mauku mangeo, e kua ngaoro te patu toka ra ki raro.

32 E kite akera au ra, kua maara marie iora au; akara atura au, rauka iora te ako iaku:

33 Ei manga moe iti rai, ei akāvai anga iti rai, e tapeka iti ua atu rai te rima ei manga moe rai;

34 E rokoia mai koe e te putaua mei te tuitarere ra; e toou ra ngerenga mei te tangata taoonga tamaki ra.