1 Korinetia

12 E TEIANEI, kare au i inangaro, e te au taeake, kia kore kotou e kite i te au mea a te Vaerua ra.

2 Kua kite oki kotou e, e etene kotou, i taki na aereia i te au idolo murare ra, taki na aere uaiaʼi kotou ra.

3 E teianei, e akakite atu au kia kotou, kare rava e tangata na te Vaerua o te Atua tana tuatua, e karanga ia Iesu e, kua taumaaia; e kare rava e tangata e tika kia karanga e, ko Iesu te Atu, mari ra i ta te Vaerua Tapu ra.

4 E manganui te tu o te au mea i orongaia mai, okotai ra Vaerua.

5 E manganui rai oki te taoonga, okotai ra Atu.

6 Manganui rai oki te angaanga, okotai ra Atua e anga i te au mea katoa ki roto i te tangata katoa.

7 Kua orongaia ta te Vaerua akakite anga i te tangata ravarai, kia meitaki katoatoa.

8 I orongaia mai te tuatua o te pakari e te Vaerua, ki tetai tangata; e te tuatua o te kite i tetai, e taua Vaerua rai;

9 Ta tetai ra, ko te akarongo ïa, na taua Vaerua rai; ta tetai ra, ko te kite ïa i te akaora maki, na taua Vaerua rai;

10 Ta tetai ra, ko te rave i te ravenga taka ke ïa: ta tetai ra, ko te totou ïa; ta tetai ra, ko te kite vaerua ïa; ta tetai ra, ko te kite vaerua ïa; ta tetai ra, ko te akakite tuatua ke ke ïa:

11 Na taua Vaerua okotai rai i anga i taua au mea katoa nei, i te tua marie anga i ta te tangata ravarai i tana i anoano ra.

12 Mei te kopapa oki e okotai nei, e manganui tona melo, e te au melo katoa no taua kopapa okotai ra, maata ua rai ratou, okotai rai kopapa: koia katoa te Mesia.

13 I bapetizoia oki tatou e te Vaerua okotai ki roto i te kopapa okotai ra, te ngati Iuda, e te Eleni, te tavini, e te rangatira; e kua akainumia tatou i ta te Vaerua okotai rai.

14 Kare oki te kopapa nei i te melo okotai, e manganui ra.

15 Kia karanga oki te vaevae e, Kare au i to te kopapa, no te mea kare au i te rima; kare tika aina aia i to te kopapa i reira?

16 Kia tuatua oki te taringa e, Kare au i to te kopapa, no te mea kare au i te mata; kare tika aina aia i to te kopapa i reira?

17 Naringa e mata anake te kopapa katoa nei, eaa iora te akarongo anga? Naringa oki e akarongo anga anake, eaa iora te ongi anga?

18 I teianei ra, kua akamouia e te Atua te au melo katoatoa o te kopapa nei, ki tana ngai i inangaro ra.

19 Naringa oki ratou katoa e melo okotai ra, teiea iora te kopapa i reira?

20 I teianei ra, manganui te melo, okotai ra kopapa.

21 Kare oki te mata e tika kia karanga ki te rima e, Kare ua atu rai koe iaku nei: e te upoko kia karanga kia te vaevae e, Kare ua atu rai korua iaku nei.

22 Eiaa atu oki ïa, ko te au melo tu apikepike o te kopapa nei, kare ua e tika kia kore.

23 E te au melo o te kopapa ta tatou e manako nei e e iti te meitaki ra, te akapini nei tatou i te reira i te meitaki maata; e to tatou au ngai manea kore, te tu ke nei te reira i te manea.

24 To tatou au ngai manea ra oki, kore ua atu ïa; kua topiri marie ra te Atua i te kopapa katoa, e kua tuku i te meitaki maata ki te ngai i ngere ra,

25 Kia kore rava te tau kore i te kopapa nei; kia arite katoa ra to te au melo akono ia ratou uaorai.

26 Kia mamae tetai melo ra, e mamae katoa te au melo ravarai; e kia akateiteiia tetai melo ra, e rekareka ïa te au melo ravarai.

27 E teianei, ko te kopapa kotou no te Mesia, e e melo anake kotou e ope ua ake.

28 E kua tuku te Atua i te au aposetolo ki roto i te ekalesia, ko mua ïa; te rua ra, e peroveta ïa; te toru ra, e apii ïa; e muri akera, ko te rave i te ravenga taka ke ïa: ei reira te akaora maki; e te tauturu, e te tutara, e te tuatua ke ke.

29 E aposetolo anake aina? e peroveta anake aina? e apii anake aina? e rave i te ravenga taka ke anake aina?

30 Kua kite katoatoa aina i te akaora maki? e tuatua katoatoa aina i te tuatua ke? e akakite katoatoa aina i te tuatua ke ke?

31 Te inangaro maata ua na kotou i te au taoonga nunui ra; e akakite atura au ia kotou i te mataara meitaki maata rava ra.