Mareko

12 KUA tuatua parabole atura aia kia ratou, na ko atura, Kua tanu tetai tangata i te kainga vine, kua akapini ki te koro, e kua ko iora i te taomianga vine, akatu iora i te are tapapa anga, tuku atura ki te aronga unga, aere atura ki te enua mamao.

2 E tae akera ki te tuatau tikai, kua tono maira aia i tetai tavini ki taua aronga unga ra, kia o mai ratou i te kai o taua kainga vine ra.

3 Kua opu atura ratou iaia, pāpā iora, e akaoki atura ma te puapinga kore.

4 Kua tono akaou maira oki aia i tetai tavini ke; peîia iora te reira i te toka, paruparu atura oki te mimiti, kua akaoki atura iaia ma te takinga-kino maataia.

5 Kua tono akaou maira oki aia i tetai; kua tamate rava atura ratou iaia; e au tavini ke rai oki e manganui, kua pāpā iora ratou i tetai pae, e tamate rava atura oki i tetai pae.

6 E i te openga iora, te toe ra tana tamaiti okotai, e tumanava nana, kua tono maira aia iaia kia ratou ra, na ko akera, Ka riro ratou i te oo mai i taku tamaiti.

7 Kua tuatua iora taua aronga unga ra ratou ratou uaorai, Ko te tangata kainga teia: e aere mai, ka ta tatou iaia, e e riro mai te kainga ia tatou uaorai.

8 Kua rave atura ratou iaia, tamate rava atura; akaruke atura ki vao i taua kainga vine ra,

9 Ka akapeea maira te pu o taua kainga vine ra? Ka riro aia i te aere mai e tamate rava i taua aronga unga ra, ka apai atu ei i te kainga vine ia etai ke.

10 Kare kotou i tatau i tei tataia ra e, “Ko te toka i akarukeia e te aronga patu are ra, ko tei akariroia ei toka tiavā:

11 Na te Atu teia i rave, e te akara atu nei tatou ma te umere?”

12 I anoano atura ratou i te opu iaia, mataku akera ra i te tangata: kua kite oki e, no ratou taua parabole tana i tuatua ra: vaio atura ratou iaia, aere atura.

13 E kua tono maira ratou i tetai au Pharisea, e te au Herodiani, iaia, ei taē iaia i tana tuatua.

14 E tae maira ratou, kua na ko maira kiaia, E te Orometua, kua kite matou, e tuatua-tika taau, e kare koe i mataku i te tangata: kare koe i akono i to te tangata nei tu: ko te tuatua a te Atua taau e apii nei ma te tuatua-mou: E tika aina i te ture kia apai matou i te taūnga na Kaisara, e auraka aina?

15 Ka apai aina matou, e auraka aina? Te kite ra aia i ta ratou pikikaa, e kua na ko atura kia ratou, Eaa kotou e timata mai ei iaku? ka apai mai na i tetai denari kia kite au.

16 Kua apai maira oki ratou. Kua ui atura aia kia ratou, Noai teianei tu, e teianei tuatua? Kua na ko maira ratou, No Kaisara.

17 Kua karanga aturā Iesu, na ko atura kia ratou, Ka apai mari i ta Kaisara ra kia Kaisara; e ta te Atua ra, e apai ïa ki te Atua. Kua va ua atura ratou iaia.

18 Kua aere maira te au Sadukea ra, ko tei tuatua e, kare e tuakaouanga; e kua ui maira kiaia, na ko maira,

19 E te Orometua e, i tata mai a Mose kia matou, “Kia mate te tuakana o tetai tangata, te ora ra te vaine, e kare e tamariki, e akaipoipo te teina i taua vaine ra, e akaanau i te tamariki na te tuakana.”

20 Toko itu puke tamaroa i te kopu-tangata okotai: kua akaipoipo te tama mua i te vaine, e mate atura ma te tamariki kore.

21 Kua akaipoipo iora te toko rua iaia, mate atura oki aia, ma te tamariki kore rai: kua pera oki te toko toru.

22 Koia katoa oki ratou ravarai toko itu, kua akaipoipo anake iaia; e kare rai e tamariki: e i te openga iora, mate katoa atura te vaine.

23 E kia tae ki te tuakaouanga, kia tu akaou mai taua aronga ra, e riro aia ei vaine naai i taua aronga ra? e vaine oki aia na ratou ravarai toko itu.

24 Kua karanga aturā Iesu kia ratou, na ko atura, Kare aina teia te mea e tarevake ei kotou, ko to kotou kite kore i te tuatua i tataia ra, e te mana o te Atua?

25 Kia tu akaou oki ratou mei te mate maira, kare ïa e akaipoipo, kare oki e oronga kia akaipoipoia, e tau ratou i te au angela i te ao ra.

26 I te tuatua ra i te tuakaouanga o tei mate ra, kare aina kotou i tatau i roto i te buka a Mose ra, e i tuatua mai te Atua kiaia i roto i te pu ngangaere ra, na ko maira, “Ko au te Atua no Aberahama, e te Atua no Isaaka, e te Atua no Iakoba?”

27 Kare te Atua i te Atua no tei mate, no tei ora ra: e tarevake maata ta kotou.

28 Kua aere maira tetai tata tuatua, i akarongo i ta ratou tuatua anga ra, e kite akera aia i te meitaki o tana tuatua anga atu kia ratou, kua ui maira, Ko teea tei maata i te au akauenga katoa?

29 Kua karanga aturā Iesu kiaia, Teia tei maata o te au akauenga katoa ra, “E akarongo mai koe, e Iseraela; Ko to tatou Atua ra ko Iehova, okotai oki Iehova:”

30 “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa:” ko te akauenga teia i maata.

31 Mei te reira katoa oki te rua, “E aroa atu koe i toou tangata tupu, mei te aroa ia koe uaorai.” Kare rava e akauenga i maata i te reira.

32 Kua tuatua maira taua tata tuatua ra kiaia, E tuatua-tika tikai taau i tuatua mai nei, e te Orometua: okotai rava oki Atua; kare atu, koia anake rai:

33 E te anoano atu iaia ma te ngakau katoa, e ma te kite katoa, e ma te vaerua katoa, e te ririnui katoa, e te aroa atu i te tangata tupu mei te aroa iaia uaorai, e maata ïa i te au atinga karakaratio katoa ra, e te au atinga kai oki.

34 E kite akerā Iesu e, e tuatua-tika tana i tuatua maira, kua na ko atura aia kiaia, Kare koe i atea ke atu i te basileia o te Atua ra. E kare rava atura e tangata i ui akaou mai kiaia, i te mataku.

35 E te apii rā Iesu i roto i te iero ra, kua karanga atura aia, na ko atura, Eaa te au tata tuatua i tuatua mai ei e, ko te Mesia te tamaiti na Davida?

36 Ko Davida uaorai oki, tei tuatua ma te Vaerua Tapu ra e, “Kua karanga aturā Iehova ki taku Atu, Ka noo koe ki taku rima katau nei, e kia akariro au i to au enemi ei pange vaevae noou.”

37 E teianei, ko Davida uaorai oki tei karanga kiaia e, e Atu, eaa iora oki aia i riro ei ei tamaiti nana? E te akarongo ra te tangata rikiriki iaia, ma te rekareka.

38 Kua karanga atura aia kia ratou i te apii anga atu, Kia matakite i te au tata tuatua, ko te anoano i te aaere ma te kakau roroa, e kia aroaia oki i te ngai okoanga ra;

39 E te au nooanga memeitaki i roto i te au sunago ra, e te au nooanga teitei i te au kaingakai ra:

40 Te pou nei oki ia ratou te au ngutuare o te au vaine takaua ra, e te akaroa nei i te pure ei pikikaa anga: e mate maata rava oki to ratou.

41 E te noo rā Iesu i vaitatao i te pia apinga ra, akara atura aia i te tangata i te tuku anga i te moni i taua pia apinga ra: e aronga apinga nui oki e manganui te tuku mai i te moni maata ki roto.

42 Kua aere maira tetai vaine apinga kore, e takaua oki, e kua tuku maira ki roto e rua lepeta, koia te faringa okotai.

43 Kua karanga atura aia ki tana au pipi, na ko atura kia ratou, Koia mou taku e karanga atu kia kotou na, e maata ta te vaine takaua apinga kore nei i tuku ki roto, i ta ratou ravarai i tuku ki roto i te pia apinga:

44 No roto oki i te toenga i to ratou apinga maata ta ratou i tuku mai ki roto; kareka aia nei, kua ope roa tona apinga rikiriki rava kore, i te tukuia e ia ki roto.