2 Samuela

12 KUA tono mairā Iehova ia Natana kia Davida ra. E tae maira aia kiaia ra, kua karanga atura kiaia, Toko rua puke tangata i te oire okotai: e taoiau tetai, e ao tetai.

2 E manganui ua atura ta taua tangata taoiau ra mamoe e te puakatoro:

3 Kareka taua tangata ao ra kare ana, mari ra tetai punua mamoe iti e ua, i okoia e ia, e kua angaiia: e tupu katoa atura ma ia katoa, e tana au tamariki; okotai rai oki a raua kai, okotai oki kapu kia inu, e moe ki roto i tona keke, riro atura mei te tamaine te tu.

4 Kua tapae maira tetai tangata aere ki o taua tangata taoiau ra, kua akaperepere atura aia i tana uaorai au mamoe, e tana uaorai au puakatoro, ka tao ei na taua tangata i aere mai kiaia ra; kua rave iora ra i ta taua tangata ao ra punua mamoe; kua taʼu iora na taua tangata i aere mai kiaia ra.

5 Riri rava akerā Davida i taua tangata ra; e kua tuatua maira aia kia Natana, Te ora rā Iehova, ko te tangata i pera ra, e tau tikai iaia te mate.

6 E no te mea aia i pera, e kare aia i aroa, ka akaoki maira aia i taua punua mamoe ra e kia a.

7 Kua karanga aturā Natana kia Davida, Ko koe rai taua tangata ra. Te na ko maira te Atua o Iseraela ko Iehova, I akatainu atura au ia koe ei ariki no Iseraela, e kua akaora au ia koe i te rima o Saula;

8 E kua oronga atura au i te ngutuare o to pu ra noou, e te au vaine katoa a to pu ra noou, e te au vaine katoa a to pu ra, ki roto i toou keke, e kua oronga atu oki au i te ngutuare katoa o Iseraela, e to Iuda; e naringa te reira e iti ra, kua oronga atu rai au i tera mea i tera mea.

9 Eaa oki koe i akavaavaaʼi i te akauenga a Iehova, i rave ei koe i teianei kino i mua i tona aroaro? Kua mate te ngati Heta ra ko Uria ia koe i te koke, e kua rave oki koe i tana vaine ei vaine naau, e kua ta oki koe iaia ki te koke a te tamariki a Amona.

10 E i teianei, kare rava te koke e taka ke i toou are; no te mea kua akavaavaa mai koe iaku, e kua rave koe i te vaine a Uria ngati Heta ei vaine naau.

11 Te na ko mairā Iehova, I na, e akatupu au i te kino ia koe i roto i toou ra are, e rave oki au i taau au vaine i mua i to mata na, ka apai atu ei ki to tangata tupu, e nana e moe i to au vaine ki mua i te mata o teianei rā.

12 Kua rave poiri oki i taau i rave io nei: ka rave ra au i teia ki mua ia Iseraela katoa, e ki mua oki i te rā nei.

13 Kua tuatua mairā Davida kia Natana, Kua ara au ia Iehova. Kua karanga aturā Natana kia Davida, Kua akataka keia e Iehova taau ara; kare koe e mate.

14 No te mea ra, no taua ravenga nei, kua maata rava te mea i raukaʼi i to Iehova au enemi i te akakino, ko te tamaiti naau e anau nei, ka mate takiri ïa.

15 Aere aturā Natana ki tona ra ngutuare. Taia maira taua tamaiti ta te vaine a Uria i anau mai na Davida ra e Iehova, e maata rava iora te maki.

16 Kua pure iorā Davida i te Atua i taua tamaiti ra; kua akakore iora oki a Davida i te kai, e kua aere iora ki roto, moe iora ki raro, i te one e ao ua ake.

17 Kua tu iora te aronga pakari i tona are, aere atura kiaia ra, e akatu akera iaia ki runga mei raro mai i te one ra; kare akera i tika iaia, e kare oki aia i kai i te manga kia ratou ra.

18 E tae akera ki te rā itu ra, mate iora taua tamaiti ra. Mataku akera te au tavini o Davida kia karanga atu kiaia e, kua mate te tamaiti ra; kua tuatua akera oki ratou, I na oki, te ora ra te tamaiti, kia karanga atu tatou kiaia, kare akerai i akarongo mai i ta tatou tuatua; ka tangaʼi oki i tera ra, ka maata atu ïa tona aue kia karanga atu tatou kua mate te tamaiti.

19 Kia akara rā Davida i te au tavini e te tuatua rikiriki ra, kua manako a Davida e kua mate te tamaiti; e kua tuatua mairā Davida ki tona au tavini, Kua mate ainei te tamaiti? Kua karanga atura ratou, Kua mate aia.

20 Kua tu mairā Davida i reira mei raro mai i te one ra, kua orei iora, e kua akatainu ki te manongi, kua kopae akera i tona kakau, kakau akera ki te kakau ou, e kua tomo maira ki roto i te are o Iehova, kua akamori atura: e mei reira oki, kua aere iora ki roto i tona uaorai are, kia karanga atu aia ra, kua tuku maira ratou i te kai ki mua iaia, e kua kai iora aia.

21 Kua karanga atura tona au tavini kiaia, Eaa tena taau i rave io na? te ora ra te tamaiti ra, te akakore ra koe i te kai e te aue ra oki; e i na, kia mate te tamaiti ra, kua tu akenei koe ki runga, e kua kai i te kai.

22 Kua tuatua maira aia, Te ora ra te tamaiti, te akakore ra au i te kai e te aue ra, kua tuatua oki au e, Koai tei kite e, kare a Iehova e aroa mai iaku, kia ora teianei tamaiti?

23 I teianei ra kua mate aia, eaa au kia akakore i te kai? e tika aina iaku e akaoki mai iaia ra? Ko au te ka aere atu kiaia ra, kare ra aia e oki mai kiaku nei.

24 Kua akapumaana aturā Davida i tana vaine ia Bateseba, e kua aere atura ki roto iaia ra, e kua moe atura; e kua anau maira aia e tamaiti, tapa iora i tona ingoa ko Solomona: e kua aroa mairā Iehova iaia.

25 Kua tono akera aia i te peroveta ra ia Natana; e kua tapa iora i tona ingoa ko Iedidia, no te mea te aroa mairā Iehova iaia.

26 Kua tamaki aturā Ioaba ia Raba no te tamariki a Amona, e rave iora i to te ariki ra oire.

27 Kua tono akerā Ioaba i te karere kia Davida, e karanga atu e, Kua tamaki au ia Raba, e kua rauka te oire vai ra iaku.

28 E tenana e akaputuputu koe i te au tangata toe, ka patiaʼi i te puakapa i taua oire nei, e rave: ko te rave aea au i te oire, e ko te tapaia aea toku ingoa ki reira.

29 Kua akaputuputu iorā Davida i te tangata ravarai, e aere atura ki Raba, e tamaki atura, e rauka iora.

30 Kua rave atura aia i te korona o to ratou ariki i runga i tona mimiti, okotai taleni auro i te teiaa, e te au toka memeitaki ra; tukuia iora ki runga i te mimiti o Davida: e manganui oki te apinga no roto i taua oire ra i te apai angaia mai.

31 E kua arataki maira aia i te au tangata i roto ra ki vao, e tuku atura ki te keke, e te paoro auri maata, e te tapae auri, e kua tuku ia ratou kia aere ua na na roto i te ngai tunuanga karakaraea: kua pera aia ki te au oire ravarai o te tamariki a Amona. Kua oki mairā Davida e te tangata katoa ki Ierusalema.