Genese

30 E KITE akerā Rahela e, kare aia i anau tama ia Iakoba, kua vareae aturā Rahela i tona tuakana; e kua karanga atura kia Iakoba, O mai te tamariki naku, ka mate au.

2 Riri akerā Iakoba ia Rahela; e kua tuatua maira, Tei iaku ainei ta te Atua ra, tei kore i oronga mai i te tamariki naau?

3 Kua karanga atura aia, Tera ake toku tavini ko Bila; e aere atu koe kiaia ra; kia anau tana ei ikiiki anga naku, kia tamariki katoaia taku iaia ra.

4 Kua tuku atura aia i tona tavini ia Bila ei vaine nana; e kua moe aturā Iakoba iaia.

5 E kua to iorā Bila, e anau maira ta Iakoba iaia, e tamaroa.

6 Kua tuatua akerā Rahela, Kua akatika mai te Atua iaku, kua akarongo katoa mai oki aia i toku reo, e kua oronga mai i tetai tamaroa naku; i tapaʼi aia i tona ingoa ko Dana.

7 Kua to akaou iora taua tavini o Rahela ra ko Bila, ko te rua ïa o te tamaiti tana i anau na Iakoba.

8 E kua tuatua akerā Rahela, E tauetono maata toku nei tauetono i toku tuakana, e kua riro mai kiaku: tapa iora aia i tona ingoa ko Naphatali.

9 E kite akerā Lea e, kua pa aia, kua rave akera aia i tona tavini ia Zilipa, e kua tuku atura iaia kia Iakoba ei vaine nana.

10 Kua anau iora ta te tavini o Lea ra, ta Zilipa, i tetai tamaiti na Iakoba.

11 Kua tuatua akerā Lea, kua meitaki; i tapaʼi aia i tona ingoa ko Gada.

12 Kua anau iora te tavini o Lea ra ko Zilipa, i tetai tamaiti na Iakoba, ko te rua ïa.

13 E kua tuatua akerā Lea, E ao toku; ka tuatua oki te au vaine iaku nei e, E ao tona: tapa iora aia i tona ingoa ko Asera.

14 Aere aturā Reubena ki vao i te tuatau kokoti anga sitona ra, e kite atura aia i te ua poroiti i taua ngai ra, e kua apai maira ki tona metua vaine ra kia Lea. Kua tuatua mairā Rahela kia Lea, Tera taku tuatua, ka o mai koe i etai ua poroiti a to tamaiti na naku.

15 Kua karanga atura aia kiaia, E iti rai tena, ko taku tane i raveia e koe na? e rave katoa mairai koe i te ua poroiti a taku tamaiti nei? Kua tuatua mairā Rahela, Ka moe aia ia koe i teianei po i te ua poroiti a to tamaiti na.

16 E kia oki mairā Iakoba i te aiai mei te kainga mei, aere aturā Lea ki vao kia aravei atu iaia, e kua karanga atura, E moe koe iaku nei; kua ou tikaia koe e au i te ua poroiti a taku tamaiti nei. Kua moe maira aia iaia i taua po ra.

17 Kua akarongo maira te Atua ia Lea, e kua to iora aia, ko te toko rima ïa o te tamaiti tana i anau na Iakoba.

18 Kua tuatua akerā Lea, Kua orongaia mai e te Atua te tutaki noku, no te mea kua oronga au i toku tavini na taku tane: tapa iora aia i tona ingoa ko Isakara.

19 Kua to akaou iorā Lea, ko te toko ono ïa o te tamaiti tana i anau na Iakoba.

20 E kua tuatua akerā Lea, Kua akaapinga mai te Atua iaku i te apinga meitaki: e noo mai taku tane iaku i teianei, no te mea, toko ono akenei aku tamariki tamaroa i anau nana: tapa iora aia i tona ingoa ko Zebuluna.

21 E muri akera, anau iora aia, e tamaine, tapa iora i tona ingoa ko Dina.

22 Kua manako maira te Atua ia Rahela; e kua akarongo maira iaia, e kua oronga maira i te tamariki nana.

23 E kua to iora aia, e anau maira tana, e tamaroa; e kua tuatua akera aia, Kua akakore io nei te Atua i te akakino anga iaku nei:

24 Tapa iora aia i tona ingoa ko Iosepha, kua tuatua akera oki aia, Kia kapiti mairai a Iehova i tetai tamaiti naku.

25 E tei te tuatau i anau ei a Iosepha ia Rahela ra, ko ta Iakoba ïa tuatua anga atu kia Labana e, E tuku ake koe iaku, e aere au ki toku ra ngai, e ki toku uaorai enua.

26 E o mai koe i aku puke vaine, i tavini atu ei au ia koe na, e taku au tamariki nei oki, kia aere au; kua kite oki koe i te tu o taku angaanga i rave ia koe na.

27 Kua tuatua mairā Labana kiaia, Kia kite aroaia mai au e koe i tenana, kua kie pu akenei oki au iaku uaorai e, noou i akameitaki mai ei a Iehova iaku.

28 Kua tuatua maira aia, E akakite mai koe kiaku i taau tutaki, e naku ia e oronga atu.

29 Kua karanga atura aia kiaia, Kua kite oki koe i te tu o toku tavini anga ia koe na, e taau ainga i te meitaki anga iaku ra.

30 Kare au i tae mai e apinga iti taau, e kua riro io nei ei mea maata roa; kua akameitaki mai oki a Iehova ia koe mei toku aere anga mai: e teianei, aea au e kimi ei i ta toku uaorai nei ngutuare?

31 Kua tuatua maira aia, Eaa taku e apai atu naau? Kua karanga aturā Iakoba, Auraka taau e apai mai naku; kia tika ra ia koe teia tuatua, e tiaki akaou au i te mamoe naau, e naku e angai:

32 Ka aere au na roto i taau anana katoa akonei, ka akataka ke atu ei i te au puaka tipurepure, e te koinaina katoa, e te puaka keukeu katoa, no roto i te au mamoe ra, e te koinaina e te tipurepure i roto i te puaka-nio ra, e ka rauka rai taku tutaki.

33 Ei reira e kiteaʼi te tika anga o taku nei tuatua, i mua i to aroaro na a muri atu, kia aere ake koe ki runga i taku tutaki; ko te au puaka kare e tipurepure e te koinaina i roto i te au puaka-nio ra, e te au puaka keukeu kore i roto i te au mamoe, e tuatuaia te reira ei mea keia naku.

34 Kua tuatua mairā Labana, Kua tika, e akapera i taau i tuatua mai na.

35 Kua akataka ke atura aia i taua rā ra, i te au puaka-nio toa kotiatia e te koinaina, e te au puaka-nio ua katoa i kotiatia e te koinaina, ko te au puaka katoa i teatea i tetai ngai iti, e te au puaka keukeu katoa i roto i te au mamoe ra; kua tuku atura ki te rima o tana uaorai tamariki.

36 Kua akataka ke atura aia iaia, e ia Iakoba, e toru rā e tae mai ei kia aere: kua tiaki iorā Iakoba i tetai pae a te anana a Labana ra.

37 Kua rave iorā Iakoba i etai rakau libene mapuapua ra, e te sekadi, e te oramuna; kua oore toreteatea iora, kia kitea te teatea i roto i aua nga rakau ra:

38 E kua akatu akera aia i taua au rakau i ooreia e ia ra, ki te pae o te au āriki, vai i akainuiaʼi te au anana ra, ki mua tikai i te anana kia aere mai taua anana ra e inu ra; e kia kapiti aere ratou i reira, me aere mai ratou e inu ra.

39 Kia kapiti aere te anana i mua i taua au rakau ra, e anau maira te anana i te anaunga kotiatia, e te tipurepure, e te koinaina.

40 Kua vee iorā Iakoba i taua au punua mamoe ra, e kua akaanga aia i nga mata o te anana ki tei kotiatia, e tei keukeu i te anana a Labana ra: akataka ke maira aia i tana uaorai anana kia taka ke, kare ïa i tuku katoa ki roto i te au anana a Labana ra.

41 E me kapiti aere tei maroiroi o taua anana ra, kua tuku iorā Iakoba i te au rakau i taua au ngai vai ra, ki mua i te mata o taua au puaka ra, kia kapiti aere ratou i reira i taua au rakau ra.

42 Kareka te au puaka apikepike ra, kare aia i tuku i taua au rakau ra i te reira: riro atura te papaki apikepike ra kia Labana, e te papaki maroiroi ra, tei ia Iakoba ïa.

43 Tupu atura taua tangata ta i te maata, e manganui tana puaka, e te tavini vaine, e te tavini tane, e te kamela, e te asini.