2 Paraleipomeno

26 KUA rave iora to Iuda katoa ia Uzia, okotai ngauru ma ono ona mataiti, e kua akaariki akera iaia, ei tupau i tona metua ia Amazia ra.

2 Kua patu akera aia ia Elota, e kua akaoki maira kia Iuda, ka moe ei te ariki ki o tona ra ai metua.

3 Tei te mataiti okotai ngauru ma ono ra i ariki ei a Uzia ra, ka rima akera ngauru ma rua ona mataiti i te ariki anga i Ierusalema. Ko Iekolia oki te ingoa o tona metua vaine no Ierusalema.

4 Kua rave aia i te mea tika ki mua i te aroaro o Iehova, mei ta tona metua, mei ta Amazia i rave ra.

5 Te kimi ra aia i te Atua i te au rā o Zekaria ra, ko tei kite i te au orama a te Atua ra: e te kimi ra aia ia Iehova ra, kua akamanuia maira te Atua i tana ra.

6 Kua aere atura aia e kua tamaki atura i te Philiseti, e kua ngaangaa te patu i Gata iaia, e te patu i Iabene, e te patu i Asedoda, e kua patu i te au oire i vaitata ia Asedoda, e i roto i te au Philiseti.

7 Kua tauturu maira te Atua iaia i te tamaki anga i te Philiseti, e te tamaki anga i to Arabia i tei noo i Gura-baala, e te tamaki anga i te au Meuni.

8 E kua apai mai te ngati Amona i te apinga na Uzia: e tutuki atura tona rongo e tae ua atura ki te tomoanga atu i Aiphiti ra; kua maroiroi rava oki aia.

9 Kua patu iora oki a Uzia i te au punanga i Ierusalema i te ngutupa i te poo patu ra, e te ngutupa i te o ra, e i te poo i taua patu ra, e kua akaketaketa oki i te reira ra.

10 Kua patu oki aia i te au punanga i te medebara, e manganui te ruavai i koia: e anana manganui oki tana, i te au o ra, e te au ngai mataataa katoa; e te aronga tatanu, e te aronga tope vine i runga i te au maunga, e i runga ia Karamela: e mea taurekareka oki nana te tatanu.

11 E nuku tangata tamaki ta Uzia, ko tei aere takanava ua ka tamaki ei, ko tei tataia e te rima o te tata tuatua e Ieiela, e te tutara ra e Maaseia, tei te rima o Hanani, tetai rangatira a te ariki ra.

12 Te aronga mataiapo tutara i te tatau anga e rua ïa tausani e ono anere, e aronga toa anake.

13 E ko raro ake i to ratou rima e nuku katoa ïa, e toru anere ma itu i te tausani e rima oki anere e karo tamaki anake ma te ririnui, ei tupae i te ariki i tona au enemi.

14 Kua kimi iorā Uzia na ratou, na taua nuku katoa ra, i te au paruru, e te au korare, e te au pare, e te au tapoki-umauma, e te au ana, e te au toka maka.

15 Kua anga iora oki aia i Ierusalema i te ravenga i kimiia e te aronga karape, ka tuku ei ki runga i te au punanga, e ki runga i te au ngai i paruruia ra, ka akainanaʼi oki te kakao e te toka maata. Tutuki atura tona rongo ki te pa enua katoa; i tupae maataia mai oki aia, e ketaketa ua atura oki aia.

16 Ketaketa akera ra aia, kua akateiteiia tona ngakau e mate atura: kua rave oki aia i te ara i tona Atua ia Iehova ra, kua aere oki aia ki roto i te nao o Iehova e tutungi i te atinga kakara ki runga i te atarau atinga kakara ra.

17 Kua aru aturā Azaria taunga iaia, koia e te kau taunga na Iehova, e varu ngauru e aronga kaumaiti anake:

18 Kua patoi atura ratou i te ariki ra ia Uzia, e kua karanga atura kiaia, Kare oki koe tei akonoia ei tutungi i te atinga kakara na Iehova, e Uzia, na te kau taunga ra na te au tamariki a Aarona, ko tei akatapu tikaia ei tutungi i te atinga kakara: e aere koe ki vao i tenana ngai-tapu; kua ara oki koe; kare oki tena e riro ei meitaki noou i te Atua ia Iehova ra.

19 Riri akerā Uzia, e kua rave iora i tetai āriki ngarau i tona rima e tutungi rai i te atinga kakara: e te riri ua ra aia i te kau taunga ra, kua tupu iora te lepera ki runga i tona rae i mua i te aroaro o te kau taunga ra, i roto rai i te are o Iehova, i vaitata i te atarau atinga kakara ra.

20 Kua akara atura te taunga maata ra ko Azaria, e te kau taunga katoa ra, iaia, e i na, kua leperaia tona rae, kua turaki atura ratou iaia ki vao; e kua rapurapu katoa oki aia uaorai i te aere ki vao, no te mea kua taia aia e Iehova.

21 Riro atura taua ariki ra ko Uzia ei lepera e tae ua atura ki te rā i mate ei aia ra, e kua noo lepera ua ki roto i tetai are ke; kua akataka keia oki aia i te are o Iehova: e tana tamaiti ko Iotama, tei runga ïa i te ngutuare o te ariki, i te akava anga i te tangata no taua enua ra.

22 E te toenga o te tuatua ia Uzia, tei mua e tei muri, kua tataia ïa e Isaia peroveta, te tamaiti a Amoza ra.

23 Moe iorā Uzia ki o tona ra ai metua; tanumia atura aia ki o tona ra ai metua i roto i te kainga tanumanga a te au ariki ra; kua tuatua akera oki ratou, E lepera aia. Tupauia akera aia i te au e tana tamaiti ra e Iotama.