2 Samuela

15 E I muri ake i te reira, kua akateateamamao iorā Abasaloma i te au kariota, e te au oroenua, e te au tangata oki e rima ngauru ei oro na mua iaia.

2 E kua tu akerā Abasaloma i te popongi roa, tu ua iora i te pae arataa, e aere tika atu ei ki te ngutupa ra: e e tuatua ta tera ra tangata kia aere mai ki te ariki ra kia akatakaia, ei reirā Abasaloma e kapiki atu ei kiaia, e karanga atu ei e, No teea oire koe? Ei reira aia e tuatua mai ei e, No tetai i te au kopu o Iseraela nei to tavini nei.

3 Ei reirā Abasaloma e karanga atu ei kiaia e, I na, kua meitaki rai taau tuatua, e kua tika oki; kare ra e tangata i akonoia e te ariki ei akarongo ia koe.

4 Kua karanga atu rai oki a Abasaloma, Naringa au e akariroia ei akava i te enua nei, e ko te tangata ravarai, e māroanga tana e te tuatua, kia aere mai aia kiaku nei, e naku aia e akatika atu!

5 E kia akavaitata mai te tangata kiaia e tupou, kua rave tika atu tona rima iaia, kua ongi atu.

6 E kua perā Abasaloma kia Iseraela katoa, kia aere mai ki te ariki kia akatakaia te tuatua: kua perā Abasaloma i te keia i te ngakau o te tangata o Iseraela.

7 E ope akera nga mataiti e a ra, kua tuatua mairā Abasaloma ki te ariki, Teia taku tuatua kia koe, tuku ake ana koe iaku e aere au ki Heberona, ka akono ei i taku i tia ra kia Iehova.

8 E tia oki ta to tavini i tia ra, iaku i noo i Gesura i Arama, ka tuatuaʼi au ra e, Kia akaoki mai a Iehova iaku ki Ierusalema ra, e akamori au ia Iehova i reira.

9 Kua karanga atura te ariki kiaia, Ka aere ma te au. Kua tu iora aia e aere atura ki Heberona.

10 Kua tono rā Abasaloma i te au mata ei tutaka e pini ua ake te au kopu ravarai o Iseraela, tuatua akera, I te akarongo anga kotou i te tangi pu ra, ei reira kotou e karangaʼi e, Kua akaarikiiā Abasaloma i Heberona ra.

11 E rua oki anere tangata i aru ia Abasaloma mei Ierusalema atu, ko tei ikiia ïa; i aere vare ua ra ratou, kare ïa i kite i te mea i aere ei.

12 Kua tono akerā Abasaloma e tiki ia Ahitophela i Gilo, ko to Davida ïa tumukorero, i tona ra oire i Gilo, rokoia atu te apai ra i te atinga. Maroiroi akera taua aronga kotikoti kupenga ra; te maata rava ra te tangata no Abasaloma.

13 Kua aere maira tetai karere kia Davida ra, kua tuatua maira, Tera te ngakau o te au tangata o Iseraela tei ia Abasaloma.

14 Kua tuatua mairā Davida ki te au tavini katoa i kapiti katoa iaia ra i Ierusalema, Ka tu, e oro tatou; kare oki e ora ia Abasaloma ra; kia ngakoikoi kotou i te aere, ka rokoia vave uaia mai aea tatou e ia, e rokoia iora tatou e te kino; e ko te taia mai aea teianei oire ki te mata koke.

15 Kua karanga atura taua au tavini o te ariki ra ki te ariki, I na, e rave to au tavini nei i ta to matou pu i ta te ariki ra e tuatua maira.

16 Kua aere iora te ariki, e tona katoa ngutuare i muri ake iaia. Vaooia iora nga vaine tavini okotai ngauru ei tiaki i te are.

17 Riro atura te ariki, e te au tangata katoa i muri ake iaia ra, noo iora i tetai ngai i te mamao ke ra.

18 E kua aere iora te au tavini katoa nona i mua iaia ra, e te Kereti katoa ra, e te Peleti katoa ra, e to Gata katoa, (e ono ïa anere i te tangata,) ko tei aru mai ïa iaia mei Gata maira, kua aere ua ïa na mua i te ariki ra.

19 Kua tuatua maira te ariki kia Itai i Gata ra, Eaa oki koe i aru mai ei ia matou nei? ka oki ki toou ra ngai, e noo ki o te ariki ra: e tangata ke oki koe, e te tuaru oki.

20 I nanai ua mai oki koe na, e tika aina oki au kia akauoa aere ua ia koe ki runga e ki raro i rotopu ia matou nei? i na te aere ua nei au i toku aerenga; ka oki koe e akaoki koe i to au taeake: ei ia koe te aroa e te tuatua-mou.

21 Kua karanga aturā Itai ki te ariki ra, na ko atura, Te ora rā Iehova, e te ora ra taku pu te ariki ra, ei taua ngai ra e nooia e taku pu e te ariki ra, ei te mate e ei te ora, ei reira tikai to tavini nei.

22 Kua tuatua mairā Davida kia Itai, Ka aere ana na mua. Kua aere iorā Itai i Gata na mua, e tona au tangata ravarai, e te au tamariki katoa i kapiti mai kiaia ra.

23 E to te au tapere katoa ra, e te tangata ravarai i te ratou aere anga, aue iora ratou ma te reo maata: kua na raro ua atura te ariki uaorai i te kauvai ra ko Kiderona, e kua aere atura te au tangata ravarai ki tetai pae kauvai ki te arataa i te medebara ra.

24 E i na, ko Zadoka katoa, e te au ngati Levi ravarai, i te apai katoa anga i te aruna o te koreromotu a te Atua; e kua tuku iora ratou i te aruna a te Atua ki raro; e kua aere aturā Abiatara ki runga e ope rava akera te au tangata katoa i te riro mei roto mai i taua oire ra.

25 E kua tuatua maira te ariki kia Zadoka, Ka akaoki ana i te aruna a te Atua ki roto i te oire; e kite aroaia mai au e Iehova ra, ka akaoki mairai ïa aia iaku, e akakite mai ïa kiaku, e tona noo anga:

26 Kia pera maira aia i te tuatua anga mai kiaku e, Kare oku mataora anga atu ia koe, i na, teia au, ka rave mai aia iaku i tei inangaroia e ia.

27 Kua tuatua maira oki te ariki kia Zadoka taunga ra, Kare ainei ko koe te akara? Ka oki ki te oire ma te au, e nga tamariki katoa aau ra; te tamaiti naau ko Ahimaaza, e ko Ionatana te tamaiti a Abiatara ra.

28 I na, ka noo rai au i ko nei i te ngai mataataa i te medebara nei, e kia tae mai te tuatua no ko na mai a kotou na kia kite au.

29 Kua akaoki aturā Zadoka raua ko Abiatara i te aruna a te Atua ki Ierusalema: noo iora raua i reira.

30 E aere iorā Davida na runga i te pae maunga ra ko Oliveta; aere ua atura ma te aue, kua tapokiia tona mimiti, e te vai ua ra tona vaevae: kua tapoki iora te au tangata ravarai ki ona i to ratou mimiti, e kua aere anake iora ratou ki runga ma te aue.

31 E kua akakite maira tetai kia Davida, na ko maira, Tera katoā Ahitophela tei roto katoa i te aronga i kotikoti kupenga i o Abasaloma. Kua karanga aturā Davida, E Iehova e, teia taku tuatua kia koe, e akariro koe i te ako a Ahitophela ei neneva.

32 E tae aturā Davida ki runga i te take maunga ra, te akamori ra aia i te Atua, i na, ko Husai i Araki, kua aere maira e aravei maira iaia ma te kakau ngangae, e ma te one ki runga i tona mimiti:

33 Koia ta Davida i karanga atu e, Kia kapiti katoa mai koe kiaku nei, ka riro koe ei mea teiaa naku:

34 Kia oki ra koe ki te oire ra, ka karanga atu ei kia Abasaloma e, Ei tavini au noou, e te ariki e; mei iaku katoa i riro ei tavini no to metua na, ei tavini katoa au noou: ka riro te ako a Ahitophela i te ruri keia e koe i reira.

35 Kare ainei tei ko na katoa nga taunga ko Zadoka raua ko Abiatara? e te au mea katoa taau e kite no ko i te are o te ariki ra, ko taau ïa e akakite atu ki nga taunga kia Zadoka raua ko Abiatara.

36 I na oki a raua puke tamariki tei i o raua ra oki, ko Ahimaaza a Zadoka, e ko Ionatana a Abiatara ra; e akapera kotou ia raua i te akau mai i te au tuatua ravarai ta kotou e kite ra.

37 Oki atura te oa o Davida ra ko Husai, ki roto i te oire, e kua tomo mairā Abasaloma ki roto i Ierusalema.