Maseli

16 TE teateamamao o te ngakau, tei te tangata ïa: ko te tuatua a te vaa ra, no ko ïa ia Iehova ra.

2 Te mā anake ra to te tangata nei au aerenga i tona uaorai mata: te kimi matatio rā Iehova i te vaerua.

3 E tuku atu i taau angaanga kia Iehova ra, e ka akatinamouia taau i akakoro ra.

4 Kua angā Iehova i te au mea katoa nei nona uaorai, e te aronga kino katoa no te rā kino ra.

5 Te rikarika rā Iehova i te aronga katoa i parau te ngakau ra: tuikau ua rai te rima, kare aia e kore i te akautungaia.

6 Te tamāia nei te ara e te aroa e te tuatua-mou: e te akaruke nei te tangata i te kino i te mataku ia Iehova.

7 Kia tau anake to te tangata nei aerenga kia Iehova ra, kua akaongi aia i tona au enemi kiaia ra.

8 E ngari ake te apinga iti poepoe ma te tuatua tika ra, i te apinga maata rava ra ma te tika kore.

9 Te kimi ra te ngakau tangata i tona aerenga: na Iehova ra e akakite i tona takainga.

10 Ei tuatua taka meitaki to te vaa o te ariki e tikaʼi, kia kore e tatipake tona vaa kia tuku i te utunga.

11 Te akairo tika e te aite, no ko ïa ia Iehova ra: te au toka katoa o te pute ra, nana ïa.

12 Kia rikarika te ui ariki ra i te tuatua kino e tikaʼi: tei te tuatua-tika oki e mou ei te terono.

13 Te vaa tuatua-tika ra ta te ui ariki e tau atu e tikaʼi; e kia inangaro marie ratou i te aronga i tiki te tuatua e tikaʼi.

14 E tau te riri o te ariki ra ki te karere ta tangata: e maru ra i te tangata pakari.

15 Tei te mārama o te mata o te ariki ra te ora; e tau oki tona akaperepere anga mai ki te tumurangi ua openga ra.

16 Kare ainei te pakari te meitaki maata kia rauka i to te auro? e te mea inangaroia ko te kite kia rauka, auraka te ario?

17 Te arataa o te aronga tiratiratu ra, ko te akaruke ïa i te tuatua kino: ko tei akono i tona arataa, kua akaora ïa i tona uaorai vaerua.

18 Ko te parau to te mate ra na mua, e te ngakau nengonengo ra, to te inga ïa na mua.

19 Mea meitaki kia akaaka te ngakau e te aronga akaaka katoa ra, i te tua i te apinga ma te aronga parau katoa ra.

20 Ko tei pakari i tana akonoanga, e rauka iaia te meitaki: e ao ra tona, to tei irinaki kia Iehova.

21 Ko tei akono ra, e karangaia i te tangata ngakau pakari: e no te meitaki o tona vaa e tupu ei te kite.

22 Ko tei rauka iaia te pakari ra, e punavai ïa no te ora; ko te apii ra a te aronga neneva ïa.

23 Na te ngakau o te tangata pakari e akakite ki te vaa i te akono, e na te reira e akakite ki te ngutu i te kite.

24 E tau te tuatua meitaki ki te topatapata meli ra, e vene i te vaerua nei, e ora oki to te ivi.

25 E ana rai te tangata i te arataa e, e mea tika; ko te openga ra o taua arataa ra, ko te mate ïa.

26 Ko te tangata i rave i te angaanga ra, i angaanga ïa nona uaorai; na tona uaorai vaa oki i umuumu mai kiaia:

27 Te tangata kanga ra, te keri ra ïa i te kino; e tei tona vaa te ai i te mura anga.

28 E akatupu rai te tangata māro i te tauetono. e na te koumuumu tuatua ra, e akataka ke i te aronga taunga tumanava.

29 Ko te tangata takinga-kino ra, e vare tona oa iaia, e kua arataki iaia na te arataa kare e meitaki:

30 E topiri aia i tona mata ei kimi anga i te tuatua mingi: kua kakati oki i tona ngutu, e kua rave iora i taua kino ra.

31 E korona kakā te upoko inaina, kia rokoia atu tei te arataa tuatua-tika ra.

32 Te kore e rapurapu i te riri ra, e meitaki maata tona i to te aronga ririnui; e tei vi tona uaorai vaerua, i tei pou iaia te oire.

33 Kua tukuia te kelero ki roto i te āriki; tei ia Iehova anake ra te akataka anga.