Deuteronomi

22 AURAKA koe e akara mata ua i te puakatoro, e te mamoe, a to taeake i te aere ke anga, ka vaoo ua atu ei; ka akaoki mairai koe i te reira ki to taeake ra.

2 E kare to taeake i vaitata mai ia koe ra, e kare koe i kite iaia, e taki koe i taua puaka ra ki tou ra ngutuare, ei ia koe ra vaoo ei e kia kimiia e to taeake ra: e ka akaoki atu koe i te reira ra kiaia.

3 E pera katoa oki koe i tana asini; e pera oki koe i tona kakau; e pera katoa oki koe i te au apinga ravarai a to taeake kia ngaro iaia ra, e kua kitea e koe ra: auraka koe e uuna i taua mea ra.

4 Auraka koe e akara mata ua i te asini a to taeake, e te puakatoro nana, i te topa anga i te arataa, ka akaruke uaʼi; ka pange rai koe ma ia katoa ka akatu akaou ei ki runga ra.

5 Auraka te vaine e kakau i te kakau tane ra; auraka katoa te tane e kakau i te kakau vaine: ko te aronga ravarai oki e akapera ra, e aronga viivii ïa i to Atua ra ia Iehova.

6 Kia kitea uaia te koanga manu i te arataa ki mua ia koe na, ki runga i te rakau ra, e ki raro i te one ra, e anaunga ra, e anaunga ïa, e ua ua ra, ko te reira ia, e te tinana i te noo anga ki rungao i taua au anaunga ra, e ki rungao i te au ua ra, auraka koe e rave i te tinana e te anaunga katoa ra;

7 Ka tuku ra koe i te tinana, ko te anaunga taau e rave naau kia rave: kia meitaki oki koe, e kia roa toou au rā.

8 Kia patu koe i te are ou ra, ei paruru taau e anga no rungao, ko te taka mai aea tetai tangata ki raro, ko te viivii aea to are ia koe i te toto.

9 Auraka koe e ruru i te kainga vine naau ki te ua ke ke ra; ko te kino aea tei tupu i te au ua taau i ruru ra, e to te kainga vine tikai naau kia tupu ra.

10 Auraka koe e kapiti i te puakatoro e te asini kia arote ra.

11 Auraka koe e kakau ki te kakau irokia ra mei te uru-mamoe e te orongā ra.

12 Ei tapa veruveru taau e anga i nga kautuai e a i to kakau tapoki taau e tapoki ia koe ra.

13 Kia akaipoipo te tane i te vaine, e kia moe aia iaia, e kua riri aia iaia ra;

14 E kua tapepe vaa ua aia iaia, e akakinoia iora aia iaia, kia tuatua e, Kua akaipoipo au i teianei vaine, e i toku rave anga atu iaia ra, kite atura au e kare aia i te paretenia;

15 Ei reira te metua tane, e te metua vaine o taua vaine ra, e rave i te akairo paretenia o taua vaine ra, ka apai ei ki te aronga pakari i te ngutupa o taua oire ra:

16 E na te metua tane o taua vaine ra e karanga atu ki taua aronga pakari ra, Kua tuku atu au i taku tamaine ei vaine na teianei tangata, e kua riri oki aia iaia;

17 E i na, kua tapepe vaa ua oki aia iaia, i te tuatua anga e, Kua kitea taau tamaine e au, e kare aia i te paretenia; teia oki te akairo paretenia o taua tamaine naku ra. Ka akakite atu ei raua i taua akairo paretenia ra ki te aronga pakari o taua oire ra.

18 E na te aronga pakari o taua oire ra e rave i taua tangata ra ka pāpā atu ei,

19 E akautunga atu ei iaia i te ario e kia okotai anere sekela, ka apai mai ei ki te metua tane o taua vaine ra, no te mea, kua akakinoia tetai paretenia ngati Iseraela iaia: ka vaoo rai aia ei vaine nana; e kare rave e tika kia kopae ai iaia e ope rava ake tona au rā i te ao nei.

20 Kia riro ra taua tuatua ra ei tuatua-mou, e kare o taua vaine ra e akairo paretenia i kitea:

21 E kave ratou i taua vaine ra ki te ngutupa o te are o tona metua tane i reira, e na te au tangata o tona ra oire e peî iaia ki te toka, e kia mate takiri rava aia; no te mea e ravenga kanga tana i roto ia Iseraela ra, koia i akapeu vaine akaturi i te ngutuare o tona metua ra: pou atura ia koe i reira te kino i roto ia kotou.

22 Kia kitea te tangata i te moe anga ki te vaine noo tane ra, ka mate katoa raua i reira, taua tangata i moe i taua vaine ra e te vaine katoa ra: pou atura ia koe i reira te kino i roto ia Iseraela.

23 Kia momokia tetai paretenia ki te tane, i rokoia iora aia e tetai tangata i roto i te oire, e kua moe iora kiaia;

24 E arataki kotou ia raua ravarai ki vao i te ngutupa o taua oire ra, ka peî ei kotou ia raua ki te toka, e kia mate takiri raua; taua paretenia ra, no te mea i roto aia i te oire e kare rai aia i kapiki; e taua tane ra, no te mea kua moe aia i te vaine a tona taeake ra: pou atura ia koe i reira te kino i roto ia kotou.

25 Kia rokoia atura te paretenia i momokia ra e tetai tangata i te ngai motutaa ra, e kua opu taua tangata ra iaia, kua moe iora kiaia; ko taua tane anake i moe kiaia ra te ka mate i reira:

26 Auraka ra koe e akautunga ua atu i taua vaine ra; kare oki a taua vaine ra e ara e tau ei te mate: e arite oki te reira ki te tangata e tu ua ki runga e kua rave e ta ua i tona taeake ra, koia katoa oki te reira:

27 Rokoia atu oki aia e ia i te ngai motutaa, e kua kapiki ua oki taua paretenia i momokoia ra, e kare e tangata i te akaora iaia.

28 Kia rokoia atu te vaine paretenia kare i momokoia e tetai tangata, e kua opu iaia, e kua moe kiaia, e kitea iora raua;

29 Ka apai taua tangata i moe kiaia i te ario na te metua tane o taua paretenia ra i reira, kia rima ngauru i te sekela, e ka akariro i taua vaine ra ei vaine tikai nana; no te mea kua taakaaka aia iaia, kare e tika iaia kia kopae i taua vaine ra e ope ua ake tona au rā i te ao nei.

30 Auraka rava te tangata e rave i te vaine a tona metua tane ra; auraka e eeu atu i te kakau o tona metua tane.