Apokalupo

18 E I muri ake i te reira, kite atura au i tetai angela ke, i te eke anga mai mei te rangi mai, e mana maata tona; e kua mārama te ao nei i tona kakā.

2 Kua kapiki nui ua maira aia ma te reo maata, na ko maira, Kua inga Babulonia maata e, kua inga, e kua riro ei nooanga demoni, e ei vairanga no te au vaerua kikino ravarai, e ei koanga no te au manu viivii katoa e te kino.

3 Kua inu oki te pa enua i te wina ra i te riri maata no tana akaturi anga, e kua akaturi te au ariki o te ao nei iaia, e kua apinga maataia te aronga oko o te ao nei i te maata o tana peu akateitei.

4 E akarongo atu rai au i tetai reo no te rangi mai, i te na ko anga mai e, Ka aere ke mai ana kotou ki vao, e aku au tangata, kia kore kotou e riro ei rave katoa i tana ra au ara, kia kore kotou e mate katoa i tona ra au mate.

5 Kua taea oki te rangi i tana au ara, e kua manako te Atua i tana au tuatua-tika kore.

6 Ka o atu ïa tana kia arite katoa i tana i o mai ra, ka tutaki atu iaia e kia takirua atu tana utunga, kia tau ki tana au angaanga: e taua kapu tana i arite mai kia kotou na, ko te arite katoa ïa i tana e kia takirua atu rai.

7 Mei iaia i akateitei iaia uaorai, e kua noo ma te akateitei maata, mei te reira te maata o te mamae e te aue te ka tuku atu iaia; te karanga ra oki aia i roto i tona ngakau e, Te noo ariki vaine nei au, kare au i te takaua, e kare au e kite i te aue.

8 No reira ka rā tai uaia tona au mate, ko te mate, e te aue, e te onge; e e pou rava aia i te ai, e maroiroi oki to te Atu to te Atua ko te akautunga mai iaia ra.

9 E te au ariki o te ao nei ko tei akaturi iaia ra, e kua kapiti katoa iaia i te akatietie anga, e aue ratou iaia, e e ea oki ratou iaia, kia akara ratou i te auai no tona ka anga,

10 I te tu ua anga i te atea ke i te mataku i tona mate, e te na ko anga e, Aue! aue te oire maata nei ko Babulonia e, aue koe i te oire pakari nei e! ora tai uaia io nei oki toou mate e!

11 E aue te aronga oko o te ao nei iaia, e e tangi oki; kare rava e tangata kia oko akaou mai i ta ratou apinga:

12 Te oko anga auro ra, e te ario, e te toka memeitaki, e te poe, e te kakau meitaki, e te purapura, e te silika, e te kakau muramura, e te au rakau kakara katoa ra, e te au kapu nio elephana tu ke ke katoa ra, e te au kapu rakau memeitaki tu ke ke katoa ra, e te veo, e te auri, e te toka inuinu,

13 E te kinamo, e te rakau kakara, e te manongi, e te tapou kakara, e te wina, e te inu, e te faraoa meitaki, e te sitona, e te puakatoro, e te mamoe, e te oroenua, e te kariota, e te kopapa, e te vaerua, o te tangata nei.

14 E te au mea kaki maataia e koe ra, kua taka ke ïa ia koe, e te au mea memeitaki e te au mea akaieie, kua taka ke anake ïa ia koe, e kare rava e rauka akaou ia koe.

15 Te aronga oko i teianei au mea, ko tei rauka ta ratou apinga iaia ra, ei te atea ke ïa e tu mai ei i te mataku i tona mate, ma te eva e te aue,

16 E te na ko anga e, Aue! aue te oire maata nei e, ko tei kakau i te kakau meitaki, e te purapura, e te kutekute, ko tei akamaneaia oki i te auro, e te toko memeitaki, e te poe e!

17 Ko teianei apinga maata oki i te pou anga i te ora okotai nei e! E te au rangatira pai katoa, e te aronga teretere ra, e te au aonga pai ra, e tei angaanga aere i te moana, tu anake iora ïa i te mamao ke.

18 Kapiki ua atura i to ratou kite anga i te auai o tona pakapaka anga, na ke atura, Eaa te oire e arite ki teianei oire i te maata!

19 E kua āū ratou i te one pueu ki runga i to ratou mimiti, ma te kapiki ua, ma te ea, e te aue, e te na ko anga e, Aue! aue te oire maata nei e, i raukaʼi te apinga maata a te aronga e pai to ratou i te moana ra, no te rai o tana apinga! ora tai uaia io nei oki tona pou.

20 Kia rekareka i runga iaia, e to te rangi e, e ko kotou oki, e te aronga tapu, e te au aposetolo, e te au peroveta, kua tutaki te Atua iaia ia kotou.

21 Kua rave iora tetai angela maroiroi i tetai toka maata mei te toka tavirianga te tu, e kua titiri atura ki raro i te tai, na ko akera, Mei te reira katoa te oire maata ra ko Babulonia i te uri takiri angaia ki raro, e e kore rava e kitea akaouia atu.

22 E te tangi kitara ra, e te tangi koe ra, e te au mea i akatangiia ra, e te tangi pu ra, kare rava ïa e kite akaouia i roto ia koe na, e te aronga tau nga i te au taoonga ravarai nei, kare rava e kitea akaouia i roto ia koe na, e te aruru toka tavirianga, kare rava e akarongo akaouia i roto ia koe na;

23 E kare rava te kakā lamepa e kitea akaouia i roto ia koe na; e te reo o te tane e te vaine i akaipoipo ouia ra, kare rava e akarongo akaouia i roto ia koe na; ko te aronga oko ki oou na oki, ko to te ao nei ïa aronga mamaata, e kua vavare to te pa enua ravarai i taau ravenga purepure ra.

24 E tei roto iaia te toto o te au peroveta, e to te aronga tapu i te kitea anga ia, e to te aronga katoatoa i taia i teianei ao.