Roma

16 TE tuku atu nei au i to tatou tuaine ia Phebe kia kotou na ma te akameitaki, e diakono aia no te ekalesia i Kenekerea ra:

2 Kia āriki meitaki kotou iaia i te Atu nei, i tei tau i te aronga tapu, e kia tauturu mai kotou iaia i te au mea katoa e tau iaia ra; i tauturu na oki aia i te tangata e manganui e iaku katoa oki.

3 E aroa atu ia Peresila raua ko Akuila, e puke oa rave angaanga noku i te Mesia nei ia Iesu:

4 Ko tei tuku katoa i to raua kaki ki raro kia ora au: te akameitaki nei au ia raua, kare ra e ko au anake ra, ko te au ekalesia etene katoa ra.

5 E aroa katoa atu i te ekalesia ki roto i to raua are. E aroa atu i taku akaperepere ra ia Epaineto, ko te ua anga momua ïa o te Mesia i Akaia ra.

6 E aroa atu ia Maria, e angaanga maata tana i rave ia matou nei.

7 E aroa atu ia Anederoniko, e ia Iunia, i nga taeake noku, e puke oa noku i tapeka katoaia matou, e puke tangata kitea e te au aposetolo ra, ko raua ana oki tei roto i te Mesia iaku nei.

8 E aroa atu i taku akaperepere i te Atu nei ia Amepelia.

9 E aroa atu ia Urobana, i to matou oa rave angaanga i te Mesia nei, e i taku akaperepere oki ia Setaku ra.

10 E aroa atu ia Apele, e tangata akatikaia ïa i te Mesia nei. E aroa atu oki i to te ngutuare o Arisetobulo ra.

11 E aroa atu ïa, i taku taeake ia Herodiona. E aroa atu i to te ngutuare o Narekiso, i roto i te Atu ra.

12 E aroa atu ia Teruphaina, e ia Teruphosa, ko tei rave i te angaanga a te Atu nei. E aroa atu ia Peresi akaperepereia ra, ko tei rave papu i te angaanga a te Atu nei.

13 E aroa atu ia Rufo i ikiia ki roto i te Atu nei, e i tona metua vaine katoa e toku metua vaine

14 E aroa atu ia Asunekirito, ia Phelegona, ia Hereme, ia Pateroba, ia Herema e te au taeake ki o ratou ra.

15 E aroa atu ia Philologo, e ia Iulia, ia Nerea, e tona tuaine, e ia Olumepa, e te aronga tapu katoa ki o ratou ra.

16 E aroa oki kotou tetai ki tetai ma te ongi tapu ra. Te aroa atu nei te au ekalesia a te Mesia ia kotou.

17 E teianei, e ako atu au ia kotou, e te au taeake, ka akara meitaki io na kotou i te aronga i akataka ke, e te akatupu i te mea e turori ei ra, e te tau kore i te tuatua i apiiia kotou na; ka ariu ke atu kotou ia ratou.

18 Kare oki te reira te tavini no to tatou Atu no Iesu Mesia, no to ratou uaorai kopu ra; e kua tapikipiki i te ngakau o te aronga pakari kore ra, i te tuatua pateka e te tarekareka.

19 Kua tutuki te rongo o to kotou akarongo i te tangata ravarai: i rekaʼi oki au ia kotou: te anoano nei ra au, kia pakari kotou i te meitaki, e kia kamakura kotou i te kino.

20 E teianei, na te Atua au e akaparuparu ia Satani ki raro ake i to kotou vaevae kare ïa e roaia. Ei ia kotou te aroa ua o to tatou Atu ra o Iesu Mesia. Amene.

21 Ko taku oa rave angaanga nei ko Timoteo, e taku au taeake nei ko Lukio, e ko Iasona, e ko Sosipatera, te aroa atu nei ïa ia kotou.

22 Ko au nei oki ko Teretio ko tei tata atu i teianei episetole, te aroa atu nei au ia kotou i te Atu nei.

23 Te aroa atu nei a Gaio, e angai iaku nei, e te ekalesia katoa, ia kotou. Te aroa nei oki te rangatira oire ra, ko Eraseto, ia kotou, e tetai taeake nei oki ko Kuareto.

24 Ei ia kotou kotoa na te aroa ua o to tatou Atu ra o Iesu Mesia. Amene.

25 E teianei, ei iaia tei tika iaia i te akatinamou mai ia kotou, i tei tau i te evangelia naku nei, e i te tuatua ia Iesu Mesia ra, kia tau i te eeu anga mai o te tuatua ngaro i uunaia i te au uki katoatoa mei ito mai;

26 Kua akakiteia maira i teianei, e no te akaue a te Atua mate kore ra, i akakiteiaʼi ki te etene katoa, i te tuatua a te au peroveta i tataia ra, kia rauka ia ratou te akono akarongo ra:

27 Ei te Atua pakari anake ra te kakā, ia Iesu Mesia nei, e tuatau ua atu. Amene.