Isaia

54 KA MAEVA, e tei pa, kare i anau e; kia puroro ua te reo maeva, e kapiki nui, e tei kore i mamae i te tamariki e: kua maata oki ta te takaua ra tamariki i ta te vaine noo tane ra tamariki, te tuatua mairā Iehova.

2 E akaatea ana i to turanga puakapa; kia totōia te paruru o to nooanga ki te atea ke: auraka e taporoporo; e akaroa i to au taura, e akamou piri tikai i to au titi.

3 E tupu oki koe i te maata, i te pae katau, e te pae kaui; e nooia te pa enua e toou ra uanga, e tangataia oki te au oire tanea ra ia ratou.

4 Auraka e mataku; kare oki koe e akama: auraka oki e tumatetenga; kare oki koe e taakamaia: e akangaropoina oki koe i te akama i to ou anga ra; e te akakino i to takaua anga ra, kare ïa koe e manako akaou i te reira.

5 Ko Tei anga oki ia koe ra, ko to tane ïa; ko Iehova Sabaota tona ingoa; e to Akaora ra, ko Tei Tapu ïa i Iseraela nei; e tapaia aia Te Atua o te au enua katoa nei.

6 Mei te vaine akarukeia, e kua aue tona ngakau, kua kapiki a Iehova ia koe ra: te vaine oki i akaipoipo i te ou anga ra, e akarukeia iora, te tuatua maira to Atua ra:

7 I te kamoanga mata iti nei i akaruke ei au ia koe; e akaputu maira au ia koe ma te aroa maata.

8 I te otooto anga riri i uunaʼi au i toku mata ia koe i te kamoanga mata okotai, i te aroa mutu kore ra e aroa atu ei au ia koe; te tuatua maira to Akaora ra ko Iehova.

9 Mei te vai ia Noa ra teia iaku nei: mei taku oki i taputou i te vai ia Noa ra, e kare e nina akaouia te enua ra; koia katoa taku i taputou ia koe ra, e kare au e riri, kare oki e kauvae ia koe na.

10 E taka ke oti te au maunga, e ngaueue oti te au tuaivi; kare ra toku takinga-meitaki ia koe e taka ke, e te koreromotu au naku ra, kare ïa e ngaueue; te tuatua maira tei aroa mai ia koe ra, ko Iehova.

11 E tei tumatetenga, e tei pāpāia e te uriia, e kare e akapumaanaia; i na, e akamou au i taau au toka ki te ngaika manea, e taau au pange ki te saphiro;

12 Ei kadekade taau au pukupuku punanga kia anga au, e toou ra au pa. ei akade ïa; e taau ra au kotinga ravarai, ei toka memeitaki ïa.

13 E te au tamariki katoa naau ra e apiiia e Iehova; e ei au nuingangare to te au tamariki naau ra.

14 E akatinamouia koe i te tuatua-tika: ei te atea ke te takinga-kino ia koe; kare oki koe e mataku; e i te rikarika, kare oki te reira e akavaitata mai ia koe ra.

15 I na, me uipa ratou, kare ïa iaku nei: ko tei uipa e rave ia koe ra, e uri mai ïa ia koe.

16 I na, te tupaki auri ra, naku ïa i anga, ko tei pupui i te ngarau e ka akera, e kua anga iora i te taoonga i tana uaorai angaanga; e naku oki i anga i te akapou ra kia pou.

17 Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu. Ko te tuanga teia o te au tavini o Iehova; e tei iaku ta ratou tuatua-tika, te tuatua mairā Iehova.